ភ្នំពេញ៖ នៅព្រឹកថ្ងៃទី១៤ ខែកក្កដា ឆ្នាំ២០១៥ នៅទីស្តីការក្រសួងការបរទេស និងសហប្រតិបត្តិការអន្តរជាតិ មានរៀបចំពិធីប្រគល់រថយន្ត និងទូរស័ព្ទដៃដែលជាអំណោយរបស់សាធារណរដ្ឋប្រជាមានិតចិន ក្រោមអធិបតីភាពលោកឧបនាយករដ្ឋមន្ត្រីហោ ណាំហុង រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ និងលោកស្រីអគ្គរដ្ឋទូតសាធារណរដ្ឋប្រជាមានិតចិនប្រចាំនៅកម្ពុជា។
នៅក្នុងពិធីនេះ លោកស្រីឯកអគ្គរដ្ឋទូតចិនប្រចាំនៅកម្ពុជាបានប្រគល់រថយន្តម៉ាកទូយ៉ូតា ហ៊ិឡិចវីហ្គោ៣គ្រឿង និងរថយន្តទូយ៉ូតូ កាស្ត្រូ១គ្រឿង រួមទាំងទូរស័ព្ទដៃ ម៉ាក Ascend P7 Huawei ៤៥គ្រឿង ។
លោកឧបនាយករដ្ឋមន្ត្រៅហោ ណាំហុង បានមានប្រសាសន៍ថា ខ្ញុំពិតជាមានការរីករាយណាស់ដែលបានជួបលោកស្រីឯកអគ្គរដ្ឋទូតសាធារណរដ្ឋប្រជាមានិតចិន ក្នុងពិធី ប្រគល់រថយន្ត៤គ្រឿង និងទូរស័ព្ទដៃ៤៥គ្រឿងឲ្យមកក្រសួងការបរទេស ពិតជាមានផលប្រយោជន៍ណាស់សម្រាប់មន្ត្រីក្រសួង ដើម្បីឲ្យមន្ត្រីរបស់យើងមានលទ្ធផលងាយស្រួលធ្វើដំណើរទៅឆ្ងាយ ឬក៏ចូលរួមក្នុងពិធីផ្សេងៗនៅរាជធានីភ្នំពេញ ។
គួររំលឹកថា ប្រទេសចិនតែងតែផ្តល់ជំនួយ និងធ្វើវិនិយោគ ផ្តល់ប្រាក់កម្ចី អត់ការប្រាក់ កម្ចីសម្បទាន ជាច្រើនលើសលប់ក្នុងវិស័យជាច្រើនដល់កម្ពុជា ដើម្បីកសាងសេដ្ឋកិច្ចសង្គមរបស់កម្ពុជា ។ ក្នុងឆ្នាំកន្លងមកនេះ ជាឆ្នាំដែលមេដឹកនាំប្រទេសកម្ពុជា និងថ្នាក់ដឹកនាំប្រទេសចិនបានប្តូរទស្សនកិច្ចគ្នាទៅវិញទៅមុខជាច្រើនដើម្បីរឹតចំណងមិត្តភាពដ៏យូរលង់ ស្និទ្ធិស្នាល ព្រមទាំងសហប្រតិបត្តិការប្រកបដោយផ្លែផ្កា និងសកម្មរវាងប្រទេសយើងទាំងពីរ ៕ សុខ ខេមរ៉ា
