ប្រទេសជប៉ុន៖ បើតាមការចេញផ្សាយនៅមុននេះបន្តិច ដោយសារព័ត៌មាន CNA នារសៀលថ្ងៃពុធ ទី១៦ ខែកញ្ញា ឆ្នាំ២០២០ បានបញ្ជាក់ឱ្យដឹងថា៖ នៅទីបំផុតលោក ស៊ូហ្គា យ៉ូស៊ីហ៊ីដេ (Suga Yoshihide) ត្រូវសភាជប៉ុន បោះឆ្នោតគាំទ្រឲ្យធ្វើជានាយករដ្ឋមន្ត្រីថ្មីហើយ បន្ទាប់ពីការប្រកាសលាលែងចេញពីតំណែងជាផ្លូវការ របស់លោក អាបេ ស៊ីនហ្សូ កាលពីប៉ុន្មានម៉ោងមុននេះ។
សូមបញ្ជាក់ថា៖ លោក អាបេ ស៊ីនហ្សូ (Shinzo Abe) បានប្រកាសលាលែងចេញពីតំណែងនាយករដ្ឋមន្ត្រីជប៉ុន ជាផ្លូវការ ព្រមទាំងបានសម្រេចរំលាយគណៈរដ្ឋមន្ត្រីផងដែរ ដើម្បីត្រួសត្រាយផ្លូវឲ្យអ្នកបន្តវេនពីលោក ឡើងមកដើម្បីទទួលការគាំទ្រពីសភា និងរៀបចំរដ្ឋាភិបាលថ្មី។ នេះបើតាមការចេញផ្សាយនៅមុននេះបន្តិច ដោយសារព័ត៌មាន CBS News នាព្រឹកថ្ងៃពុធ ទី១៦ ខែកញ្ញា ឆ្នាំ២០២០។
នៅក្នុងសេចក្តីប្រកាសលាលែងចេញពីតំណែងជាផ្លូវការ នៅចំពោះមុខកិច្ចប្រជុំគណៈរដ្ឋមន្ត្រីនេះ លោក អាបេ បានលើកឡើងយ៉ាងដូច្នេះថា «ខ្ញុំបានលះបង់ដួងព្រលឹង និងរូបកាយរបស់ខ្ញុំ ស្តាវិស័យសេដ្ឋកិច្ច និងការទូតឡើងវិញ ដើម្បីការពារផលប្រយោជន៍ប្រជាជនជប៉ុន នៅគ្រប់ពេលវេលាទាំងអស់ ចាប់តាំងពីយើងបានត្រឡប់មកកាន់អំណាចវិញ»៕

ដោយ៖ សិលា