ភ្នំពេញ៖ រឿងដណ្តើមដីកេរ្តិ៍មរតកបន្សល់ពីឪពុកម្តាយ បានក្លាយជាប្រធានបទមួយគួរឲ្យចាប់ អារម្មណ៍ដែលកើតឡើងរវាង បងថ្លៃ និងប្អូនថ្លៃ រហូតរាលដាលដល់ប្រធានភូមិ ព្រោះតែដីកេរ្តិ៍ មានទំហំ២៤២ម៉ែត្រការ៉េនៅភូមិក្តីចាស់ សង្កាត់បាក់ខែង ខណ្ឌជ្រោយចង្វា ជាកម្មសិទ្ធស្រប ច្បាប់ របស់បងថ្លៃ ត្រូវប្អូនថ្លៃពីរនាក់ឃុបឃិតជាមួយមេភូមិ ធ្វើឯកសារក្លែងក្លាយដណ្តើមយកដីកេរ្តិ៍ដែលឪពុកម្តាយចែកឲ្យគ្មានអៀនខ្មាស ។
លោក រស់ វណ្ណា អាយុ ៤៧ឆ្នាំ រស់នៅលើដីកេរ្តិ៍មានទំហំ២៤២ម៉ែត្រការ៉េ(បណ្តោយ២២មទទឹង១១ម)រស់នៅក្នុងភូមិខាងលើនិងត្រូវជាបងថ្លៃរបស់ឈ្មោះ ប៉ាត់ គ្រឿន និង ប៉ាត់ គ្រី ជាប្អូនបង្កើតរបស់ប្រពន្ធបានឲ្យដឹងថា លោករៀបការជាមួយប្រពន្ធឈ្មោះប៉ាត់ ស្រី អាយុ៣៩ឆ្នាំ តាំងពីក្រោយថ្ងៃរំដោះ៧មករាឆ្នាំ១៩៩៧៩មកម្ល៉េះ ដែលមកដល់ពេលនេះមានកូនពីរនាក់ពេញកំលោះក្រមុំទៅហើយ ។ ក្រោយរៀបការរួចឪពុក ម្តាយក្មេកបានឲ្យរស់នៅជាមួយគាត់លើដីកេរ្តិ៍ខាងលើនេះ ដើម្បីចិញ្ចឹមគាត់ និងប្អូនថ្លៃពីរនាក់ដែលនៅជំទង់មិនទាន់មានគ្រួសារ ។ ចាប់ពីពេលនោះមកគាត់និងប្រពន្ធជាមេគ្រួសារបានប្រឹងប្រែងរកស៊ីចិញ្ចឹមឪពុកម្តាយក្មេកផង ប្អូនថ្លៃពីរនាក់ផង និងរហូតមានកូនដល់ទៅពីររស់នៅក្នុងបន្ទុកទៀត។ មុន ឪពុកម្តាយក្មេកស្លាប់ទៅគាត់បានបែងចែកដីធ្លីផ្សេងឲ្យទៅកូនរបស់គាត់ទាំងអស់រួចទៅហើយជាពិសេសប្អូនថ្លៃពីរនាក់ដែលរស់នៅជាមួយលោកដោយពួកគេមានគ្រួសារទៅរស់នៅលើដីកេរ្តិ៍ រួចរៀងខ្លួនអស់រយៈពេលជាង១០ឆ្នាំមកហើយ ។ ចំណែករូបលោកត្រូវបានឪពុកម្តាយក្មេកប្រគល់ដីនេះធ្វើជាកម្មសិទ្ធផ្ទាល់ខ្លួនជាមួយប្រពន្ធរហូតដល់សព្វថ្ងៃដោយមានលិខិតបញ្ជាក់កម្មសិទ្ធិដីធ្លីពីអាជ្ញាធរដែនដីត្រឹមត្រូវ(លិខិតចុះថ្ងៃទី០៧ខែកក្កដា ឆ្នាំ ២០១០)មានចុះហត្ថលេខាមេភូមិឈ្មោះ គង់ ស៊ិន និងហត្ថលេខាចៅសង្កាត់បាក់ខែងលោក ញឹក ស៊ីផុន ដឹងឮទទួលស្គាល់ត្រឹមត្រូវតាមច្បាប់ផងដែរ ។
លោករស់ វណ្ណា បានឲ្យដឹងទៀតថា លុះមកដល់ថ្ងៃទី២១ខែសីហា ឆ្នាំ២០១០ ប្រពន្ធរបស់គាត់មានជំងឺធ្ងន់ព្យាបាលមិនជាក៏ទទួលមរណភាពទៅដោយទុកឲ្យគាត់រស់នៅជាមួយកូនពីរនាក់មកដល់សព្វថ្ងៃនេះ ។ ប៉ុន្តែអ្វីដែលធ្វើឲ្យលោកហួសចិត្តនោះ គឺនៅពេលដែលគាត់ចង់ដោះដូរដីនេះទៅរស់នៅឆ្ងាយនិងទុកចែករំលែកដល់កូនពីរនាក់គ្រាដែលគេមានប្តី ប្រពន្ធទៅអនាគតនោះ បែរជាប្អូនថ្លៃពីរនាក់(ប៉ាត់ គ្រឿន និង ប៉ាត់គ្រី)ដែលមានដីកេរ្តិ៍ឪពុកម្តាយក្មេកចែករួចទៅហើយនោះ មកទាមទារ យកចំណែកដែរ។លើសពីនេះទៀតពួកគេបានឃុបឃិតជាមួយលោកមេភូមិក្តី ចាស់ លោក គង់ ស៊ិន លួចធ្វើលិខិតក្លែងក្លាយគ្មានចុះថ្ងៃខែនិងចុះហត្ថលេខាមេភូមិរារាំងនិងបដិសេធមិនឲ្យរូបលោកដោះដូរដីនេះបានឡើយ គ្រាដែលលោកមេភូមិទទួលយកឯកសារដោះដូរដីពីរូបគាត់ទៅរត់ការធ្វើប្លង់ជាថ្នូរនឹងប្រាក់២០០ដុល្លារទៅហើយនោះ។
