ភ្នំពេញ៖ បន្ទាប់ពីរយៈពេល ១៨ខែនៃការផ្តល់ការបណ្តុះបណ្តាលជំនាញបាល់ទាត់សម្រាប់កីឡាករវ័យក្មេងកម្ពុជាណាហ្គាវើលបេះដូងសប្បុរសបានរៀបចំការប្រកួតបាល់ទាត់មិត្តភាពក្នុងចំណោមកីឡាករវ័យក្មេងទាំងនោះ។ ការប្រកួតបាល់ទាត់មិត្តភាពនេះបានធ្វើឡើងនៅថ្ងៃទី ៣០ ខែមករាឆ្នាំ ២០១៦ នៅសាលាអនុវិទ្យាល័យព្រៃវែងស្ថិតក្នុងខណ្ឌដង្កោរាជធានីភ្នំពេញ។ មានក្រុមចំនួន៤ដែលបានចូលរួមក្នុងការប្រកួតបាល់ទាត់មិត្តភាពនេះ គឺវិទ្យាល័យពងទឹកវិទ្យាល័យព្រៃវែងវិទ្យាល័យត្រពាំងសាលានិងក្រុមកីឡាករមកពីសាលាបណ្តុះបណ្តាលបាល់ទាត់ណាហ្គាវើល។
លោក James Maនាយកផ្នែកទំនាក់ទំនងបុគ្គលិក និងការងារសង្គមណាហ្គាវើល បានមានប្រសាសន៍ថា “ការអភិវឌ្ឍវិស័យកីឡា គឺមានសារសំខាន់ដើម្បីសុខភាពល្អ និងធ្វើឲ្យមានវិន័យល្អសម្រាប់ក្មេងជំនាន់ក្រោយ។ ដើម្បីឲ្យការរួមចំណែករបស់យើងកាន់តែទូលំទូលាយណាហ្គាវើលបេះដូងសប្បុរសបានផ្តួចផ្តើមបង្កើតកម្មវិធី “បណ្តុះបណ្តាលបាល់ទាត់” ដើម្បីបណ្តុះបណ្តាជំនាញបាល់ទាត់ដល់កុមារកម្ពុជាតាមរយៈការផ្តល់នូវគ្រូបង្វឹកនិងសម្ភារៈកីឡា។ បន្ថែមពីលើកម្មវិធីបណ្តុះបណ្តាលបាល់ទាត់នេះណាហ្គាវើលបេះដូងសប្បុរសបានឧបត្ថម្ភបាល់ទាត់ និងបាល់ទះជាង ៦០០បាល់ដល់សាលាបឋមសិក្សាវិទ្យាល័យ និងអង្គការមិនមែនរដ្ឋាភិបាលចំនួន ៨៧ ដើម្បីជួយសម្រួលដល់កម្មវិធី និងសកម្មភាពកីឡារបស់ពួកគេ។ បន្ទាប់ពីរយៈពេល ១៨ខែនៃការអនុវត្តការបណ្តុះបណ្តាលបាល់ទាត់នេះ វាពិតជាបានផ្តល់នូវលទ្ធផលល្អប្រសើរសម្រាប់ការខិតខំប្រឹងប្រែងរបស់យើងនៅពេលយើងឃើញថាកីឡាករវ័យក្មេងកម្ពុជារបស់យើងលេងបានយ៉ាងល្អនៅលើទីលានបាល់ទាត់ដោយប្រើជំនាញដែលបានរៀនពីការបណ្តុះបណ្តាលបាល់ទាត់របស់យើង។ ភាពល្អប្រសើរនេះជម្រុញលើកទឹកចិត្តយើងកាន់តែប្រឹងប្រែងបន្ថែមទៀតនៅពេលអនាគត។ ការប្រកួតមិត្តភាពទាំងនេះត្រូវបានរៀបចំក្នុងស្មារតីយកចំណងមិត្ដភាពជាចម្បង។ យើងក៏សប្បាយរីករាយណាស់ផងដែរដែលឃើញការប្រកួតនេះបានប្រព្រឹត្តទៅប្រកបដោយលក្ខណៈវិជ្ជាជីវៈ និងបែបកីឡា”។
លោកបានបន្ថែមទៀតថា “រហូតមកដល់បច្ចុប្បន្ននេះ កម្មវិធីបណ្តុះបណ្តាលបាល់ទាត់របស់យើងបានផ្តល់ផលប្រយោជន៍ដល់កីឡាករវ័យក្មេងកម្ពុជាប្រមាណជា ៤០០នាក់ នៅតាមបណ្តាខេត្តមួយចំនួន និងរាជធានីភ្នំពេញផងដែរ។ តាមរយៈកម្មវិធីបណ្តុះបណ្តាលបាល់ទាត់នេះ វានឹងជួយអភិវឌ្ឍកីឡាបាល់ទាត់ ដែលជាកីឡាដ៏ល្បីមួយក្នុងប្រទេសកម្ពុជាក៏ដូចជាអភិវឌ្ឍកីឡាផ្សេងៗទៀតឲ្យមានភាពល្អប្រសើរឡើងមួយកំរិតទៀត។ យើងសង្ឃឹមថាកីឡាករបាល់ទាត់វ័យក្មេងរបស់យើងនឹងក្លាយជាកីឡាករអាជីពនៅពេលអនាគត”។
