ភ្នំពេញ ៖ បុរសម្នាក់ស្រវឹងស្រាបើករថយន្ដកាមរីបាឡែនមួយគ្រឿងរវល់តែចុចទូរស័ព្ធជ្រុលទៅបុករ៉ឺម៉កម៉ូតូលក់ផ្លែឈើដែលកំពុងឈប់អែបចញ្ចើមផ្លូវពីក្រោយបណ្ដាលឲ្យប៉ីងធ្លាក់ផ្លែឈើរាយប៉ាយពេញផ្លូវ តែសំណាងល្អមិនបណ្ដាលអោយមានអ្នករងរបួស។
ហេតុការណ៍នេះបានកើតឡើងកាលពីវេលាម៉ោង ២២និង៤៥នាទី ថ្ងៃទី១៤ខែ កក្ដដា ឆ្នាំ២០១៥ តាមបណ្ដោយផ្លូវលេខ២៧៣ ជិតអង់តែនទួលគោក ស្ថិតក្នុងសង្កាត់ បឹងកក់១ ខណ្ឌទួលគោក។
តាមប្រភពព័ត៌មានពីសាក្សីនៅកន្លែងកើតហេតុបាមអោយដឹងថា មុនពេលកើតហេតុគេបានឃើញមានបុរសម្នាក់បើករ៉ឺម៉កម៉ូតូលក់ផ្លែឈើ មកឈប់អែបចញ្ចើមផ្លូវដោយមានគេហៅទិញផ្លែឈើ ហើយបានយកផ្លែឈើទៅអោយអ្នកទិញដោយទុករ៉ីម៉កនៅចញ្ចើមផ្លូវ ភ្លាមនោះក៏មានរថយន្ដមួយគ្រឿងម៉ាកកាមរីបាឡែន ពណ៍ទឹកប្រាក់ ពាក់ស្លាកលេខ ភ្នំពេញ2M-7218 បើកបរដោយបុរសម្នាក់ស្ថិតក្នុងស្ថានភាពស្រវឹង ធ្វើដំណើរតាមបណ្តោយផ្លូវលេខ២៧៣ក្នុងទិសដៅពីកើតទៅលិច ហើយរវល់តែចុចទូរស័ព្ធបានជ្រុលបុកពីក្រោយ បណ្ដាលអោយរ៉ឺម៉កប៉ឺងធ្លាក់ផ្លែឈើររាយប៉ាយពេញផ្លូវ។
ប្រភពដដែលបានបន្តថាក្រោយកើតហេតុម្ចាស់រថយន្ដមិនបានចុះពលើរថយន្ដទេ ហើយបានប្រើពាក្យសំដីមិនសំរម្យទៅលើម្ចាស់រ៉ឺម៉កម៉ូតូថែមទៀត។ ចំណែកម្ចាស់រ៉ឺម៉កម៉ូតូវិញមិនបាននិយាយអីច្រើនទេ គឺសុំអោយម្ចាស់រថយន្ដសងថ្លៃខូចខាតផ្លែឈើចំនួន២៥ម៉ឺនរៀលប៉ុណ្ណោះ តែម្ចាស់រថយន្ដសុំសងតែ២០ម៉ឺនរៀលបានហើយ ម្ចាស់រ៉ឺម៉កម៉ូតូក៏យល់ព្រមយកដើម្បីបញ្ចប់រឿងនៅកន្លែង ព្រោះមិនចង់មានរឿងវែងឆ្ងាយ និងរំខានដល់សមត្ថកិច្ច៕ ចាន់ធឿន