លោករស់ វណ្ណា បានបន្តថា ខ្ញុំមានឯកសារគ្រប់គ្រងដីធ្លី និងឯកសារជាច្រើនទៀតយកមកបង្ហាញលោកមេភូមិ គង់ ស៊ិន ទើបលោកមេភូមិទទួលយកទៅបំពេញបែបបទដោះដូរដីនេះឲ្យខ្ញុំ លុះក្រោយមកមិនត្រឹមតែស៊ីដាច់លុយរត់ការរបស់ខ្ញុំទេ ថែមទាំងប្រាប់ថាបាត់ឯកសារដោះដូរដីនោះអស់ទៀត។ពេលនោះខ្ញុំសុំឲ្យ មេភូមិធ្វើឡើងវិញ តែគាត់មិនព្រមធ្វើទេរួចថែមទាំងទៅឃុបឃិតជាមួយប្អូនថ្លៃធ្វើឯកសារក្លែងក្លាយមិនឲ្យដោះដូរដីនេះបើចង់ដោះដូរ ទាល់តែបែងចែកចំណែកឲ្យឈ្មោះប៉ាត់ គ្រឿន និង ប៉ាត់គ្រី ផង ។ទង្វើនេះខ្ញុំគិតថាលោកមេភូមិច្បាស់ជាបានទទួលលាភសក្ការៈអ្វីមួយ ពីប្អូនថ្លៃទាំងពីរនាក់តែម្តង ។ មួយវិញទៀត បើដឹងថាដីនេះមិនអាចលក់បានទេ ហេតុអីពេលគេមកទិញដីខ្ញុំ គេកក់លុយហើយនោះ លោកមេភូមិថាមិនអី ព្រមទាំងយកឯកសារទៅរត់ការជាមួយថ្នាក់លើធ្វើប្លង់រួចថែមទាំងធ្វើជាសាក្សីដឹងឮផងនោះ?
ទាក់ទងការលើកឡើងរបស់លោក រស់ វណ្ណា ខាងលើនេះ ត្រូវបានលោក គង់ ស៊ិន មេភូមិក្តីចាស់ ប្រាប់ភ្នាក់ងារយកព័ត៌មានតាមទូរស័ព្ទថា ដីនេះមានទំនាស់ជាមួយបងប្អូនពីរនាក់របស់ប្រពន្ធលោក រស់ វណ្ណា ដែលពួកគេទាមទារចំណែកកេរ្តិ៍មរតកពីឪពុកម្តាយរបស់គេ ទើបលោកមិនហ៊ានសម្រេច។ ចំពោះសំណួរ សួរថា តើមានអ្វីជាសំអាង បើលោករស់ វណ្ណា មានលិខិតកាន់កាប់ដីនេះស្របច្បាប់តាំងពីឆ្នាំ២០១០រួចហើយនោះ? មេភូមិបញ្ជាក់ថា កន្លងមកឮថាមាន តែអីឡូវមិនដឹងទៅណាទេ។ រីឯលិខិតបញ្ជាក់កាន់កាប់ដីរបស់លោករស់ វណ្ណា ធ្វើតាំងពីប្រពន្ធមិនទាន់ស្លាប់មែន តែធ្វើសម្រាប់ដាក់ធានាគារយកលុយមើលប្រពន្ធឈឺប៉ុណ្ណោះ ។
នៅមានសំណួរមួយទៀតសួរថា បើដឹងថាដីនេះមានបញ្ហាដែររឿងអីលោកមេភូមិ ទទួលយកលុយ២០០ដុល្លារទៅរត់ការធ្វើប្លង់ឲ្យអ្នកទិញ? លោកមេភូមិ ឆ្លើយថា ខ្ញុំទទួលលុយ នេះមែនដើម្បីយកទៅរត់ការ តែមកដល់ផ្ទះគេមានទំនាស់គ្នារឿងដីនេះខ្ញុំក៏ផ្អាក និងរក្សាលុយ នេះដល់រាល់ថ្ងៃ រង់ចាំគេត្រូវគ្នានឹងអាលរត់ការបន្ត ។
ទោះយ៉ាងណាក្រុមអ្នកច្បាប់បាននិយាយដោយយោងលើច្បាប់ភូមិបាលក្នុងការគ្រប់គ្រងដីធ្លីគឺបុគ្គលទាំងឡាយណាដែលរស់នៅនឹងអាស្រ័យផលលើដីជាអចលនទ្រព្យលើសពី៥ឆ្នាំ ដីនោះក្លាយជាកម្មសិទ្ធស្របច្បាប់របស់បុគ្គលនោះ ។ ដូច្នេះលោក រស់ វណ្ណា រស់នៅលើដី កេរ្តិ៍ជាង២០ឆ្នាំមកហើយ រឿងអីអ្នកផ្សេងមកទារចំណែកថាជាកម្មសិទ្ធរបស់ខ្លួន ? ៕
