ខេត្តស្វាយរៀង៖កូនប្រុសអកត្តញ្ញូម្នាក់បានយក ដែកឆាបចាក់សម្លាប់ឪពុកបង្កើតរបស់ខ្លួនបណ្តាលឲ្យស្លាប់ភ្លាមៗយ៉ាងអាណោចអាធ័ម ដោយសារតែខឹងឪពុកស្តីឱ្យរឿងសាកថ្មទូរស័ព្ទច្រើនដងពេក ។ ហេតុការណ៍នេះបានកើតឡើងកាលពីវេលាម៉ោង៨និង២០នាទីយប់ ថ្ងៃទី១៣ ខែកក្កដា ឆ្នាំ២០១៥ នៅចំណុចភូមិតាសេក ឃុំគគី ស្រុករមាសហែក ខេត្តស្វាយរៀង ។
លោកសំ សំអុល អធិការនគរបាលស្រុករមាសហែកបានឱ្យដឹងថា ជនសង្ស័យ ឈ្មោះ សុខ ភាត ហៅ ទៀក អាយុ ១៩ ឆ្នាំ មិនពិតប្រាកដ(ទើបត្រឡប់មកពីធ្វើការនៅប្រទេសថៃ) មានទីលំនៅភូមិ ឃុំ កើតហេតុ ។ រីឯជនរងគ្រោះ ឈ្មោះ សុខ ទិត អាយុ៥០ឆ្នាំ មុខកសិករ ។
ក្រោយពីចាក់សម្លាប់ឪពុករួចមក ជនសង្ស័យជាកូនក៏បានរត់គេចខ្លួនបាត់ស្រមោលហើយ កំពុងត្រូវបានសមត្ថកិច្ចតាមស្វែងរកចាប់ខ្លួនដើម្បីមកផ្ដន្ទាទោសតាមច្បាប់ ៕ យឹម សុថាន
