អន្តរជាតិ៖ កុមារចំនួន៥៤៥នាក់ ពុំទាន់អាចរកឪពុកម្តាយ ឬគ្រួសាររបស់ខ្លួនឃើញឡើយ បន្ទាប់ពីរដ្ឋាភិបាលលោក ដូណាល់ ត្រាំ ចេញនយោបាយអន្តោប្រវេសន៍បំបែកឪពុកម្តាយ ឬគ្រួសារ ពីកុមារ ក្រោយពេលឆ្លងព្រំដែនខុសច្បាប់ពីម៉ិកស៊ីកូ ចូលទឹកដីអាមេរិក ។ នេះបើតាមការអះអាងពីមេធាវី និងអង្គការរដ្ឋាភិបាល ។
បើតាមអង្គការសិទ្ធិមនុស្ស ACLU និងក្រុមហ៊ុនមេធាវី មិនយកកម្រៃមួយចំនួន ត្រូវបានតុលាការចាត់ការងារឲ្យស្វែងរកក្រុមគ្រួសាររបស់កុមារដែលត្រូវបានបំបែក។ ឯកសាររបស់ក្រសួងសន្តិសុខមាតុភូមិអាមេរិក បានបង្ហាញថា មានកុមារជាង ៤ពាន់២រយនាក់ ដែលអាចស្ថិតក្រោមបញ្ជារបស់លោកចៅក្រមសហព័ន្ធជួបជុំគ្រួសារវិញ។ ចំណែកឯកសាររបស់តុលាការ ក៏បានបង្ហាញដែរថា មានកុមារចំនួន៥៤៥រូបដែល ក្រុមការងារមិនទាន់អាចស្វែងរកឪពុកម្តាយ ឬក្រុមគ្រួសារឃើញ។
សូមជម្រាបថា គោលនយោបាយអន្តោប្រវេសន៍របស់រដ្ឋបាលលោក ដូណាល់ ត្រាំ ក្នុងឆ្នាំ២០១៧ និង២០១៨ ដែលបំបែកក្រុមគ្រួសារជនអន្តោប្រវេសន៍ខុសច្បាប់ ជាចំណុចចម្រូងចម្រាសមួយក្នុងអាណត្តិរបស់លោក។ គោលនយោបាយនេះ រងបណ្ដឹងជាច្រើន ហើយចៅក្រមតុលាការសហព័ន្ធអាមេរិក ក៏បានចេញបញ្ជា ឲ្យរដ្ឋាភិបាលអាមេរិកចាត់វិធានការយ៉ាងណាដើម្បីជួបជុំគ្រួសារទាំងអស់នោះវិញ។
បើតាមលោក Brian Morgenstern អ្នកនាំពាក្យសេតវិមាន ប្រាប់អ្នកសារព័ត៌មាននៅថ្ងៃទី២១ ខែតុលានិយាយថា៖« យើងបានទាក់ទងក្រុមគ្រួសាររបស់កុមារទាំងនោះ តែជាអកុសលមានឪពុកម្តាយមួយចំនួនមិនព្រមទទួលកូនរបស់ខ្លួនមកវិញ»។
អនុប្រធានគម្រោងអន្តោប្រវេសន៍ ACLU លោក Lee Gelernt និយាយដែរថា កុមារទាំងអស់នោះអាចនឹងប្រឈមគ្រោះថ្នាក់នៅពេលត្រឡប់ទៅប្រទេសកំណើតវិញ។ប៉ុន្តែអង្គការសិទ្ធិមនុស្ស ACLU បានអះអាងផ្ទុយថា ក្រុមការងារដែលទទួលការងារពីតុលាការ មិនទាន់អាចទំនាក់ទំនងក្រុមគ្រួសាររបស់កុមារទាំង៥៤៥នាក់នោះឡើយ។
ដោយឡែកក្រុមការពារសិទ្ធិមនុស្ស Justice in Motion កំពុងធ្វើដំណើរទៅម៉ិកស៊ិក និងតំបន់អាមេរិកកណ្តាលដើម្បីស្វែងរកគ្រួសាររបស់កុមារទាំងនោះ។ សេចក្តីថ្លែងការណ៍របស់ក្រុមសិទ្ធិមនុស្សខាងលើអះអាងថា ការស្វែងរកគ្រួសាររបស់កុមារទាំងនោះ ជារឿងពិបាក និងចំណាយពេលច្រើន និងកាន់តែស្មុគស្មាញបន្ថែមទៀតនៅពេលមានជំងឺឆ្លង COVID-19។
បើយោងតាមទិន្ន័យរបស់ក្រសួងសន្តិសុខមាតុភូមិអាមេរិក បង្ហាញថា ក្នុងឆ្នាំ២០១៧ គោលនយោបាយអន្តោប្រវេសន៍របស់អាមេរិក បានបំបែកជាង១ពាន់គ្រួសារ។ ក្នុងចំណោមជាង១ពាន់គ្រួសារនោះ គ្រួសាររបស់កុមារចំនួន៥៥០នាក់ត្រូវបានទំនាក់ទំនង ដែលក្នុងនោះមានគ្រួសារចំនួន២៥ ត្រូវបាន ACLU អះអាងថា អាចនឹងមកជួបជុំគ្នានៅទឹកដីអាមេរិកវិញ។
គួរបញ្ជាក់ដែរថា គោលនយោបាយអន្តោប្រវេសន៍គ្មានការអត់អោនរបស់លោកប្រធានាធិបតីដូណាល់ត្រាំចាប់ផ្តើមជាផ្លូវការពីខែមេសាដល់មិថុនាឆ្នាំ២០១៨។ ប៉ុន្តែការបំបែកមនុស្សធំពីកុមារចាប់ផ្តើមតាំងតែពីឆ្នាំ២០១៧ ៕ដោយ៖ស តារា
