ខ្សែប្រយុទ្ធអន្តរជាតិវេលរបស់ក្លិប Real Madrid កីឡាករ Gareth Bale បាននិយាយថាគាត់នឹងបើកចំហរក្នុងការវិលត្រឡប់មកកាន់ក្របខ័ណ្ឌ Premier League ប៉ុន្តែបានទទូចថា រហូតមកដល់ពេលនេះក្លិប Real Madrid បានរារាំងការប៉ុនប៉ងរបស់គាត់ក្នុងការចាកចេញ។ នេះជាការថ្លែងទៅកាន់ទូរទស្សន៍ Sky Sport ពេល Bale បំពេញភារកិច្ចអន្តរជាតិជាមួយវេលអំពីអនាគតរបស់គាត់នៅជើងឯក La Liga ។

ទំនាក់ទំនងមិនល្អរបស់កីឡាករវ័យ៣១ឆ្នាំជាមួយគ្រូបង្វឹក Real Madrid គឺលោក Zinedine Zidane ត្រូវបានគេដឹងយ៉ាងច្បាស់និងត្រូវបានបញ្ជាក់យ៉ាងច្បាស់នៅពេលដែល Zidane បានដាក់គាត់ឲ្យលេងតែ២ដងក្នុងចំណោម ១២ ប្រកួតដែលក្រុមរបស់គាត់លេងនៅពេលបាល់ទាត់អេស្ប៉ាញបានចាប់ផ្តើមឡើងវិញកាលពីខែមិថុនាបន្ទាប់ពីផ្អាកដោយសារកូវីដ-១៩។

នៅពេលសួរថា តើគាត់នឹងវិលត្រឡប់ទៅកាន់ប្រទេសអង់គ្លេសនៅពេលអនាគត កីឡាករ Bale បានឆ្លើយតបថា “ប្រសិនបើជម្រើសទាំងនោះកើតឡើងវាគឺជាអ្វីដែលខ្ញុំត្រូវមើលឱ្យប្រាកដ” ។

កុងត្រារបស់គាត់ជាមួយ Real Madrid នឹងត្រូវបញ្ចប់នៅខែមិថុនា ឆ្នាំ២០២២ ប៉ុន្តែ Bale បានបដិសេធមិនព្រមផ្លាស់ប្តូរការផ្លាស់ប្តូរនៅរដូវក្តៅនេះ ឬខែមករាខាងមុខនោះទេ។

ខ្សែប្រយុទ្ធរូបនេះបានបន្ថែមថា “យើងនឹងឃើញមានអ្វីកើតឡើង យើងមានពេលវេលាច្រើននៅក្នុងការដោះដូរកីឡាករ ហើយដល់ពេលវេលាខ្ញុំនឹងប្រាប់ ដែលការសម្រេចចិត្តគឺស្ថិតនៅក្នុងដៃរបស់ Real Madrid”។

កីឡាកររូបនេះបានបន្តថា “មានករណីផ្សេងទៀតដែលយើងបានព្យាយាមទៅ ប៉ុន្តែក្លិបនឹងមិនអនុញ្ញាតឲ្យខ្ញុំបានធ្វើអ្វីមួយទេ។ ខ្ញុំចង់លេងបាល់ទាត់ ខ្ញុំនៅតែមានទឹកចិត្តក្នុងការលេងបាល់ទាត់ ដូច្នេះខ្ញុំគិតថាវាស្ថិតនៅលើក្លិប។ ពួកគេគ្រប់គ្រងអ្វីៗគ្រប់យ៉ាង ខ្ញុំមានកិច្ចសន្យា ទាំងអស់ដែលខ្ញុំអាចធ្វើបានគឺអនុវត្តនូវអ្វីដែលខ្ញុំកំពុងធ្វើ ហើយសង្ឃឹមថាមានអ្វីមួយកើតឡើងនៅពេលខាងមុខ” ៕

ដោយ៖ ភារៈ