អន្តរជាតិ៖ កាលពីថ្ងៃទី២៧ ខែតុលាម្សិលមិញនេះ ទីប្រឹក្សាសន្តិសុខពិសេសរបស់ប្រធានាធិបតីកូរ៉េខាងត្បូង បានអះអាងថា៖ ការចូលរួមរបស់កូរ៉េខាងត្បូង ក្នុងកិច្ចសន្ទនាសន្តិសុខចតុភាគី (Quad) គឺមានតែបំផ្លាញសន្តិសុខ និងស្ថិរភាពក្នុងតំបន់តែប៉ុណ្ណោះ។
លោក Moon Chung-in ទីប្រឹក្សាសន្តិសុខពិសេសរបស់ប្រធានាធិបតីកូរ៉េខាងត្បូង ថ្លែងនៅក្នុងកិច្ចប្រជុំតាមប្រព័ន្ធវីដេអូមួយ ដែលសហរៀបចំដោយក្រុមប្រឹក្សាAtlantic និង East Asia Foundation បានលើកឡើងយ៉ាងដូច្នេះថា៖ «អាមេរិក គឺជាសម្ព័ន្ធមិត្តតែមួយគត់របស់យើង ខណៈចិនគឺជាដៃគូសហប្រតិបត្តិការយុទ្ធសាស្ត្រ»។ ក្នុងន័យនេះ ទីប្រឹក្សាសន្តិសុខរូបរបស់ប្រធានាធិបតី បានបញ្ជាក់ថា ប្រសិនបើកូរ៉េខាងត្បូងផ្តោតអាទិភាពរបស់ខ្លួនលើអាមេរិក ខ្លួននឹងប្រឈមបញ្ហាជាមួយចិន។
ទីប្រឹក្សាសន្តិសុខពិសេសរូបនេះ បានបញ្ជាក់បន្ថែមថា ប្រសិនបើអាមេរិក ជំរុញកូរ៉េខាងត្បូងឲ្យចូលរួមក្នុង «Quad» ប្រាកដណាស់ថាចិននឹងចាត់ទុកកូរ៉េខាងត្បូងជាសត្រូវ ហើយនេះគឺជាអ្វីដែលកូរ៉េខាងត្បូងត្រូវប្រឈម និងបារម្ភ។ បញ្ហានេះហើយ កូរ៉េខាងត្បូង មិនគួរចូលរួមក្នុងកិច្ចសន្ទនាខាងលើឡើយ ដើម្បីបញ្ចៀសបញ្ហាផ្សេងជាមួយចិន ដែលជាប្រទេសជិតខាង។ នេះបើតាមការចុះផ្សាយរបស់ទីភ្នាក់ងារព័ត៌មានYonhap។
ជាក់ស្តែងកន្លងមកអាមេរិក បានអំពាវនាវឲ្យប្រទេសសម្ព័ន្ធមិត្ត នៅក្នុងតំបន់ចូលរួមក្នុងកិច្ចសន្ទនាសន្តិសុខចតុភាគី។យ៉ាងណាមិញ អាមេរិកមិនបានអញ្ជើញកូរ៉េខាងត្បូង ជាផ្លូវការឲ្យចូលរួមក្នុងកិច្ចសន្ទនា «Quad» នេះឡើយ។
ចំពោះការយល់ឃើញរបស់សាស្ត្រាចារ្យចូលនិវត្តន៍របស់សកលវិទ្យាល័យYonsei នៅក្នុងទីក្រុងសេអ៊ូលរូបនេះ បានបញ្ជាក់ទៀតថាវត្តមានរបស់កូរ៉េខាងត្បូងក្នុងQuad អាចឲ្យចិន បង្កើតបក្សសម្ព័ន្ធត្រីភាគីជាមួយរុស្ស៊ី និងកូរ៉េខាងជើងបាន។ ម្យ៉ាងទៀត វាក៏អាចធ្វើឲ្យចិនចាប់ផ្តើមផ្តល់ជំនួយយោធាដល់កូរ៉េខាងជើងវិញផងដែរ ដែលជំនួយនេះ បានផ្អាកតាំងពីឆ្នាំ១៩៥៨មកម្លេះ។
គួរបញ្ជាក់ថា ក្នុងកិច្ចសន្ទនាសន្តិសុខចតុភាគី គឺមានប្រទេសចំនួន៤ ចូលរួម ក្នុងនោះមានដូចជាអាមេរិក ជប៉ុន ឥណ្ឌា និងអូស្ត្រាលី។ ប្រសិនគ្មានការប្រែប្រួលទេ ក្រុមប្រទេសទាំងនេះ នឹងធ្វើសមយុទ្ធយោធានៅក្នុងខែវិច្ឆិកាខាងមុខនេះ នៅក្នុងសមុទ្រអារ៉ាប់ និងឈុងសមុទ្របេងហ្កាល់ ដើម្បីពង្រឹងកិច្ចសហប្រតិបត្តិការរបស់ខ្លួន៕ដោយ៖ស តារា
