អន្តរជាតិ៖ ទីបំផុត អតីតនាយករដ្ឋមន្ត្រីម៉ាឡេស៊ី មហាធៀ មហាម៉ាត់ បានសម្រេចដាក់ឈ្មោះគណបក្សដែលលោកទើបបង្កើតថ្មីថ្មោងថា«Pejuang» ដែលមានន័យថា «អ្នកប្រយុទ្ធ» ។មិនតែប៉ុណ្ណោះអតីតនាយករដ្ឋមន្ត្រីម៉ាឡេស៊ីរូបនេះ បានអះអាងថា ការបង្កើតបក្សនេះ គឺចេញពីស្មារតីប្រឆាំងអំពើពុករលួយ។
លោក មហាធៀ មហាម៉ាត់ និយាយប្រាប់អ្នកគាំទ្ររបស់លោក នៅក្នុងរដ្ឋ Perak កាលពីថ្ងៃទី ១២ ខែសីហា ថ្មីៗនេះថា «យើងមិនចង់បំបែកបំបាក់ប្រជាជនម៉ាឡេ តែយើងចង់ឲ្យម៉ាឡេមានបក្សនយោបាយ ដែលប្រយុទ្ធដើម្បីពួកគេ។ បក្សនេះ គឺមានគោលដៅបោសសម្អាតអំពើពុករលួយក្នុងប្រទេស។ យើងដាក់ឈ្មោះវាថា Parti Pejuang Tanah Air (បក្សអ្នកប្រយុទ្ធដើម្បីប្រជាជាតិ)»។
លោក មហាធៀ បានអះអាងថា បក្សនេះ ត្រូវបានបង្កើតឡើងចេញពីស្មារតីចង់ដឹងចង់ឮ និងចាំបាច់ដើម្បីប្រយុទ្ធប្រឆាំងអំពើពុករលួយដែលកំពុងបំផ្លិចបំផ្លាញប្រជាជាតិម៉ាឡេស៊ី។ អតីតនាយករដ្ឋមន្ត្រីវ័យ៩៥ឆ្នាំនេះ បានសង្កត់ធ្ងន់ក្នុងសេចក្តីថ្លែងការណ៍មួយដែលបង្ហោះលើបណ្ដាញសង្គម Facebook លោកផ្ទាល់ថា៖ «ប្រសិនបើអ្នកចង់បានតួនាទី និងលុយកាក់ រើសយកបក្សផ្សេង។ [តែ] ប្រសិនបើអ្នកចង់ស្ដារភាពថ្លៃថ្នូ និងការពារសិទ្ធិ រើសយកបក្សយើង ។ រើសយកបក្ស Pejuang»។
តាមការចុះផ្សាយរបស់ទូរទស្សន៍សិង្ហបុរី Channel News Asia បក្សថ្មីរបស់លោក មហាធៀ ដែលនឹងដឹកនាំដោយកូនប្រុស Mukhriz ក្នុងនាមជាប្រធាន ហើយលោក មហាធៀ ផ្ទាល់ ជាប្រធានជាន់ខ្ពស់ គឺមិនភ្ជាប់សម្ព័ន្ធភាពជាមួយទាំង សម្ព័ន្ធនយោបាយ Pakatan Harapan (PH) ដែលដឹកនាំដោយលោក Anwar Ibramhim ឬសម្ព័ន្ធនយោបាយ Perikatan Nasional (PN) ដែលដឹកនាំដោយនាយករដ្ឋមន្ត្រីម៉ាឡេស៊ីបច្ចុប្បន្ន Muhyiddin Yassin នោះឡើយ។
សូមជម្រាបថា នៅក្នុងអំឡុងសន្និសីទព័ត៌មានប្រកាសការបង្កើតបក្សកាលពីសប្ដាហ៍មុន លោកបណ្ឌិត មហាធៀ បានគូសបញ្ជាក់ថា បក្សថ្មីលោក គឺបង្កើតឡើងដោយម៉ាឡេ និងដើម្បីម៉ាឡេ ហើយនឹងផ្ដោតសំខាន់លើការប្រយុទ្ធប្រឆាំងអំពើពុករលួយ និងធានាថា ម៉ាឡេស៊ីក្លាយជាខ្លាអាស៊ីម្ដងទៀត ។
គួរបញ្ជាក់ថា នាយករដ្ឋមន្ត្រីកាន់តំណែង២លើករបស់ម៉ាឡេស៊ីរូបនេះ បានប្រកាសដំណឹងពាក់ព័ន្ធការបង្កើតបក្សនយោបាយថ្មីមួយ កាលពីសប្តាហ៍មុន តែពុំបានបញ្ជាក់ឈ្មោះឡើយពេលនោះ។ ទោះមិនទាន់ចុះឈ្មោះផ្លូវការនៅឡើយ សមាជិកសភាម៉ាឡេស៊ី ៦នាក់ និងព្រឹទ្ធសភាម្នាក់ ដែលសុទ្ធតែកូនចៅចាស់របស់លោក រង់ចាំចូលរួមជាមួយបក្សថ្មីនេះ។ ហើយលោក មហាធៀ ដែលបង្កើតបក្ស Bersatu ក្នុងឆ្នាំ២០១៦បានដឹកនាំសម្ព័ន្ធនយោបាយ PH យកជ័យជម្នះក្នុងការបោះឆ្នោតទូទៅ កាលពីខែឧសភា ឆ្នាំ២០១៨។
ក្រោយខ្វែងគំនិតគ្នាជាមួយប្រធានបក្ស Bersatu លោក Muhyiddin រឿងចង់ចងសម្ព័ន្ធថ្មីជាមួយបក្សអង្គការជាតិម៉ាឡេរួមរួប (UMNO) របស់លោកអតីតនាយករដ្ឋមន្ត្រី ណាជីប លោក មហាធៀ ត្រូវបានបណ្ដេញចេញពីបក្សខ្លួនបង្កើតផងដែរ៕ ដោយ៖ស តារា
