ខេត្តស្វាយរៀងៈ ប្រជាពលរដ្ឋមួយចំនួននៅខេត្តស្វាយរៀបបាននិយាយតៗគ្នាថា អង្គភាពអគ្គិសនីខេត្តស្វាយរៀង មានការរើសអើងទម្រើសបំផុត ធ្វើការងារបម្រើឲ្យអង្គភាពរបស់រដ្ឋ បែរជាមិនព្រមទទួលការទូទាត់ប្រាក់ពីអតិថិជនដោយក្រដាសប្រាក់រៀល គ្រាន់តែមានសភាពចាស់ៗបន្តិចនោះ។
រូបភាពនេះខ្លះត្រូវបានផ្សព្វផ្សាយដោយប្រជាពលរដ្ឋលើបណ្ដាញទំនាក់ទំនងសង្គម ដោយបានបង្ហាញពីក្រដាសប្រាក់រៀល ជារូបិយវត្ថុរបស់ជាតិ មានក្រដាស៥០០រៀល ក្រដាស១០០០រៀល និងក្រដាសប្រាក់២០០០រៀលយ៉ាងច្រើនជាមួយនិងវិក័យប័ត្របង់ប្រាក់ដែលចេញដោយអង្គភាពអគ្គិសនីខេត្តស្វាយរៀង បញ្ជាក់ថា ក្រដាសប្រាក់ទាំងនេះខាងអង្គភាពអគ្គិសនីមិនយកទេ។
ប្រជាពលរដ្ឋបានរិះគន់ថា មន្ត្រីរាជការសាធារណៈគួរចាប់អារម្មណ៍ក្នុងរឿងនេះឬជាគំរូដល់ពលរដ្ឋ លើការទទួលខុសត្រូវចាយរូបិយវត្ថុ ក្រដាសប្រាក់រៀលរបស់យើង មិនត្រូវបន្សល់ទុកនូវគំរូអាក្រក់ផ្ដើមឲ្យមានការរើសអើង ទម្រើសលើការចាយប្រាក់ គ្រាន់តែមានសភាពចាស់បន្តិច ហើយមិនមានការដាច់រហែកនោះ។
នៅក្នុងបណ្ដាញទំនាក់ទំនងសង្គមហ្វេសប៊ុក ម្ចាស់គណនីឈ្មោះ Heng Pok បានចែកចាយព័ត៌មានបែបនេះទៅកាន់មិត្តភក្តិរបស់គេដោយសរសេរថា “អគ្គិសនីស្វាយរៀងមិនយកក្រដាសប្រាក់រៀលដែលមានសភាពរៀងចាស់បន្តិច ដូចនៅក្នុងរូបនេះ សូមសួរបងៗជួយបកស្រាយប្រាប់ខ្ញុំផង”។
ពាក់ព័ន្ធករណីនេះ គេពុំទាន់ដឹងថាបុគ្គលិកអគ្គិសនីខេត្តស្វាយរៀងមួយណាមានអត្តចរិករើសអើងមិនព្រមទូទាត់ទទួលយកក្រដាសប្រាក់រៀលនេះនៅឡើយទេ ដោយលោក សេង ប៊ុណ្ណាត ប្រធានអង្គភាពអគ្គិសនីខេត្តស្វាយរៀងមិនអាចទាក់ទងសុំការបំភ្លឺបានកាលពីរសៀលថ្ងៃទី១៥ ខែកុម្ភៈ ឆ្នាំ២០១៦ ដោយទូរស័ព្ទជាច្រើនលើកចូលគ្មានអ្នកទទួល៕
ដោយ៖ សុខ ខេមរា
