អន្តរជាតិ៖ នៅក្នុងសន្និសីទព័ត៌មានមួយ កាលពីថ្ងៃទី ១២ ខែតុលាម្សិលមិញនេះ ប្រធានលេខាធិការគណៈរដ្ឋមន្ត្រីជប៉ុន លោក Katsunobu Kato ប្រកាសថា៖ រដ្ឋាភិបាលជប៉ុន បានប្តេជ្ញាបង្កើនសមត្ថភាពប្រព័ន្ធខែលមីស៊ីល ដើម្បីឆ្លើយតបនឹងការគំរាមកំហែងដោយសព្វាវុធរបស់កូរ៉េខាងជើង ដែលក្រុងតូក្យូចាត់ទុកថាមានលក្ខណៈកាន់តែចម្រុះនិងស្មុគស្មាញ។ ចំពោះការតាំងចិត្តនេះធ្វើឡើងក្រោយទីក្រុងព្យុងយ៉ាង បានធ្វើព្យុហយាត្រាដ៏សម្បើមមួយកាលពីចុងសប្ដាហ៍មុន ដែលដាក់បង្ហាញសព្វាវុធកាន់តែមានអំណាចជាងមុន។ នេះបើតាមការចុះផ្សាយដោយទីភ្នាក់ងារព័ត៌មាន AP ។
លោកប្រធានលេខាធិការគណៈរដ្ឋមន្ត្រីជប៉ុនរូបនេះ បាននិយាយថា៖ «ដើម្បីឆ្លើយតបនឹងការគំរាមកំហែងដែលមានលក្ខណៈចម្រុះនិងស្មុគស្មាញនេះ យើងនឹងធ្វើការយ៉ាងម៉ឺងម៉ាត់ដើម្បីពង្រឹងសមត្ថភាពប្រព័ន្ធខែលមីស៊ីលគ្រប់ជ្រុងជ្រោយរបស់យើង»។ បន្ថែមពីនេះលោកKato បញ្ជាក់ថា រដ្ឋាភិបាលជប៉ុន ទទួលស្គាល់ថា សមត្ថភាពប្រព័ន្ធខែលមីស៊ីលជប៉ុន នៅមានកម្រិតក្នុងការឆ្លើយតបប្រឆាំងមីស៊ីលរបស់កូរ៉េខាងជើង។
ទោះជាយ៉ាងក្តី លោកប្រធានលេខាធិការគណៈរដ្ឋមន្ត្រីជប៉ុនរូបនេះ បានបដិសេធលម្អិតលើការវាយតម្លៃរបស់ជប៉ុនលើសមត្ថភាពមីស៊ីលដែលដាក់បង្ហាញដោយកូរ៉េខាងជើង។ ដោយលោក បានសង្កត់ធ្ងន់ថា ជប៉ុននឹងបន្តសហការជាមួយសហរដ្ឋអាមេរិកនិងប្រទេសពាក់ព័ន្ធផ្សេងទៀតដើម្បីការពារប្រជាជនជប៉ុន។
សូមជម្រាបថា នៅថ្ងៃទី១០ ខែតុលាសប្ដាហ៍មុន កូរ៉េខាងជើង បានធ្វើព្យុហយាត្រាយោធាដ៏សម្បើមដើម្បីប្រារព្ធខួបទី៧៥ឆ្នាំនៃការបង្កើតបក្សពលករ ដែលបក្សកាន់អំណាច និងបក្សនយោបាយតែមួយគត់ក្នុងប្រទេសនេះ។ ក្នុងក្បួនព្យុហយាត្រានេះ កូរ៉េខាងជើង បានសម្ញែងមីស៊ីលបាលីស្ទិកអន្តរទ្វីប(ICBM) ដែលមានទំហំធំជាងអ្វីដែលក្រុងព្យុងយ៉ាងធ្លាប់ដាក់បង្ហាញកន្លងមក ហើយក៏មានដាក់បង្ហាញមីស៊ីលបាលីស្ទិកដែលបាញ់ចេញពីនាវាមុជទឹកផងដែរ។
គួររម្លឹកផងដែរថា ក្រោមការដឹកនាំជិត៨ឆ្នាំរបស់អតីតនាយករដ្ឋមន្ត្រី អាបេ ស៊ិនហ្សូ ប្រទេសជប៉ុនបានពង្រីកតួនាទីលើឆាកអន្តរជាតិរបស់យោធាខ្លួន ក្រោមសម្ព័ន្ធភាពសន្តិសុខជប៉ុន-សហរដ្ឋអាមេរិក ព្រមទាំងបង្កើនកញ្ចប់ថវិកាការពារជាតិរៀងរាល់ឆ្នាំផងដែរ។ ចំណែកអ្នកស្នងតំណែងពីលោកអាបេ គឺនាយករដ្ឋមន្ត្រីថ្មី ស៊ូហ្កា យូស៊ីហ៊ីដេ និងរដ្ឋាភិបាលលោកក៏រំពឹងបង្កើតគម្រោងមីស៊ីលថ្មីមួយនាចុងឆ្នាំនេះផងដែរ៕ដោយ៖ស តារា
