ភ្នំពេញ ៖ បុរសជាជនជាតិចិនម្នាក់បើករថយន្តឡិចស៊ីសRX300 រវល់តែចុចទូរស័ព្ទមិនបានមើលមុខ ក៏បានជ្រុលចង្កូតទៅបុកកង់រថយន្តហ៊ីយ៉ាន់ដាយពីចំហៀងដែលកំពុងបត់ បណ្តាលឱ្យបែកកង់រថយន្តរបស់ខ្លួន និងរងការខូចខាតផ្នែកខាងមុខ ។ ហេតុការណ៍នេះបានកើតឡើងកាលពីវេលាម៉ោង៦នឹង៥០នាទីយប់ ថ្ងៃទី២ខែកុម្ភៈ ឆ្នាំ២០១៦ នៅចំណុចស្តុប៣០មែត្រ តាមបណ្តោយផ្លូវវេងស្រេង កែងនឹងផ្លូវ៣០ម៉ែត្រ ស្ថិតក្នុងសង្កាត់ស្ទឹងមានជ័យ ខណ្ឌមានជ័យ ។
តាមសាក្សីដែលបានឃើញហេតុការណ៍នេះបានឱ្យដឹងថា នៅមុនពេលកើតហេតុគេបានឃើញរថយន្តហ៊ីយ៉ានដាយធនធំមួយគ្រឿង បើកតាមបណ្តោយផ្លូវវេងស្រេង ទិសដៅពីកើតទៅលិច ពេលមកដល់ចំណុចស្តុបខណះពេលភ្លើងស្តុបខៀវ ក៏បានបត់ស្តាំបំណងទៅផ្លូវ៣០ម៉ែត្រ ។ ពេលកំពុងបត់ស្រាប់តែមានបុរសជនជាតិចិនបើករថយន្តឡិចស៊ីស៣០០ ពណ៍ស ពាក់ស្លាកលេខ ភ្នំពេញ 2AH-0515 ជិះមកពីក្រោយរវល់តែចុចទូរស័ព្ទមិនបានមើលមុខ បានបុកកង់រថយន្តហ៊ីយ៉ានដាយពីចំហៀង ពេញទំហឹង បណ្តាលឱ្យផ្ទុះបែកកង់ឡិចស៊ីស និងរងការខូចខាតផ្នែកខាងមុខ ។ បន្ទាប់ពីកើតហេតុគេសង្កេតឃើញបុរសជនជាតិចិនមិនបានចុះពីលើរថយន្តដើម្បីធ្វើការដោះស្រាយជាមួយភាគីរថយន្តហ៊ីយ៉ានដានោះទេ គឺនៅតែចុចទូរស័ព្ទធ្វើដូចជាមិនមានរឿងអីកើតឡើងចឹង បង្កឱ្យមានការកកស្ទះចរាចរណ៍យ៉ាងខ្លាំង ។
ក្រោយពេលកើតហេតុភ្លាមៗ សមត្ថកិច្ចមូលដ្ឋានបានចុះទៅដល់កន្លែងកើតហេតុ និងបានធ្វើការសម្រួលដើម្បីកុំឱ្យមានការកកស្ទះចរាចរណ៍ និងបានទំនាក់ទំនងទៅសមត្ថកិច្ចឱ្យយករថយន្តទាំង២គ្រឿងទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញ រង់ចាំដោះស្រាយនាពេលក្រោយ ៕ដោយ៖ជីម ភារ៉ា ដង្កោ
