អន្តរជាតិ៖ បន្ទាប់ពីករណីឆ្លង COVID-19 នៅប្រទេសបារាំងកើនឡើងជាថ្មីនោះ ស្រាប់តែនៅថ្ងៃទី១៤ ខែសីហាម្សិលមិញនេះ រដ្ឋាភិបាលបារាំង បានប្រកាសដាក់ទីក្រុងប៉ារីស និងតំបន់ Bouches-du-Rhone ដែលនៅជុំវិញទីក្រុង Marseille ជាតំបន់ឆ្លងCOVID-19 កម្រិតខ្ពស់ជាថ្មី ។
ជាក់ស្តែងនៅថ្ងៃទី១៣ ខែសីហាកន្លងទៅថ្មីៗនេះ អាជ្ញាធរបារាំង បានរាយការណ៍ថា មានករណីឆ្លងថ្មីចំនួន ២៦៦៩ករណី និងអ្នកស្លាប់១៧ករណី។ ទីក្រុងប៉ារីស និងទីក្រុង Marseille បានបង្ខំឲ្យប្រជាជនពាក់ម៉ាស់ នៅកន្លែងមានមនុស្សច្រើន។ ព្រោះមួយរយៈពេលចុងក្រោយនេះ ករណីឆ្លង COVID-19 នៅបារាំង បានកើនឡើងខ្លាំងសារជាថ្មី ។
បើតាមការចុះផ្សាយរបស់ទីភ្នាក់ងារ Reuters បាននិយាយថា៖ ការដាក់ទីក្រុងប៉ារីស និងតំបន់ Bouches-du-Rhone នេះ ជាតំបន់គ្រោះថ្នាក់កម្រិតខ្ពស់ គឺអាចបង្កឲ្យប៉ះពាល់យ៉ាងខ្លាំងដល់វិស័យទេសចរណ៍ ។
គួរបញ្ជាក់ថា រដ្ឋាភិបាលបារាំង បានចេញអនុក្រិត្យមួយ ដោយដាក់ទីក្រុងបារីស និងតំបន់ Bouches-du-Rhone ជា«តំបន់ក្រហម»។ តំបន់ក្រហមនេះ គឺជាតំបន់ ដែលមានករណីឆ្លងកម្រិតខ្ពស់។ តាមរយៈអនុក្រិត្រដដែលនេះ អាជ្ញាធរតំបន់ មានអំណាច ក្នុងការរឹតត្បិតការធ្វើដំណើររបស់ប្រជាជន, ប្រព័ន្ធដឹកជញ្ជូនសាធារណៈ, ការកម្រិតចំនួនមនុស្សចូលអាគារសាធារណៈ និងមានសិទ្ធិបិទកន្លែងមួយចំនួនទៀតដែលមានអត្រាឆ្លងកម្រិតខ្ពស់។
សូមជម្រាបដែរថា កន្លងមកចក្រភពអង់គ្លេស បានដាក់បារាំង និងប្រទេសមួយចំនួនទៀត ក្នុងបញ្ជីចត្តាឡីស័ក។ បានន័យថា រាល់អ្នកដំណើរដែលត្រលប់មកពីបារាំងទាំងអស់ ត្រូវដាក់ចត្តាឡីស័ករយៈពេល ១៤ថ្ងៃ។ បើគិតត្រឹមថ្ងៃទី១៣ ខែសីហា បារាំងមានករណី COVID-19 សរុបចំនួនជិត ២១ម៉ឺន អ្នកស្លាប់ជាង ៣ម៉ឺននាក់ និងអ្នកជាសះស្បើយមានចំនួនជាង ៨ម៉ឺននាក់៕ដោយ៖ស តារា
