ភ្នំពេញ៖ កីឡាករ គង់ ហ៊ូវមកពីក្លិបកងពលធំអន្តរាគមន៍លេខ២ត្រូវជួបប្រកួតជាមួយកីឡាករ យិន បូរិន អ្នកប្រដាល់ក្លិបអាស៊ីកីឡា ខណៈដែលកីឡាករ ឡាញ់ ផល្លា សិស្សលោកអេភូថងប៉ះ ម៉ឺន ដា មកពី ក្លិបខ្លារខិនមានប្ញទ្ធិ ដើម្បីវាយដណ្តើមកៅអីជុំទី៣បន្តឡើងទៅវគ្គពាក់កណ្តាលផ្តាច់ព្រ័ត្រនាល្ងាចថ្ងៃអាទិត្យទី១៤ខែកុម្ភៈឆ្នាំ២០១៦នៅលើសង្វៀនទូរទស្សន៍ប៉ុស្តិ៍លេខ៥។
ជំនួបប្រកួតដំណាក់កាលទី២រវាងគង់ ហ៊ូវ និង យិន បូរី ពួកគេសុទ្ធតែជាអ្នកឈ្នះក្នុងវគ្គជម្រុះ៣២នាក់ដំណាក់កាលទី១ដូចគ្នា ប៉ុន្តែនៅក្នុងប្រវត្តប្រកួតអ្នកទាំង២នាក់មិនធ្លាប់ជួបគ្នាម្តងទេ។ ដោយសារតែកីឡាករ គង់ ហ៊ូវទើបឡើងសង្វៀនក្រោយ យិន បូរិន ។
កីឡាករ គង់ ហ៊ូវ វាយឈ្នះកីឡាករស៊ឹម ប៊ុនឆៃ មកពីក្លិបព្រៃទទឹងខេត្តបាត់ដំបងដោយពិន្ទុកាលពីវគ្គជម្រុះ៣២ដំណាក់កាលទី១ ។ រីឯកីឡាករ យិន បូរិន វាយឈ្នះកីឡាករ សេង ហៀង មកពីក្លិបសុភានូមានជ័យដោយពិន្ទុក្នុងវគ្គជម្រុះជុំទី១ដែរ។ គង់ ហ៊ូវ និង យិន បូរិន ជួបប្រកួតគ្នា នាល្ងាចថ្ងៃអាទិត្យទី១៤នេះ គោលដៅមានតែមួយដូចក្ន គឺគៅអីដំណាក់កាលទី៣ ប៉ុន្តែក្រុមអ្នកតាមដានសកម្មភាពប្រដាល់ក្នុងកម្មវិធី TIFFY SUPER FIGHTនេះ បានអះអាងថា បូរិនទំនងជាមិនឈ្នះគង់ ហ៊ូវ នោះឡើយ ពីព្រោះចាញ់កម្លាំងគង់ ហ៊ូវ និងមានស្នៀតវាយចេញល្អជាងបូរិន។ ដោយឡែកជំនួបប្រកួតរវាងកីឡាករឡាញ់ ផល្លា និង ម៉ឺន ដា ពួកគេទាំង២នាក់ធ្លាប់ជួបគ្នាម្តងកាលណោះ ឡាញ់ ផល្លាឈ្នះម៉ឺន ដាដោយពិន្ទុ ។ ការប្រកួតនេះ បានផ្តលឱកាសឲ្យម៉ឺន ដាបានសងសឹកជាមួយ ឡាញ់ ផល្លាវិញនិង ក៏ជាឱកាសវាយដណ្តើមកៅអីជុំទី៣ផងដែរ។
គួររំលឹកថា កាលពីប្រកួតវគ្គជម្រុះដំណាក់កាលទី១កីឡាករ ម៉ឺន ដា វាយឈ្នះកីឡាករ ជុន សាវុធ មកពីក្លិបពោធិជ័យកីឡាដោយពិន្ទុ រីឯ កីឡាករ ឡាញ់ ផល្លា វាយឈ្នះកីឡាករ សេក ចាន់រាជ របស់ក្លិបអង្គរមានជ័យខេត្តសៀមរាបដោយពិន្ទុផងដែរ។ ដូច្នេះដំណាក់កាលទី២នេះ រវាងម៉ឺន ដានិងឡាញ់ ផល្លា ត្រូវតែមានម្នាក់ដើរចេញពីកម្មវិធីTIFFY SUPER FIGHT មិនខានឡើយ។
សម្រាប់ការប្រកួតកីឡាប្រដាល់ដណ្តើមពានរង្វាន់ TIFFY SUPER FIGHTប្រភេទទម្ងន់៥៧គីឡូក្រាមនេះ មានកីឡាករ៣២នាក់ចូលរួម បានចែកជា ៤ ដំណាក់កាល តាមរូបមន្តប្រកួតម៉ារ៉ាតុង គឺដំណាក់ទី១ជាការប្រកួតជម្រុះក្នុងចំណោម៣២នាក់ ទុកតែ១៦នាក់ ។ ដំណាក់ ទី២ ជម្រុះក្នុងចំណោម១៦នាក់ ទុក៨នាក់ ហើយដំណាក់កាលទី៣ គឺជម្រុះ៤នាក់ចេញទុក៤នាក់ រីឯដំណាក់កាលទី៤និងទី៥ ជាការប្រកួតដំណាក់កាលពាក់កណ្តាលផ្តាច់ព្រ័ត្រនិងផ្តាច់ព្រ័ត្រ៕
ដោយ៖ សារីម
