ក្រុងប៉ោយប៉ែត៖ បុរសម្នាក់ជិះម៉ូតូមួយគ្រឿងម៉ាកគ្លិក សេរីឆ្នាំ២០១២ សំដៅមកផ្ទះត្រូវក្រុមស្ទាវមានគ្នា៣ទៅ៤នាក់ ប្រដាប់ដោយដាវសាំម៉ូរៃពួនស្ទាក់ ប្លន់យកបានសម្រេច ។
កាលពីវេលាម៉ោង៣និង២៣នាទីទៀបភ្លី ថ្ងៃទី២ ខែមករា ឆ្នាំ២០១៦ នៅតាមផ្លូវលំ ចំណុចដីស ឋិតក្នុងភូមសាមគ្គីមានជ័យ សង្កាត់ក្រុងប៉ោយប៉ែត ខេត្តបន្ទាយមានជ័យ ។
ជនរងគ្រោះមានឈ្មោះ ស្មី ភេទប្រុស អាយុ២៣ឆ្នាំ រស់នៅក្នុងភូមិក្បាលស្ពាន១ សង្កាត់ក្រុងប៉ោយប៉ែត ជិះម៉ូតូម៉ាកគ្លិកពណ៌សលាយខៀវ អត់ស្លាកលេខ សេរី ឆ្នាំ២០១២ ។
ជនរងគ្រោះបានរៀបរាប់ថា មុនកើតហេតុខ្លួនបានធ្វើដំណើរពីវាលកំសាន្តកាស៊ីណូផ្កាយ៥ស្ថិតក្នុងភូមិក្បាលស្ពាន១ សង្កាត់-ក្រុងប៉ោយប៉ែតជាប់ព្រំដែនថៃ ដោយសំដៅមកផ្ទះលុះដល់ចំណុចកើតហេតុជាកន្លែងស្ងាត់ ស្រាប់់តែឃើញក្រុមស្ទាវ៣ទៅ៤នាក់ប្រដាប់ដោយដាវសាំម៉ូរ៉ៃ ពួនស្ទាក់តាមផ្លូវ ពេលនោះខ្លួន(ជនរងគ្រោះ)បានឃើញសកម្មភាពក៏ទុកម៉ូតូចោលរត់យករួចខ្លួនសំដៅមកប៉ុស្ដិ៍បញ្ជាការពារភូមិនៅក្បែសាលារៀនព្រហ្មនិតដើម្បីប្ដឹងសមត្ថកិច្ច ក្រោយពីការប្ដឹង សមត្ថកិច្ចបានទៅដល់កន្លែងកើតហេតុតែក្រុមស្ទាវទាំងនោះបានជិះម៉ូតូគេចបាត់ខ្លួនបាត់។
លោកអ៊ឹមសុភារៈ នាយប៉ុស្ដិ៍សង្កាត់ប៉ោយប៉ែតបានប្រាប់តាមទូរស័ព្ទនៅព្រឹកថ្ងៃទី២ខែឆ្នាំដដែលនេះថា ចំពោះករណីខាងលើនេះលោកមិនបានដឹងឡើយ៕
ដោយ៖ វណ្ណា
