ខេត្តត្បូងឃ្មុំ៖ ភូមិគ្រឹះ របស់សម្ដេចអគ្គមហាពញាចក្រី ហេង សំរិនត្រូវបាន បុរសម្នាក់បើករថយន្តមួយគ្រឿងក្នុងល្បឿនយ៉ាងលឿន ដល់ផ្លូវបត់បែនមិនប្រយ័ត្ន ជ្រុលចង្កូតបុករបងថ្ម ពេញទំហឹង បណ្ដាលឲ្យបែកបាក់អស់ចំនួន២ផ្ទាំង ។
ហេតុការណ៍គ្រោះថ្នាក់ចរាចរណ៍ខាងលើនេះ ស្ថិតនៅលើផ្លូវជាតិលេខ៨ ចំណុចថ្នល់បំបែកជាបី ស្ថិតនៅភូមិអន្លង់ជ្រៃ ឃុំកក់ ស្រុកពញាក្រែក ខេត្តត្បូងឃ្មុំ។ហេតុការខាងលើកបានកើតកាលពីយប់ថ្ងៃទី០១ ខែកុម្ភៈ ឆ្នាំ២០១៦ វេលាម៉ោង២៣និង៥០នាទី ។
សមត្ថកិច្ចបានឲ្យដឹងថា មុនពេលកើតហេតុ មានរថយន្តមួយគ្រឿង ម៉ាកស្តេស ពណ៌ទឹកប៊ិច ពាក់ស្លាកលេខ ភ្នំពេញ2F9970 បើកបរយ៉ាងលឿន រួចក៏ជ្រុលចង្កូតហួសទៅបុករបងថ្ម ភូមិគ្រឹះរបស់សម្ដេច ហេង សំរិន បណ្ដាលឲ្យបាក់បែកអស់ចំនួន២ផ្ទាំង និងរងរបួសមនុស្សជិះក្នុងរថយន្តចំនួន២នាក់ផងដែរ។
ជនបើកបររថយន្តបង្ក មានឈ្មោះ ណុច ភេទប្រុស អាយុ៣១ឆ្នាំ ស្នាក់នៅខុនដូ ឌីកេស ភ្នំពេញ រងរបួសស្រាល និងអ្នករួមដំណើរជាមួយឈ្មោះ វ៉ាន់ វឌ្ឍនាសារភូមិ ភេទប្រុស អាយុ៤០ឆ្នាំ របួសធ្ងន់(បាក់ដៃឆ្វេង) មានទីលំនៅជាមួយគ្នា ចំណែកឯរថយន្តបង្ក សមត្ថកិច្ចនគរបាលស្រុក ធ្វើការឃាត់រក្សាទុក នៅកន្លែងកើតហេតុ និងដឹកអ្នករងរបួសបញ្ជូនទៅសង្គ្រោះ នៅមន្ទីរពេទ្យស្រុកពញាក្រែក ខេត្តត្បូងឃ្មុំ ៕
ដោយ៖ ហេង សូរិយា
