ភ្នំពេញ៖ យោងតាមហ្វេសប៊ុកផ្លូវការរបស់សណ្ឋាគារ Le Palais នៅប្រទេសថៃធ្វើការសុំទោសចំពោះកំហុស និងបញ្ជាក់ទៀតថាខ្លួនគ្មានចេតនាបំពានលើប្រាសាទ និងវប្បធម៌របស់កម្ពុជាទេ ដែលយករចនាបថប្រាសាទអង្គរវត្ត តុបតែងលម្អនៅសណ្ឋាគារ។
ប្រភពដដែលបន្តថា ការដំណើរការសណ្ឋាគារ ធ្វើឡើងដោយការកោតសរសើរ ចំពោះសិល្បៈដ៏អស្ចារ្យនេះ ។ សំណង់ និងការតុបតែង កើតចេញពីស្នាដៃ និងបេះដូង ដោយក្រុមការងារកម្ពុជា–ថៃ ។ ភាពអស្ចារ្យ នៅតែជារបស់អង្គរវត្ត មិនអាចប្រៀបផ្ទឹមបានឡើយ។
បើតាមការលើកឡើងរបស់អ្នកនាំពាក្យក្រសួងវប្បធម៌ និងវិចិត្រសិល្បៈ លោក ឡុង ប៉ុណ្ណាសិរីរត្ថ បានឱ្យដឹងថា ក្រសួងវប្បធម៌ បានកំពុងសិក្សាពីបញ្ហានេះ។ ដោយឡែកចំពោះការមានចំណាត់ការបែបណា ក្រសួងមិនទាន់បញ្ជាក់នោះឡើយ។ លោកបន្តទៀតថា រដ្ឋាភិបាលនៅតែធ្វើលើគោលការណ៍គតិយុទ្ធជាតិ-អន្តរជាតិ ការចចារ និងការដែលត្រូវជជែកផ្ដល់ជាមតិយោបល់ បើសិនមានចំណុចវិជ្ជមានណាមួយ។
យោងតាមកាសែតបាងកកប៉ុស្តិ៍ សណ្ឋាគារ Le Palais បានបង្កើតឡើងកាលពីឆ្នាំ២០១៤ ដោយប្តីជនជាតិបារាំង និងប្រពន្ធជនជាតិខ្មែរ បានចូលភាគហ៊ុនជាមួយអ្នកវិនិយោគថៃ ដើម្បីកសាងសណ្ឋាគារ ដែលមានរចនាបទ្មបែបខ្មែរនេះឡើង។
ដោយឡែក លោក Vichai Khongmun ប្រធានសមាគមទេសចរណ៍ នៅខេត្ត Koh Phangan ប្រទេសថៃ យល់ឃើញថា ការកសាងសណ្ឋាគារ ដោយយករចនាបទ្មអង្គរវត្តនេះ គឺជារឿងល្អទៅវិញទេ សម្រាប់កម្ពុជា។ ដោយលោកបានលើកឡើងថា (រចនាបទ្មសណ្ឋាគារបែបអង្គរវត្ត)នេះ វានឹងជំរុញឲ្យភ្ញៀវទេសចរណ៍ទៅទស្សនាទីតាំងពិតប្រាកដផ្ទាល់តែម្ដង»។
គួរបញ្ជាក់ថា បើយោងតាម Page ដែលមានឈ្មោះថា Amazing SEA Culture បានបង្ហោះលើបណ្ដាញសង្គម ដោយរិះគន់ខ្លាំងៗទៅលើសណ្ឋាគាររបស់ថៃមួយកន្លែង ដែលមានទីទាំងស្ថិតនៅកោះ Ko Pha Ngan ខេត្ត Surat Thani ភាគខាងត្បូងនៃប្រទេសថៃ មានឈ្មោះថា“Le Palais Hotel”បានយករចនាប័ទ្ម នៃសម្បតិ្តបេតិកភណ្ឌពិភពលោកដែលជាកម្មសិទ្ធរបស់ប្រទេសកម្ពុជា ជាច្រើនទៅសង់ឡើងវិញដើម្បីតុបតែងលម្អក្នុងបរិវេណសណ្ឋាគាររបស់ពួកគេ។ ចំពោះរចនាប័ទ្មនៃប្រាសាទរបស់ប្រទេសកម្ពុជាដែលសណ្ឋាគារថៃមួយនេះបានយកទៅសង់ឡើងវិញនោះមានដូចជា៖ រូបចម្លាក់នៃប្រាសាទអង្គរវត្ត ប្រាសាទអង្គរធំ និងប្រាសាទបន្ទាយស្រី ជាដើម ៕ដោយ៖ស តារា
