អន្តរជាតិ៖ ប្រជាជនហុងកុងចំនួន ១២នាក់ ត្រូវបានអាជ្ញាធរចិន ឃាត់ខ្លួន ខណៈដែលពួកគេកំពុងជិះទូកទៅកាន់កោះតៃវ៉ាន់ ដើម្បីស្វែងរកសិទ្ធិជ្រកកោននយោបាយ ហើយអ្នកទាំងនោះ នឹងត្រូវកាត់ទោសដោយតុលាការចិន មិនមែននៅហុងកុងឡើយ។ ប៉ុន្តែរដ្ឋាភិបាលហុងកុងនឹងបញ្ជូនតំណាងមេធាវីទៅជួយសម្របសម្រួល។ នេះបើតាមការអះអាងពីប្រមុខដឹកនាំហុងកុង លោកស្រី ការី ឡាំ បានបញ្ជាក់កាលពីថ្ងៃទី៨ ខែកញ្ញាម្សិលមិញនេះ ។
សូមជម្រាបថា ប្រជាជនហុងកុងចំនួន ១២នាក់ ដែលប៉ុនប៉ងរត់គេចទៅកាន់កោះតៃវ៉ាន់ ដើម្បីទទួលបានសិទ្ធិជ្រកកោននយោបាយ បន្ទាប់ពីច្បាប់សន្តិសុខជាតិហុងកុង បានចូលជាធរមាន ក៏ត្រូវបានអាជ្ញាធរចិននៃខេត្តគ័ងតុង ឃាត់ខ្លួននៅឆ្នេរនៃខេត្តភាគខាងត្បូង កាលពីថ្ងៃទី២៣ខែសីហាកន្លងទៅ ។ ប៉ុន្តែបើទោះបីជាអ្នកទាំង១២នាក់នោះ ជាពលរដ្ឋហុងកុងមែន ហុងកុងមិនទទួលខុសត្រូវលើបញ្ហានេះឡើយ ព្រោះស្ថិតក្រោមយុត្តាធិការរបស់ចិន។
បើតាមទីភ្នាក់ងារព័ត៌មាន Reuters ដកស្រង់សម្តីលោកស្រីការី ឡាំ ប្រធានប្រតិបត្តិទីក្រុងហុងកុង ថ្លែងនៅក្នុងសន្និសីទសារព័ត៌មាននៅថ្ងៃទី៨ ខែកញ្ញាម្សិលមិញនេះថា៖ «ប្រសិនបើប្រជាជនហុងកុងត្រូវបានចាប់ខ្លួន ដោយសារបំពានច្បាប់ចិនដីគោក អ្នកទាំងនោះ ត្រូវតែដោះស្រាយទៅតាមច្បាប់ចិនគោក និងផ្អែកតាមប្រព័ន្ធយុត្តាធិការចិន មុនពេលមានអ្វីផ្សេងទៀតកើតឡើង»។ ប៉ុន្តែទោះយ៉ាងណាក៏ដោយរដ្ឋាភិបាលហុងកុង នឹងបញ្ជូនតំណាងមេធាវីទៅជួយអ្នកទាំងនោះ។
លោកស្រីការី ឡាំ បញ្ជាក់ទៀតថា ប្រសិនបើប្រជាជនហុងកុង ត្រូវបានចាប់ដោយសារបទល្មើសណាមួយ ការិយាល័យតំណាងរដ្ឋាភិបាលហុងកុង នៅទីក្រុងគ័ងចូវ នឹងទទួលខុសត្រូវលើបញ្ហានេះ។ ប៉ុន្តែទីភ្នាក់ងារព័ត៌មានAFP បានចុះផ្សាយនៅថ្ងៃទី៧ ខែកញ្ញាថ្មីៗនេះថា មេធាវីមួយចំនួន ដែលតំណាងឲ្យអ្នកត្រូវបានចាប់ខ្លួនទាំងនោះ បានបដិសេធមិនតំណាងឲ្យពួកគេឡើយ។
គួរបញ្ជាក់ថា អ្នកដែលត្រូវបានចាប់ខ្លួនទាំង ១២នាក់នោះ មិនត្រូវបានគេបញ្ចេញអត្តសញ្ញាណទេ ប៉ុន្តែសារព័ត៌មានក្នុងស្រុក បានចុះផ្សាយថា អ្នកទាំងនោះ ជាប់ពាក់ព័ន្ធការធ្វើបាតុកម្មនៅក្នុងឆ្នាំ ២០១៩។ ដោយការចាប់ខ្លួននេះ ត្រូវបានឆ្មាំសមុទ្រខេត្តគ័ងតុង ប្រកាសនៅលើបណ្តាញសង្គមរបស់ខ្លួន នៅថ្ងៃទី២៦ ខែសីហា។
សូមជម្រាបផងដែរថា បច្ចុប្បន្នតៃវ៉ាន់ បានក្លាយជាគោលដៅស្វែងមួយរបស់សកម្មជនហុងកុងដែលចង់រត់គេចខ្លួនពីការរំលោភបំពាននៅហុងកុង។ ដែនកោះ ថែមទាំងបង្កើតការិយាល័យមួយទទួលបន្ទុកប្រជាជនហុងកុងដែលសុំសិទ្ធិជ្រកកោនផងដែរ។ បណ្ដាប្រទេសប៉ែកអឺរ៉ុបនិងអូស្ត្រាលីជាដើម ក៏ជាគោលដៅភៀសខ្លួនដែរ៕ដោយ៖ស តារា