លោក គឺម ឃីដែលជាគ្រូនាយកវិទ្យាល័យពងទឹកបានមានប្រសាសន៍ថា “ជាមួយការអនុវត្តកម្មវិធីបណ្តុះបណ្តាលបាល់ទាត់ដែលផ្តល់ដោយណាហ្គាវើលបេះដូងសប្បុរសសិស្សរបស់យើងបានរៀនជំនាញមូលដ្ឋានក្នុងការលេងបាល់ទាត់ដូចជាបច្ចេកទេសទទួលបាល់ ការគ្រប់គ្រងបាល់ ការហុចបាល់ឲ្យគ្នាការស៊ុតបាល់បញ្ជូលទី និងច្បាប់នៃការប្រកួតជាដើម។ ថ្ងៃនេះកីឡាករអាចអនុវត្តចំណេះដឹងរបស់ពួកគេដែលបានរៀនពីការបណ្តុះបណ្តាល និងយកមកអនុវត្តជាមួយក្រុមផ្សេងៗទៀតមកពីសាលារៀនដទៃ។ ការប្រកួតកីឡាបាល់ទាត់មិត្តភាពដែលរៀបចំឡើងដោយណាហ្គាវើលបេះដូងសប្បុរស គឺពិតជាកម្មវិធីមួយដ៏ល្អប្រសើរ ពីព្រោះវាជួយបង្កើតទំនាក់ទំនងដ៏រឹងមាំក្នុងចំណោមកីឡាកររបស់យើងជាមួយកីឡាករក្រុមផ្សេងៗទៀតមកពីសាលាផ្សេងៗគ្នា។ ខ្ញុំបានសង្កេតឃើញថា កីឡាកររបស់យើងសប្បាយរីករាយណាស់ដែលបានចូលរួមនៅក្នុងការបណ្តុះបណ្តាលបាល់ទាត់ដែលផ្តល់ដោយណាហ្គាវើលបេះដូងសប្បុរស។ ជាពិសេសយើងសង្ឃឹមថាណាហ្គាវើលបេះដូងសប្បុរស នឹងនៅតែបន្តផ្តល់ការបណ្តុះបណ្តាលបាល់ទាត់សម្រាប់កីឡាកររបស់យើងទៀត។ យើងសូមថ្លែងអំណរគុណដល់ណាហ្គាវើលបេះដូងសប្បុរសសម្រាប់ការរៀបចំនិងការផ្តល់ការបណ្តុះបណ្តាល និងសម្ភារៈកីឡា”។
ប៉ែន ដេវីត កីឡាករមកពីក្រុមសាលាត្រពាំងសាលា បាននិយាយថា “កាលពីមុនខ្ញុំបានលេងបាល់ទាត់ដោយមិនដឹងពីរបៀបលេងឲ្យបានត្រឹមត្រូវ។ ប៉ុន្តែបន្ទាប់ពីខ្ញុំបានចូលរួមក្នុងការបណ្តុះបណ្តាលបាល់ទាត់ដែលផ្ដល់ដោយណាហ្គាវើលបេះដូងសប្បុរស ខ្ញុំដឹងពីរបៀបលេងនិងលេងបានយ៉ាងល្អទៀតផង។ លើសពីនេះទៀតការប្រកួតបាល់ទាត់មិត្តភាពគឺសំខាន់ណាស់ចំពោះពួកយើង។ វាផ្ដល់ឱកាសសម្រាប់ពួកយើងដើម្បីអនុវត្តនូវអ្វីដែលយើងត្រូវបានរៀន។ តាំងនាមឲ្យកីឡាករទាំងអស់ខ្ញុំសូមថ្លែងអំណរគុណយ៉ាងជ្រាលជ្រៅដល់ណាហ្គាវើលបេះដូងសប្បុរសសម្រាប់ការរៀបចំការប្រកួតបាល់ទាត់មិត្តភាព និងការបណ្តុះបណ្តាលបាល់ទាត់ដល់ពួកយើង”។
ពីសី ណាលី កីឡាករមកពីក្រុមអនុវិទ្យាល័យព្រៃវែង បាននិយាយថា “ខ្ញុំសប្បាយចិត្តខ្លាំងណាស់ដែលបានជួបជុំគ្នានៅសាលាអនុវិទ្យាល័យព្រៃវែងដើម្បីចូលរួមនៅក្នុងការប្រកួតកីឡាបាល់ទាត់មិត្តភាពដែលរៀបចំដោយណាហ្គាវើលបេះដូងសប្បុរស។ ថ្ងៃនេះខ្ញុំរំភើបខ្លាំងណាស់ពីព្រោះខ្ញុំបានស្គាល់កីឡាករជាច្រើនពីសាលាផ្សេងគ្នា។ យើងបានរៀនពីគ្នាទៅវិញទៅមកតាមរយៈការប្រកួតទាំងនេះ។ យើងសូមថ្លែងអំណរគុណដល់ណាហ្គាវើលបេះដូងសប្បុរសដែលធ្វើឲ្យជំនាញលេងបាល់របស់យើងមានភាពល្អប្រសើរជាងមុន។ ខ្ញុំសូមអរគុណដល់ណាហ្គាវើលបេះដូងសប្បុរសម្តងទៀត ហើយសង្ឃឹមថាពួកគេនឹងផ្តល់នូវការបណ្តុះបណ្តាលបន្ថែមទៀតសម្រាប់កីឡាករវ័យក្មេងដទៃទៀតនៅពេលអនាគត”៕
ដោយ៖ ស ដារ៉ា
