ខេត្តកណ្តាល៖ រថយន្តមិនស្គាល់អត្តសញ្ញាណបានបើកបោះពួយក្នុងល្បឿនលឿន បុកម៉ូតូមួយគ្រឿងនៅលើស្ពានព្រែកតាមាក់ បណ្តាលឲ្យបុរស២នាក់ស្លាប់បាត់បង់ជីវិតភ្លាមៗមួយរំពេចធ្វើឲ្យអ្នកឃើញហេតុការណ៍រន្ធត់ចិត្តគ្រប់ៗគ្នា ។
ករណីគ្រោះថ្នាក់ចរាចរណ៍នេះបានកើតឡើងកាលពីវេលាម៉ោង១១ និង៤៥នាទី ថ្ងៃទី១ ខែកុម្ភៈ ឆ្នាំ២០១៦ នៅលើស្ពានព្រែកតាមាក់ តាមបណ្តោយផ្លូវជាតិលេខ៨ ស្ថិតក្នុងភូមិព្រែកតាមាក់ ឃុំព្រែកតាមាក់ ស្រុកខ្សាច់កណ្តាល ។
មន្ត្រីនគរបាលចរាចរណ៍ស្រុកខ្សាច់កណ្តាលបានឲ្យដឹងថា ជនរងគ្រោះឈ្មោះ សឿន ស៊ាន់ ភេទប្រុស អាយុ៣៦ឆ្នាំ ជាអ្នកបើកបរ និងម្នាក់ទៀតឈ្មោះ សឿន វ៉ូច ភេទប្រុស អាយុ២៦ឆ្នាំ ។ ជនរងគ្រោះទាំង២នាក់ជាបងប្អូនបង្កើតនឹងគ្នាមានទីលំនៅក្នុងភូមិស្វាយដំណាក់ ឃុំស្វាយរមៀត ស្រុកខ្សាច់កណ្តាល ជិះម៉ូតូម៉ាកស៊ុយហ្ស៊ូគី ស្មាស់រីវ៉ូ ពណ៌ខ្មៅលាយស គ្មានស្លាកលេខ ។ ចំណែកឯរថយន្តបង្កមិនស្គាល់អត្តសញ្ញាណ ក្រោយពីបើកបុកម៉ូតូបណ្តាលឲ្យមានមនុស្សស្លាប់បានបើកគេចទៅទិសខាងកើតបាត់ស្រមោល ។
ប្រភពដដែលបានបន្តថា តាមការពិនិត្យកន្លែងកើតហេតុជនរងគ្រោះជិះម៉ូតូក្នុងទិសដៅពីកើតទៅលិច ខណៈជិះដល់លើស្ពានព្រែកតាមាក់ក៏ត្រូវរថយន្តបើកច្រាស់ទិសគ្នាបើកបុកពេញមួយទំហឹង បណ្តាលឲ្យជនរងគ្រោះទាំង២នាក់រងរបួសយ៉ាងធ្ងន់ធ្ងររហូតស្លាប់បាត់បង់ជីវិតយ៉ាងដូច្នេះ ។
ក្រោយពីបើកបុកម៉ូតូបណ្តាលឲ្យមានមនុស្សស្លាប់អ្នកបើកបររថយន្តបានបើកគេចទៅទិសខាងកើតបាត់ស្រមោល ដោយពុំមាននណាម្នាក់ស្គាល់ម៉ាករថយន្តនោះទេ ព្រោះយប់ជ្រៅទៅហើយ ។ ចំពោះម៉ូតូរបស់ជនរងគ្រោះ ត្រូវបានសមត្ថកិច្ចនគរបាលចរាចរណ៍ស្រុកខ្សាច់កណ្តាលធ្វើការវាស់វែងដកហូត បញ្ជូនទៅរក្សាទុកនៅអធិការដ្ឋាន ដើម្បីចាត់ការតាមច្បាប់ ។ ដោយឡែកសាកសពជនរងគ្រោះ ត្រូវបានប្រគល់ទៅឲ្យក្រុមគ្រួសារយកទោធ្វើបុណ្យតាមប្រពៃណី ៕
ដោយ៖ ស្អាងជ័យ
