លោក​អូ​ស្មាន​ ហា​ស្សាន់​ ជូ​ប​គណៈ​ដឹកនាំ​ជាន់ខ្ពស់​អិ​ស្លា​ម​ ត្រៀម​ជ្រើសរើស​គ្រូបង្រៀន​ខ្មែរអិស្លាម​១.៥០០​នាក់​ ដើម្បី​បញ្ចូល​បេក្ខភាព​ទៅ​ក្នុង​ក្របខ័ណ្ឌ​រដ្ឋ​

ចែករំលែក៖

ភ្នំពេញ​៖​ លោក​អូ​ស្មាន​ ហា​ស្សាន់​ ប្រតិភូ​អម​នាយក​រដ្ឋមន្ដ្រី​ រដ្ឋលេខាធិការ​ក្រសួង​ការងារ​ និង​បណ្ដុះ​ បណ្ដាល​វិជ្ជាជីវៈ​ និង​ជា​ប្រធាន​អង្គការ​មូលនិធិ​អភិវឌ្ឍន៍​មុ​ស្លិ​ម​កម្ពុជា​ បាន​កោះ​ប្រជុំ​ជា​បន្ទាន់​ ជាមួយ​ គណៈ​ចាងហ្វាង​ ដឹកនាំ​ជាន់ខ្ពស់​ នៃ​សាសនា​ឥ​ស្លា​ម​ ប្រមាណ​ជាង​ ៦៥​រូប​ ដើម្បី​ពិភាក្សា​ត្រៀម​ជ្រើស​ រើស​ បេក្ខភាព​ គ្រូបង្រៀន​ ឥ​ស្លា​ម​ចំនួន​១៥០០​នាក់​ ចូល​ទៅ​ក្នុង​ក្រប​ខណ្ឌ​ ក្រសួង​អប់រំ​ យុវជន​ និង​កីឡា​ បន្ទាប់​ពី​រាជរដ្ឋាភិបាល​កម្ពុជា​ បាន​សម្រេច​អនុញ្ញាត​ ជា​គោលការណ៍​ ឲ្យ​បញ្ចូល​ គ្រូបង្រៀន​សាសនា​ឥ​ស្លា​ម​ ដែល​សាសនា​ស្លា​ម​ហៅ​ថា​ តួន​ ចំនួន​ប្រមាណ​ ១៥០០​នាក់​ ទៅ​ក្នុង​ក្រប​ខណ្ឌ​គ្រូបង្រៀន​ នៃ​ក្រសួង​អប់រំ​ យុវជន​ និង​កីឡា​ ព្រមទាំង​បាន​អនុញ្ញាត​ឲ្យ​ បងប្អូន​សាសនិក​ឥ​ស្លា​ម​ អាច​ពាក់​កាតឹប​ និង​ទទូរ​ក្បាល​ ថតរូប​ធ្វើ​លិខិត​ស្នាម​ផ្សេងៗ​នោះ​រួច​មក​ សហគមន៍​ខ្មែរឥស្លាម​ នៅ​ទូ​ទាំង​ប្រទេស​ បាន​សាទរ​យ៉ាង​ខ្លាំង​ ព្រម​ជាមួយ​ក្តី​រំភើប​ឥត​ឧបមា​ រក​អ្វី​មក​ប្រៀបផ្ទឹម​ពុំ​បាន​។​

​លោក​អូ​ស្មាន​ ហា​ស្សាន់​ បាន​បញ្ជាក់​ឲ្យ​ដឹង​បែប​នេះ​ ក្នុង​ឱកាស​បើក​កិច្ចប្រជុំ​ត្រៀម​ជ្រើសរើស​បេ​ខ​ក្ខ​ភាព​គ្រូបង្រៀន​ឥ​ស្លា​ម​ដែល​មាន​សមត្ថភាព​ខ្ពស់​ ចូល​ទៅ​ក្នុង​ក្រប​ខណ្ឌ​រដ្ឋ​ នា​រសៀល​ថ្ងៃ​ទី​១៤​ ខែ​ក​ក្ដ​ដា​ ឆ្នាំ​២០១៥​ នៅ​ទីស្នាក់ការ​គណៈ​ដឹកនាំ​ជាន់ខ្ពស់​ នៃ​សាសនា​ឥ​ស្លា​ម​ ខណ្ឌ​ឬ​ស្សី​កែវ​ រាជធានី​ភ្នំពេញ​ ។​

