អន្តរជាតិ៖ មេដឹកនាំបាតុកម្មប្រឆាំងរដ្ឋាភិបាលថៃ៥នាក់ កាលពីថ្ងៃទី៣០ ខែវិច្ឆិកា ឆ្នាំ២០២០ម្សិលមិញនេះ បានចូលខ្លួនទៅស្នងការប៉ូលីសដើម្បីស្តាប់ពីបទចោទលើការប្រមាថមហាក្សត្រថៃ ដែលកើតឡើងនៅក្នុងការជួបជុំទ្រង់ទ្រាយធំមួយនៅទីលាន Sanam Luang កាលពីថ្ងៃទី១៩ និង២០ វិច្ឆិកា។ ហើយប្រសិនបើរកឃើញថាពួកគេមានទោសក្នុងការប្រមាថមហាក្សត្រមែន បុគ្គលទាំងនោះអាចត្រូវផ្តន្ទាទោសរហូតដល់ទៅ១៥ឆ្នាំ។
មេដឹកនាំបាតុកម្មប្រឆាំងរដ្ឋាភិបាលថៃ ទាំង៥នាក់ខាងលើនេះរួមមាន៖ លោក Arnon Nampha ,លោក Parit Chiwarak ,កញ្ញាPanusaya Sithijirawattanakul ,លោកPanupong Chadnok និងលោក Patiwat Saraiyaem បានចូលខ្លួនទៅស្នងការដ្ឋានប៉ូលីសក្នុងទីក្រុងបាងកកដើម្បីស្តាប់ពីបទចោទប្រឆាំងនឹងពួកគេ។ ពួកគេ ត្រូវបានអមដំណើរដោយមេធាវី២នាក់ផងដែរ។
បើតាមការបញ្ជាក់ពីមេដឹកនាំបាតុកម្ម និងទាមទារឲ្យមានកំណែទម្រង់របបរាជានិយម លោកArnon Nampha បាននិយាយថាលោកមិនបារម្ភនឹងបទចោទនេះទេ និងបានត្រៀមខ្លួនតទល់ក្នុងតុលាការរួចហើយ។ បន្ថែមពីនេះលោកArnon អះអាងបន្តថា៖« ឥឡូវនេះ គឺជាពេលដែលមនុស្សគ្រប់រូប គួរនិយាយដោយត្រង់ពីស្ថានប័នមហាក្សត្រ និងបើទោះបីអ្វីដែលត្រូវបាននិយាយគ្មានអ្នកស្តាប់ និងត្រូវអាជ្ញាធរប្រើប្រាស់ច្បាប់មកបំបិទមាត់ក្តី»។ លោកអះអាងថាបាតុកម្ម នឹងមានសន្ទុះកាន់តែខ្លាំងឡើងក្នុងឆ្នាំ២០២១។
បើយោងតាមកាសែតថៃ Bangkok Post បានចុះផ្សាយថាលោក Parit Chiwarak បានអះអាងថា បទចោទស្តីពីការប្រមាថមហាក្សត្រនេះនឹងនាំឲ្យមនុស្សជាច្រើនទៀតចូលរួមបាតុកម្ម ព្រោះករណីនេះបង្ហាញពីភាពអយុត្តិធម៌ក្នុងសង្គមថៃ។ កញ្ញា Panusaya វិញបន្តថា សំណើរបស់ចលនាប្រជាជន គឺការធ្វើកំណែទម្រង់របបរាជានិយមពិតប្រាកដមួយ មិនមែនលុបបំបាត់របបនេះឡើយ។ ចំណែកឯកញ្ញា Panusaya ក៏បានអះអាងថា ចលនាបាតុកម្ម នឹងមិនរាថយឡើយ។
សូមជម្រាបថា មាត្រា១១២ ក្នុងក្រមព្រហ្មទណ្ឌថៃ ចែងពីការការពារព្រះមហាក្សត្រ នឹងផ្តន្ទាទោសជាប្រាក់ និង ជាប់ពន្ធាគាររហូតដល់១៥ឆ្នាំលើបុគ្គលរូបណាដែលធ្វើសកម្មភាពប៉ះពាល់ដល់មហាក្សត្រ ក៏ដូចជាក្រុមគ្រួសាររាជវង្ស។ មាត្រានេះ ក៏ត្រូវបានកែប្រែសម្រាប់អនុវត្តនៅពេលបាតុកម្មផងដែរ ។
ដោយឡែកទាក់ទិននឹងបញ្ហានេះ ឧត្តមសេនីយ៍ Piya Tawichai ស្នងការរងប៉ូលីសទីក្រុងបាងកក បានបញ្ជាក់ថា ដោយសារតែមេដឹកនាំបាតុកម្មចូលខ្លួនមកឆ្លើយតបចំពោះបទចោទតាមបញ្ជារបស់ប៉ូលីស ពួកគេត្រូវបានដោះលែងដោយគ្មានលក្ខខណ្ឌ។ ប៉ុន្តែទោះជាយ៉ាងក៏ដោយ បុគ្គល៥រូបខាងលើ និងក្រុមបាតុករប្រឆាំងរដ្ឋាភិបាលផ្សេងទៀត ដែលធ្វើបាតុកម្មនៅមុខបន្ទាយយោធាកាលពីថ្ងៃទី២៩ វិច្ឆិកា អាចនឹងត្រូវចោទប្រកាន់បន្ថែមទៀតពីការបំពានច្បាប់ស្តីពីការជួបជុំសាធារណៈ ដូចជាការកម្ទេចទ្រព្យសម្បត្តិសាធារណៈ ឡានប៉ូលីស និងរបងសួនដែលស្ថិតក្រោមការគ្រប់គ្រងរបស់សាលាក្រុង។
ឧត្តមសេនីយ៍រូបនេះ បានបន្ថែមថា ប៉ូលីសអាចនឹងពិនិត្យអត្ថន័យនៃពាក្យសម្តី ដែលបាននិយាយអំឡុងពេលបាតុកម្មដើម្បីកំណត់ថា បាតុករបានបំពានច្បាប់អ្វីខ្លះ។
គួរបញ្ជាក់ថា ជុំវិញបញ្ហាខាងលើនេះលោក ប្រាយុទ្ធ ចន្ទអូចា នាយករដ្ឋមន្ត្រីថៃ ធ្លាប់បានអះអាងថា រដ្ឋាភិបាល នឹងប្រើគ្រប់ច្បាប់ទាំងអស់ដើម្បីគ្រប់គ្រងបាតុករ។ ចាប់តាំងតែពីមានបាតុកម្មក្នុងខែកក្កដាមក នេះជាលើកទី១ហើយដែលមេដឹកនាំបាតុកម្មរងបទចោទពីការប្រមាថមហាក្សត្រ។ លើសពីនេះ ច្បាប់នេះ មិនត្រូវបានរដ្ឋាភិបាលថៃយកមកប្រើប្រាស់ចាប់តាំងពីខែមីនា ឆ្នាំ២០១៨ យោងតាមសំណើរបស់មហាក្សត្រ មហា វជិរាលង្ករណ៍៕ដោយ៖ស តារា
