យ៉ាងហោចណាស់មនុស្ស២០នាក់បានបាត់បង់ជីវិតកាលពីថ្ងៃទី១ ខែកុម្ភៈ ឆ្នាំ២០១៦ បន្ទាប់ពីហេតុការណ៍វាយប្រហារដោយបំផ្ទុះគ្រាប់បែកក្នុងរថយន្តអត្តឃាតស្ថិតនៅខាងក្រោយបន្ទាយយោធាក្នុងទីក្រុងកាប៊ូល ។ ហេតុការណ៍វាយប្រហារនេះបានកើតឡើងនៅមុនប៉ុន្មានថ្ងៃប៉ុណ្ណោះ ដែលកិច្ចពិភាក្សាជាអន្តរជាតិត្រូវធ្វើឡើងក្នុងគោលបំណងបន្តកិច្ចពិភាក្សាជាមួយក្រុមអិស្លាមជ្រុលនិយមឡើងវិញនោះ ។
ការវាយប្រហារនេះ ក្រៅពីបណ្តាលឲ្យមានអ្នកស្លាប់២០នាក់ នៅមានមនុស្ស២៩នាក់ផ្សេងទៀតរងរបួស ។ ជនវាយប្រហារគ្រាប់បែកអត្តឃាតបានបំផ្ទុះគ្រាប់បែកនៅជិតមន្ត្រីយោធារដ្ឋាភិបាលម្នាក់ដែលឈររង់ចាំគេបើកទ្វារបន្ទាយឲ្យចូលទៅខាងក្នុងនោះ ។ មនុស្សជាច្រើននាក់បានស្លាប់ និងរងរបួសយ៉ាងរដូករណែល ខណៈដែលសម្ភារនៅបរិវេណនោះត្រូវភ្លើងឆាបឆេះរោលរាលជុំវិញកន្លែងវាយប្រហារនេះ ។
ក្នុងរយៈពេលចុងក្រោយនេះ កងកម្លាំងសន្តិសុខអាហ្វាហ្គានីស្ថានតែងទទួលរងការលបវាយឆ្មក់ និងបំផ្ទុះគ្រាប់បែកបណ្តាលឲ្យបាត់បង់ជីវិតជាបន្តបន្ទាប់ បើទោះបីមានការជំរុញជាអន្តរជាតិឲ្យរដ្ឋាភិបាល និងក្រុមឧទ្ទាមអិស្លាមជ្រុលនិយមតាលីបង់ បន្តដំណើរការពិភាក្សាសន្តិភាពដែលអាក់ខានកាលពីឆ្នាំមុននោះឡើងវិញ។
ក្រសួងមហាផ្ទៃអាហ្វហ្គានីស្ថានបានចេញសេចក្តីប្រកាសព័ត៌មានថា «ជាលទ្ធផលនៃការវាយប្រហារនេះមនុស្ស២០នាក់បានបាត់បង់ជីវិត និង២៩នាក់ផ្សេងទៀតបានរងរបួស» ។
មន្ត្រីជាន់ខ្ពស់រដ្ឋាភិបាលបានបញ្ជាក់ប្រាប់ AFP ថា ជនរងគ្រោះបាត់បង់ជីវិតភាគច្រើនជាប៉ូលិស ។ មានទាហានតែ៣នាក់ប៉ុណ្ណោះបានរងរបួសធ្ងន់ ហើយបានបាត់បង់ជីវិតនៅក្នុងមន្ទីរពេទ្យ ។ ក្រសួងសុខាភិបាលបានអះអាងថា ជនរងគ្រោះភាគច្រើនទទួលរងរបួសនៅត្រង់ដើមទ្រូង ។
ក្រុមឧទ្ទាមតាលីបង់បានប្រកាសទទួលស្គាល់ការវាយប្រហារខាងលើនេះ ។ អ្នកនាំពាក្យក្រុមឧទ្ទាម Zabihullah Mujahid ប្រកាសនៅលើបណ្តាញទំនាក់ទំនងសង្គមធ្វើធើថា ប៉ូលិស៤០នាក់បានស្លាប់ និងរងរបួស ។
ការវាយប្រហារខាងលើនេះបានកើតឡើងមុនការចាប់ផ្តើមជួបពិភាក្សាជាលើកទី៣របស់ប្រទេសទាំង៤ ដើម្បីរកចំណុចស្របមួយដើម្បីឲ្យទីក្រុងកាប៊ូលជួបចរចាពិភាក្សាដោយផ្ទាល់ជាមួយក្រុមអិស្លាមជ្រុលនិយម ។
គណៈប្រទេសប្រទេសអាហ្វហ្គានីស្ថាន ប៉ាគីស្ថាន ចិន និងអាមេរិក នៅថ្ងៃទី៦ ខែកុម្ភៈ ឆ្នាំ២០១៦ នៅទីក្រុងអិស្លាម៉ាបាដ មានគម្រោងជួបពិភាក្សាដើម្បីស្វែងការជួបពិភាក្សាដោយផ្ទាល់របស់រដ្ឋាភិបាលជាមួយនឹងក្រុមអិស្លាមជ្រុលនិយមតាលីបង់ និងឈានដល់ការបញ្ចប់អំពើហិង្សា ដែលចូលមកដល់ឆ្នាំទី១៥ហើយនោះ ។
ក្រុមឧទ្ទាមតាលីបង់បានបង្កើនសកម្មភាពវាយប្រហារទៅលើរដ្ឋាភិបាល និងគោលដៅទៅលើជនបរទេសនៅក្នុងប្រទេសអាហ្វហ្គានីស្ថានផងដែរនៅក្នុងរដូវរងានេះ ខណៈដែលការវាយប្រហារមានការថមថយចុះមកនោះ ។ ការវាយប្រហារនេះធ្វើឲ្យមានការព្រួយបារម្ភខ្លាចស្ថានការណ៍សន្តិសុខកាន់តែអាក្រក់ខ្លាំងឡើង ៕
ប្រែសម្រួល៖ ថាច់ យ៉ាត