ភ្នំពេញ៖ ក្រសួងការងារកម្ពុជា និង អារ៉ាប់ប៊ីសាអូឌីត បានចុះកិច្ចព្រមព្រៀងជាមួយគ្នា ស្តីពីការជ្រើសរើសពលករទៅធ្វើការងារតាមផ្ទះ និងការងារទូទៅដោយសុវត្ថិភាព នៅប្រទេស អារ៉ាប៊ីសាអូឌីត ដែលកិច្ចព្រមព្រៀងនេះ ត្រូវបានធានាថា នឹងជួយការពារសិទ្ធិ និងផល ប្រយោ ជន៍គ្រប់យ៉ាង របស់ពលករខ្មែរ ដែលទៅធ្វើការ នៅក្នុងប្រទេសអារ៉ាប់ប៊ីសាអូឌីតចាប់ពីពេលនេះ ។
បើតាមការបញ្ជាក់ឲ្យ ដឹងពី លោក អូស្មាន ហាស្សាន់ រដ្ឋលេខាធិការ ក្រសួងការងារ និងបណ្ដុះបណ្ដាលវិជ្ជាជីវៈ នៅថ្ងៃទី១៣ កុម្ភៈនេះ ថា៖ ពិធីចុះ ហត្ថលេខាលើកិច្ចព្រមព្រៀងនេះ បានធ្វើឡើងរវាង រដ្ឋមន្ត្រីក្រសួងការងារកម្ពុជា លោក អ៊ិត សំហេង. រដ្ឋមន្ត្រីក្រសួងការងារកម្ពុជា និងលោក Mofarrej S. Al-Hoqu abani រដ្ឋមន្ដ្រី ក្រសួងការងារ នៃប្រទេសអារ៉ាប៊ីសាអូឌីត ក្នុងគ្រាដែលគណៈប្រតិភូ ជាន់ខ្ពស់ក្រសួងការងារកម្ពុជាទស្សនកិច្ច នៅព្រះ រាជាណាចក្រអារ៉ាប់ប៊ីសាអូឌីត នៅឡើយ ។
លោក អូស្មាន ហាស្សាន់ បានបញ្ជាក់ថា ៖ កិច្ចព្រមព្រៀងនេះ គឺជាឧបករណ៍ ដ៏សំខាន់ក្នុងការការពារសិទ្ធិ និងផលប្រយោជន៍ពលករខ្មែរ ដោយ ភាគីទាំងពីរត្រូវរៀបចំឲ្យមានប្រព័ន្ធគ្រប់គ្រងជ្រើសរើស លខ័ណ្ឌការងារ ដាក់ឲ្យធ្វើការ ដោយសុវត្ថិភាព និងការធ្វើមាតុភូមិនិវត្តន៍របស់ពលករ ដោយអនុលោមទៅ តាមច្បាប់ និងបទដ្ឋានការងារសមរម្យ និងបទដ្ឋានសុវត្ថិភាពការងារ។
ភាគីទាំងពីរ ក៏ត្រូវបង្កើតគណៈកម្មការបច្ចេកទេសចម្រុះមួយ ដើម្បីធ្វើការប្រជុំពិភាក្សាលម្អិត និងជាប្រចាំដើម្បីតាមដាន លើបញ្ហាប្រឈមនានា ដែលពាក់ព័ន្ធ និងការអនុវត្ត នៃកិច្ចព្រមព្រៀងជាមួយគ្នារួចមកហើយនោះផងដែរ ៕
ដោយ៖ សំរិត
