ម៉ាឡេស៊ី៖ អតីតរដ្ឋមន្ត្រីក្រសួងហិរញ្ញវត្ថុម៉ាឡេស៊ីលោក Lim Guan Eng ត្រូវបានចាប់ឃុំខ្លួនដើម្បីបើកការស្រាវជ្រាវពាក់ព័ន្ធនឹងគម្រោង ផ្លូវក្រោមបាតសមុទ្រមានតម្លៃជាង១,៥ពាន់លានដុល្លារ។
សារព័ត៌មាន SCMP បានផ្សាយថា នៅក្នុងសេចក្តីប្រកាសរបស់គណៈកម្មការប្រឆាំងអំពើពុករលួយម៉ាឡេស៊ី (MACC) បានឲ្យដឹងថា លោក Lim Guan Eng ត្រូវប្រឈមនឹងការសម្រេចសាលក្រម៣ផ្សេងគ្នា តាមច្បាប់ប្រឆាំងអំពើពុករលួយរបស់ម៉ាឡេស៊ី។ រយៈពេលកន្លងមក លោក Lim Guan Eng បានផ្តល់ព័ត៌មានដើម្បីបម្រើការស្រាវជ្រាវ របស់(MACC) ពាក់ព័ន្ធគម្រោងផ្លូវក្រោមបាតសមុទ្រនៅ Penang។
គម្រោងផ្លូវក្រោមដីត្រូវបានចុះហត្ថលេខាដោយលោក Lim Guan Eng ពេលកាន់តំណែងជាអភិបាលរដ្ឋPenang ក្នុងដំណាក់កាលឆ្នាំ២០០៨ដល់ឆ្នាំ២០១៨ ពាក់ព័ន្ធគម្រោងធ្វើផ្លូវ Metro និងផ្លូវក្រោមដីឆ្លងកាត់Penang។
នៅក្នុងការដេញថ្លៃកាលពីឆ្នាំ២០១៣ គម្រោងសាងសង់បានទៅលើក្រុមហ៊ុន Zenith Construction របស់ម៉ាឡេស៊ី និងក្រុមហ៊ុនសាងសង់សំណង់ប៉េកាំង។ ក្រោយមកក្រុមហ៊ុនម៉ាឡេស៊ីបានទិញភាគហ៊ុនពីក្រុមហ៊ុនចិនវិញ។ នៅពេលនេះក្រុមហ៊ុន ផ្លូវដែកចិនបានទទួលបន្ទុកបច្ចេកទេសទិញសម្ភារ៕
