ព័ត៍មានលំអិតករណីបាក់ប្លង់សេសំណង់ព្រឹកមិញ បាក់ក្តារពុម្ពចាក់ប្លង់សេសំណង់អគារផ្សារត្រពាំងថ្លឹងសង្កត់កម្មករស្លាប់ម្នាក់និងរបួសធ្ងន់២នាក់

ចែករំលែក៖

​ភ្នំពេញ៖កម្មករសំណង់ម្នាក់បានស្លាប់កប់នៅក្នុងស៊ីម៉ង់ និងកម្មករ២នាក់ផ្សេងទៀត បាន​ទទួលរងរបួសធ្ងន់ ដោយសារករណីបាក់ក្តារពុម្ពចាក់​ប្លង់សេសំណង់​អគារ​ផ្សារ​ត្រពាំង​ថ្លឹង​សង្កត់​ពី​លើ បង្កការភ្ញាក់ផ្អើលដល់ប្រជាពលរដ្ឋ និងសមត្ថកិច្ចចុះជួយអន្តរាគមន៍ដល់កន្លែងកើត​ហេតុ​ភ្លាមៗ​ផងដែរ។
​ហេតុការណ៍បាក់ក្តារពុម្ពចាក់ប្លង់សេសំណង់អគារផ្សារត្រពាំងថ្លឹងសង្កត់ពីមកលើកម្មករ ដែល​បណ្តាលឲ្យស្លាប់ និងរបួសនេះ បានកើតឡើងកាលពីវេលាម៉ោង ៨និង៣០នាទី ព្រឹកថ្ងៃទី ១៥ ខែកក្កដា ឆ្នាំ២០១៥ នៅក្នុងចំណុចសំណង់អគារផ្សារត្រពាំងថ្លឹង ដែលមានទីតាំងនៅតាម បណ្តោយ​ផ្លូវវេងស្រេង ភូមិត្រពាំងថ្លឹង សង្កាត់ចោមចៅ ខណ្ឌពោធិសែនជ័យ រាជធានីភ្នំពេញ។
​ជនរងគ្រោះដែលស្លាប់មានឈ្មោះ វ៉ា សុខ ភេទប្រុស អាយុ៥២ឆ្នាំ មានស្រុកកំណើតនៅ ភូមិកំពុងពោ ឃុំកំពង់ភ្នំ ស្រុកលើកដែក ខេត្តកណ្តាល។ ចំណែកអ្នក​រង​របួស​ធ្ងន់​ទាំង​២នាក់ ទី១ឈ្មោះ អ៊ុន អឿនភេទប្រុស អាយុ៤២ឆ្នាំ និងទី២ឈ្មោះ អ៊ុន អៀម ភេទប្រុស អាយុ​៤៩ឆ្នាំ ត្រូវជាបងប្អូនបង្កើតនិងគ្នា មានស្រុកកំណើតនៅភូមិបារាយ ឃុំបារាយ​ ក្រុងព្រៃវែង ខេត្តព្រៃវែង បច្ចុប្បន្នជនរងគ្រោះទាំង៣នាក់ ស្នាក់នៅកន្លែងកើតហេតុ។
​ប្រជាពលរដ្ឋនៅកន្លែងកើតហេតុប្រាប់ឲ្យដឹងថា មុនពេលកើតហេតុពួកគាត់បានឃើញ កម្មករចំនួន៨នាក់ កំពុងធ្វើការ ដោយ៥នាក់នៅខាងលើ និង៣នាក់ផ្សេងទៀត (ជនរងគ្រោះ) នៅ​ខាងក្រោម ខណៈឡានស៊ីម៉ង់កំពុងបាញ់ស៊ីម៉ង់ ដើម្បីចាក់ប្លង់សេជាន់ផ្ទាល់ដី ស្រាប់​តែ​បាក់​ក្តារ​ពុម្ព​​សង្កត់ពីលើកម្មករចំនួន៣នាក់នៅខាងក្រោម បណ្តាលឲ្យស្លាប់ម្នាក់ភ្លាមៗ និងមនុស្ស២​នាក់ ទទួលរងរបួសធ្ងន់ ធ្វើឲ្យមានការភ្ញាក់ផ្អើលដល់សមត្ថកិច្ចចុះជួយអន្តរាគមន៍​ដល់​កន្លែង​កើត​ហេតុ ដោយមានគ្រឿងចក្រ( អេស្កាវទ័រ) និងប្រជាពលរដ្ឋជួយកាយយកជនរងគ្រោះពី​ក្នុង​គំនរស៊ីម៉ង់ ដឹកបញ្ជូនយកទៅសង្គ្រោះបន្ទាន់នៅមន្ទីរពេទ្យមិត្តភាពខ្មែរ សូវៀត ។ ចំណែក​ជន​រង​​គ្រោះ​​ដែល​​​ស្លាប់នៅកន្លែងកើតហេតុ ត្រូវបានសមត្ថកិច្ចប្រគល់ឲ្យក្រុមគ្រួសារដឹកយកទៅធ្វើ​បុណ្យ​​តាម​ប្រពៃណីនៅស្រុកកំណើត ។
​សមត្ថកិច្ចប្រាប់ថា កន្លែងដែលបាក់ក្តារពុម្ពសង្កត់កម្មករស្លាប់ និងរបួសនោះ មានប្រវែង ប្រហែងជាង៥ម៉ែត្រ ទើបសាងសង់ព្រឹកថ្ងៃកើតហេតុនេះតែម្តង ។ ដោយឡែកក្រុមហ៊ុន ដែល ទទួលការសាងសង់នោះ មានឈ្មោះ ក្រុមហ៊ុន ទូច ប៊ុនធឿន ចំណែកមេការបានរត់គេចខ្លួន បាត់ស្រមោល បន្ទាប់ពីកើតហេតុភ្លាមៗ។
​សមត្ថកិច្ចប្រាប់បន្តថា ពាក់ព័ន្ធទៅនឹងករណីបាក់ក្តារពុម្ពចាក់​ប្លង់សេសំណង់​អគារ​ផ្សារ​ត្រពាំង​​ថ្លឹង​សង្កត់​ពី​លើកម្មករសំណង់ បណ្តាលឲ្យស្លាប់ និងរងរបួសនេះ អាជ្ញាធរ​ខណ្ឌ​ពោធិ​សែន​ជ័យ កំពុងធ្វើការស្រាវ​ជ្រាវ​បន្តទៀត ដើម្បីស្វែងរកមូលហេតុច្បាស់លាស់ ៕ សុខា សែនជ័យ

20150715-140619.jpg

20150715-140623.jpg

20150715-140627.jpg

20150715-140631.jpg

20150715-140634.jpg

...

20150715-140638.jpg


ចែករំលែក៖
ពាណិជ្ជកម្ម៖ Naza Wedding Planner ads2 ads3 ambel-meas ads5 ads6 scanpeople ads7 fk Print