លោក តុប សំ ជាប់ជាក្រុមប្រឹក្សាជាតិប្រឆាំង អំពើពុករលួយ និងលោកស្រី ម៉ែន សំអន ជាប់ជាអនុប្រធាន

ចែករំលែក៖

ភ្នំពេញ ៖ កាលពី​រសៀល​ថ្ងៃទី​១៣ ខែកក្កដា ឆ្នាំ​២០១៥  ក្រុមប្រឹក្សា​ជាតិ​ប្រឆាំង​អំពើពុក​រលួយ បាន​ធ្វើការបោះឆ្នោត​ជ្រើសរើស​ប្រធាន និង អនុប្រធាន សម្រាប់​អាណត្តិ​ទី​២ របស់ខ្លួន ដែល មាន​រយៈពេល ៥ ឆ្នាំ​ម្តងនោះ ដែល​ក្នុងនោះ បង្ហាញថា លោក​តុ​ប សំ ដែលជា​អតីត​ប្រធាន​ ក្រុម​ប្រឹក្សាជាតិ ប្រឆាំង​អំពើពុករលួយ ត្រូវបាន​សមាជិក​ក្រុមប្រឹក្សា​នេះ បោះឆ្នោត​គាំទ្រ​ឲ្យធ្វើជា ប្រធាន​ដឹកនាំ​ស្ថាប័ន​នេះ​ដដែល រីឯ​លោកស្រី​ឧប​នាយករដ្ឋមន្ត្រី ម៉ែន សំអន ក៏​ត្រូវបាន​បោះឆ្នោត គាំទ្រ​ឲ្យក្លាយជា អនុប្រធាន​ ​។​
យោងតាម​ច្បាប់ នៃ​ក្រុម​ប្រឹក្សាជាតិ​ប្រឆាំង អំពើពុករលួយ អាណត្តិ​ការដក​ពី​តំណែង និង​ការជំនួស​តំណែង សមាជិក​ទាំងអស់ នៃ​ក្រុម​ប្រឹក្សាជាតិ ប្រឆាំង​អំពើពុករលួយ ត្រូវបានតែងតាំង ដោយ​ព្រះរាជក្រឹត្យ សម្រាប់​រយៈពេល​៥ ឆ្នាំ​។ អាណត្តិ​នេះ អាច​ត្រូវ​បន្ត​ជាថ្មី​។ ការជ្រើសរើស​តាំង​ប្រ​ឆាន និង​អនុប្រធាន នៃ​ក្រុមប្រឹក្សា​នេះ ត្រូវ​ជ្រើសរើស​ដោយ ការបោះឆ្នោត​ពី សមាជិក​របស់ខ្លួន តាម​សម្លេង ភាគច្រើន​ដាច់ខាត ដែល​ត្រូវធ្វើឡើង ក្នុងសម័យ​ប្រជុំ​លើក​ទី​១ តាម​ការកោះអញ្ជើញ របស់​សមាជិក ដែលមាន​វ័យចាស់​ជាងគេ​។ សមាជិក​នៃ​ក្រុមប្រឹក្សា​នេះ រួម​សរុប​មាន​ចំនួន ១១ រូប ក្នុង​ចំនួន​នេះ មន្ត្រី​ដែល​អាច​បន្ត​អាណត្តិ​ជាថ្មី នៃ​ក្រុមប្រឹក្សា​ប្រឆាំង​អំពើពុករលួយ មាន​ចំនួន ៨ រូប ឯ​បី​រូប​បាន​ត្រូវ​ផ្លាស់ប្តូរ​។ ដោយឡែក សមាជិក​ថ្មី ដែល​ចូល​ជំនួស សមាជិក​ចាស់​នេះ គេ​ឃើញ​មាន​លោកស្រី ឧបនាយករដ្ឋមន្ត្រី ម៉ែន សំអន រដ្ឋ​មន្ត្រីក្រសួង​ទំនាក់ទំនង រដ្ឋសភា ព្រឹទ្ធសភា និង​អធិការកិច្ច លោក​អង្គ វង្សវឌ្ឍានា រដ្ឋមន្ត្រី​ក្រសួងយុត្តិធម៌ និង​លោក​យ៉េត ចរិយា ព្រះរាជអាជ្ញា​សាលាដំបូង​រាជធានី​ភ្នំពេញ​។ សម្រាប់​សមាជិក​ចាស់ នៃ​ក្រុមប្រឹក្សា​នេះ ដែល​នៅ​ដឹកនាំ ស្ថាប័ន​នេះ​បន្តទៀត រួមមាន លោក​គុយ សុផល លោក​លី ណា​រុន លោក​តុ​ប សំ លោកស្រី សោម គីម​សួគ៌ លោក​ហេង វង្សប៊ុនឆាត លោក​ស៊ុយ ម៉ុង​លាង លោក​កែវ រ៉េមី និង លោក​ឱម យ៉ិនទៀង​។

​បន្ទាប់ពី​ជាប់ឆ្នោត ថ្នាក់ដឹកនាំ​កំពូល​នៃ​ស្ថាប័ន​នេះ​គឺ លោក​តុ​ប សំ និង​លោកស្រី​ឧបនាយករដ្ឋមន្ត្រី ម៉ែន សំអន នឹងត្រូវ​រង់​​ចាំ​ព្រះរាជក្រឹត្យ​ពី​ព្រះមហាក្សត្រ ដើម្បី​ក្លាយជា​ថ្នាក់ដឹកនាំ​ស្ថាប័ន​ក្រុមប្រឹក្សា​ជាតិ​ប្រឆាំង​ អំពើពុករលួយ សម្រាប់​អាណត្តិ​ទី​២ ដែលជា​អាណត្តិ​ថ្មី​បន្តទៀត​។​គួរបញ្ជាក់ដែរថាលទ្ធផល​នៃ​ការបោះឆ្នោត ដែល​រៀបចំឡើង នៅក្នុង​អង្គភាព​ប្រឆាំង​អំពើពុករលួយ បាន​បង្ហាញថា ក្នុងចំណោម​សមាជិក​ទាំង ១១ រូប​នៃ​ស្ថាប័ន​កំពូល​មួយ​នេះ លោក​តុ​ប សំ ដែលជា​បេក្ខជន​ឈរឈ្មោះ  ប្រធាន​ក្រុម​ប្រឹក្សាជាតិ ប្រឆាំង​អំ​​ពើ​ពុករលួយ ទទួល​ស​ម្លេ​ងគាំទ្រ ១១ សម្លេង លើ ១១ សម្លេង​។ ចំណែក​លោកស្រី ឧបនាយករដ្ឋមន្ត្រី ម៉ែន សំអន ដែល​បាន​ឈរ​ឈ្មោះ​ជា​អនុប្រធាន ក្រុម​ជាតិ​ប្រឆាំង​អំពើពុករលួយ ក៏បាន​ទទួល​សម្លេងឆ្នោត​គាំទ្រ ១១ សម្លេង​លើ ១១ សម្លេង​ដូចគ្នា​៕  វឌ្ឍនា

IMG_0527

IMG_0528

IMG_0529

...

 


ចែករំលែក៖
ពាណិជ្ជកម្ម៖
ads2 ads3 ambel-meas ads6 scanpeople ads7 fk Print