​លោក​ អូ​ស្មាន​ ហា​ស្សាន់​ បាន​បញ្ជាក់​ថា​៖​ ការ​ផ្តល់​ជូន​ពី​សំណាក់​រាជរដ្ឋាភិបាល​នេះ​ គឺជា​អំណោយ​ដ៏​ធំ​បំផុត​ដែល​នឹក​ស្មាន​មិន​ដល់​ ហើយ​ជា​អំណោយ​មួយ​សម្រាប់​ដោះ​ទុក្ខ​កង្វល់​របស់​យើង​ទាំងអស់​គ្នា​។​ កន្លង​មក​ រាជរដ្ឋាភិបាល​បាន​ផ្តល់​ជូន​ច្រើន​មក​ហើយ​ សម្រាប់​សហគមន៍​ខ្មែរឥស្លាម​ ដែល​នេះ​សបញ្ជាក់​ពី​ការ​យកចិត្តទុកដាក់​ ការ​អាណិត​ស្រលាញ់​ស្មើៗ​គ្នា​មិន​រើសអើង​ មិន​ប្រកាន់ពូជសាសន៍​។​ នេះ​គឺជា​កិច្ចការ​របស់​យើង​ទាំងអស់​គ្នា​ មិនមែន​តែ​ជា​កិច្ចកា​របស់​ថ្នាក់ដឹកនាំ​ខាងលើ​នោះ​ទេ​។​ សូម​ឲ្យ​អ៊ី​ម៉ាំៗ​ទាំងអស់​ត្រូវ​ស្រង់​ស្ថិតិ​តួនៗ​ទាំងអស់​ ដែល​កំពុង​បង្រៀន​បច្ចុប្បន្ន​ រួម​ទាំង​តួនៗ​ដែល​កំពង់​បង្រៀន​តាម​ផ្ទះ​ផង​ដែរ​ សម្រាប់​ភូមិ​ខ្លះ​ដែល​នៅ​ខ្វះខាត​សាលារៀន​ ។​ ត្រូវ​សហការ​គ្នា​ធ្វើការ​ប្រកប​ ដោយ​ភាព​ស្មោះត្រង់​ និង​ឲ្យ​បាន​លឿន​ទាន់​ពេលវេលា​ពីព្រោះ​ រាជរដ្ឋាភិបាល​បាន​កំណត់​ផ្តល់​ប្រាក់​បៀរ​វត្សរ៍​ជូន​ចាប់ផ្តើម​ពី​ខែសីហា​ឆ្នាំ​២០១៥​ខាង​មុខ​នេះ​តទៅ​ ។​

​លោក​ ហ្សា​ការី​យ៉ា​ អា​ដាម​ ចាងហ្វាង​រង​ នៃ​គណៈ​ដឹកនាំ​ជាន់ខ្ពស់​ នៃ​សាសនា​ឥ​ស្លា​ម​កម្ពុជា​ បាន​បញ្ជាក់​ថា​៖​ មាន​តែ​គ្រូបង្រៀន​សាសនា​ឥ​ស្លា​ម​នៅ​តាម​សហគមន៍​ ដែល​កំពុង​បង្រៀន​ក្រោម​ការ​ឧបត្ថម្ភ​ដោយ​ ថវិកា​ ហ្សា​កាត់​ និង​ការ​រៃ​អង្គាស​ពី​ប្រជាពលរដ្ឋ​ទេ​ ដែល​នឹង​ត្រូវ​បញ្ចូល​ក្នុង​ក្រប​ខណ្ឌ​រដ្ឋ​ ។​ លោក​ បាន​បន្ត​ថា​៖​ ការ​សម្រេច​របស់​រាជរដ្ឋាភិបាល​នេះ​គឺ​ ធ្វើ​ឡើង​ក្នុង​គោលបំណង​កាត់​បន្ថយ​ភាព​ក្រីក្រ​ របស់​ប្រជាជន​ ក៏​ដូច​ជា​ការ​លើកកម្ពស់​ គុណភាព​អប់រំ​ ផង​ដែរ​ ។​ ដោយហេតុ​ថា​ កន្លង​មក​គ្រូបង្រៀន​សាសនា​ឥ​ស្លា​ម​ ពុំ​មាន​ប្រាក់បៀវត្សរ៍​ទេ​ មាន​តែ​ប្រាក់​ឧបត្ថម្ភ​បន្តិចបន្តួច​ ដែល​បាន​មក​ពី​ថវិកា​ហ្សា​កាត់​ និង​ការ​រៃ​អង្គាស​ពី​អ្នក​ភូមិ​ ទៅ​តាម​សទ្ធា​ ជា​ហេតុ​ធ្វើ​ឲ្យ​ទាំង​គ្រូបង្រៀន​ និង​អ្នក​ភូមិ​ មាន​ជីវភាព​ដុនដាប​ ដែល​ធ្វើ​ឲ្យ​គុណភាព​អប់រំ​ក៏​ខ្សត់ខ្សោយ​ទៅ​តាម​នោះ​ដែរ​។​ និយាយ​ឲ្យ​ចំ​ គឺ​រាជរដ្ឋាភិបាល​ ចង់​ដោះ​បន្ទុក​នៃ​ការ​រៃ​អង្គាស​ ពី​សំណាក់​ប្រជាពលរដ្ឋ​ ដើម្បី​ឧបត្ថម្ភ​គ្រូបង្រៀន​ ក្នុង​ករណី​ដែល​គ្រូបង្រៀន​សាសនា​ ក៏​មានគុណ​បំណាច់​សម្រាប់​ប្រទេស​ជាតិ​ ក៏​ដូច​ជា​រាជរដ្ឋាភិបាល​ដែរ​នោះ​។​

