អន្តរជាតិ៖ បន្ទាប់ពីទីក្រុងចំនួន២ នៅប្រទេសចិន បានរកឃើញកូរ៉ូណាវីរុស នៅលើសាច់មាន់ និងជាប់អាហារក្លាសេដែលនាំចូលពីប្រទេសប្រេស៊ីល ។ ស្រាប់តែនៅថ្ងៃទី១៤ ខែសីហា ម្សិលមិញនេះ រដ្ឋាភិបាលហ្វីលីពីន បានសម្រេចដាក់បម្រាមបណ្ដោះអាសន្នលើការនាំចូលសាច់មាន់ពីប្រទេសប្រេស៊ីល ។
ជាក់ស្ដែង នៅក្នុងសេចក្តីថ្លែងការណ៍របស់ក្រសួងកសិកម្មហ្វីលីពីន បានបញ្ជាក់ថា ក្រោយមានរបាយការណ៍កាលពីថ្មីៗនេះពីប្រទេសចិនរដ្ឋាភិបាលសម្រេចឃាត់ការនាំចូលសាច់មាន់ពីប្រទេសប្រេស៊ីលជាបណ្ដោះអាសន្ន។ ក្រសួងសង្កត់ធ្ងន់ថា នេះគឺអនុលោមតាមច្បាប់សុវត្ថិភាពចំណីអាហារ ដើម្បីការពារអ្នកប្រើប្រាស់និងអាជីវកហ្វីលីពីន។
ប៉ុន្តែទោះបីយ៉ាងណា ក្រសួងកសិកម្មហ្វីលីពីន ពុំបានបញ្ជាក់រយៈពេលនៃការដាក់បម្រាមនេះឡើយ ហើយការនាំចូលសាច់មាត់ពីប្រទេសប្រេស៊ីល ស្មើនឹង២០ភាគរយនៃការនាំចូលសាច់ពីបរទេសសរុប។ ព្រោះប្រេស៊ីល ជាប្រទេសរងគ្រោះខ្លាំងលំដាប់ទី២លើពិភលោកដោយសារជំងឺរាតត្បាតសកល COVID-19 បន្ទាប់ពីសហរដ្ឋអាមេរិក ដែលមានករណីឆ្លងជាង៣,២លានករណីនិងស្លាប់ជាង១០ម៉ឺននាក់ចាប់តាំងពីផ្ទុះដំបូងមក។
បើតាមការចុះផ្សាយរបស់ទីភ្នាក់ងារព័ត៌មាន Reuters បាននិយាយថា ក្រសួងកសិកម្មហ្វីលីពីន បានធានាចំពោះមុខប្រជាជនហ្វីលីពីនថាផលិតផលសាច់មាន់ក្នុងទីផ្សារហ្វីលីពីនបច្ចុប្បន្នគឺមានសុវត្ថិភាពសម្រាប់ទទួលទាន។ ដោយការដាក់ចេញបម្រាមនេះ ធ្វើឡើងក្រោយអាជ្ញាធរក្រុងសិនជិន នៅថ្ងៃទី១៣ ខែសីហា រាយការណ៍ថា ខ្លួនបានរកឃើញកូរ៉ូណាវីរុស មានជាប់នៅស្លាបមាន់ក្លាសេ ដែលនាំចូលមកពីប្រេស៊ីល។ មុននេះមួយថ្ងៃ ទីក្រុងអ៊ូហ៊ូ ក៏ប្រកាសពីការរកឃើញកូរ៉ូណាវីរុសនៅលើកញ្ចប់បង្គានាំចូលពីអេក្វាឌ័រដែរ។
ដោយឡែកសម្រាប់អង្គការសុខភាពពិភពលោក(WHO)វិញ នៅថ្ងៃទី១៣ ខែសីហាកន្លងទៅ ក៏បានលើកឡើងថា គ្មានភស្តុតាងណាមួយបានបង្ហាញថា កូរ៉ូណាវីរុសអាចឆ្លងពីអាហារទៅមនុស្សបានទេ។ ប៉ុន្តែតាមការចុះផ្សាយរបស់ទីភ្នាក់ងារព័ត៌មាន Reuters និយាយថា វីរុសអាចមានជីវិតរហូតដល់ទៅ២ឆ្នាំ ក្នុងសីតុណ្ហភាព –២០អង្សាសេឯណ្ណោះ តែមន្ត្រីជំនាញថា គ្មានភស្តុតាងរឹងមាំណាមួយ បង្ហាញថា កូរ៉ូណាវីរុសអាចឆ្លងពីអាហារមកមនុស្សនោះទេ។
គួរបញ្ជាក់ថា បើតាមប្រធានកម្មវិធីអាសន្នរបស់ WHO លោក Mike Ryan បានថ្លែងនៅក្នុងសន្និសីទកាសែតមួយថា៖ « ប្រជាជន មិនគួរខ្លាចអាហារ កញ្ចប់អាហារ ឬការដឹកជញ្ជូនអាហារឡើយ» ព្រោះយើង គ្មានឡើយភស្តុតាង ដែលបង្ហាញថា អាហារ ឬចង្វាក់ផលិតកម្ម គឺមានពាក់ព័ន្ធនឹងករណីឆ្លងនៃកូរ៉ូណាវីរុស៕ដោយ៖ស តារា