​លោក​ក៏​បាន​រំលឹក​ឡើង​វិញ​ថា​​ បញ្ហា​ប្រាក​បៀរ​វត្សរ៍​គ្រូបង្រៀន​សាសនា​ឥ​ស្លា​ម​ គឺជា​ក្តី​កង្វល់​របស់​លោក​ផ្ទាល់​ ក៏​ដូច​ជា​ថ្នាក់ដឹកនាំ​ដ៏​ទៃ​ទៀត​ ដែល​កន្លង​មក​ អស់​រយៈពេល​ជា​ច្រើន​ឆ្នាំ​មក​ហើយ​ ដែល​លោក​ បាន​ស្វះស្វែង​ស្នើ​សុំ​ នៅ​ស្ទើ​គ្រប់​ច្រកល្ហក​ នៅ​ក្រៅប្រទេស​ តែ​ជា​លទ្ធផល​ មិន​បាន​ដូច​បំណង​ឡើយ​ ។​ ប៉ុន្តែ​ចុង​ក្រោយ​នេះ​ រាជរដ្ឋាភិបាល​ ដែល​មាន​សម្តេច​តេ​ជោ​នាយក​រដ្ឋមន្ត្រី​ ជា​ប្រមុខ​ បាន​សម្រេច​យល់ព្រម​លើ​ការ​ស្នើ​សុំ​ របស់​លោក​ ក្នុង​នាម​គណៈ​ដឹកនាំ​ជាន់ខ្ពស់​នៃ​សាសនា​ឥ​ស្លា​ម​កម្ពុជា​ រួម​ជាមួយ​ លោក​ អូ​ស្មាន​ ហា​ស្សាន់​ ក្នុង​នាម​ជា​ប្រធាន​អង្គការ​មូលនិធិ​អភិវឌ្ឍន៍​ម​ស្លិ​ម​កម្ពុជា​ លើស​ពី​ការ​ចង់បាន​ ដែល​ធ្វើ​ឲ្យ​លោក​សប្បាយចិត្ត​ហួសប្រមាណ​រហូត​ទប់ទឹក​ភ្នែក​មិន​បាន​។​ លោក​ចាងហ្វាង​ក៏​បាន​ផ្តាំផ្ញើ​ទៅ​គណៈ​អ៊ី​ម៉ាំ​ទាំងអស់​ ត្រូវ​ក្តាប់​ឲ្យ​បាន​នូវ​បញ្ជី​ឈ្មោះ​តួនៗ​ណា​ ដែល​ត្រូវ​បញ្ចូល​ឈ្មោះ​ទៅ​ក្នុង​ក្រប​ខណ្ឌ​ ហើយ​រាល់​តួនៗ​ទាំងអស់​ ត្រូវ​មាន​លិខិត​ស្នាម​ ឬ​ឯកសារ​ផ្លូវការ​នានា​ សម្រាប់​សម្គាល់​ខ្លួន​ផង​ដែរ​ ៕​ សំរិត

1

2

3

4

5


ចែករំលែក៖
ពាណិជ្ជកម្ម៖ Naza Wedding Planner ads2 ads3 ambel-meas ads5 ads6 scanpeople ads7 fk Print