បច្ចុប្បន្នអំពើហឹង្សាសង្គ្រាមស៊ីវិលបានធ្វើឲ្យពលរដ្ឋជាច្រើនត្រូវបោះបង់ផ្ទះសម្បែងភៀសខ្លួនទៅកាន់ប្រទេសជិតខាងគេចពីក្តីស្លាប់។
ឧត្តមក្រុមប្រឹក្សាអង្គការសហប្រជាជាតិ ទទួលបន្ទុកជនភៀសខ្លួន ទើបតែចេញរបាយការណ៍ថ្មីមួយ ស្តីពីចំនួនជនភៀសខ្លួនដោយសារសង្គ្រាម ដែលមានចំនួន៦០លាននាក់។
ជាមួយនឹងជនភៀសខ្លួនយ៉ាងច្រើនបែបនេះអង្គការព្រួយ បារម្មណ៍ យ៉ាងខ្លាំង ជនភៀសខ្លួនទាំងនោះកំពុងប្រឈមនិងបញ្ហាផ្សេងៗជាច្រើន ក្នុងនោះមានកង្វះស្បៀងអាហារជាដើម។ចំនួនជនភៀសខ្លួនបានកើនឡើងខ្ពស់ជាងឆ្នាំមុនដល់ទៅ ជិត១០លាននាក់។
អង្គការសហប្រជាជាតិបានអំពាវនាវដល់ប្រទេស អឺរ៉ុប បើកព្រំដែន ទទួលជនភៀសខ្លួនទាំងនោះ ឲ្យបានច្រើន។តាមរយៈរបាយការណ៍ របស់ឧត្តមក្រុមប្រឹក្សាអង្គការសហប្រជាជាតិ ទទួលបន្ទុកជនភៀសខ្លួន ក្នុងមួយថ្ងៃ មានមនុស្សប្រមាណជា ៤២៥០០ នាក់ ត្រូវក្លាយជាជនភៀសខ្លួន រឺត្រូវបោះបង់ចោលផ្ទះសម្បែង ដោយបង្ខំ ដោយសារ តែជម្លោះហិង្សា នឹងសង្គ្រាមនៅតាមបណ្តាប្រទេសនានា ទូទាំងពិភពលោក។
ពលរដ្ឋភៀសខ្លួនច្រើនស្ថិតនៅក្នុងប្រទេសម៉ាលី កូតឌីវ័រ អាហ្វ្រិកកណ្តាល លីប៊ី នីហ្ស៊េរីយ៉ា កុងហ្គោ ស៊ូដង់ និងចុងក្រោយនេះគឺប៊ូរុនឌី។ នៅតំបន់ដើមបូព៌ា មានស៊ីរី អ៊ីរ៉ាក់ និងយេម៉ែន ដែលកំពុងរោលរាលដោយភ្លើងសង្គ្រាម ធ្វើឲ្យប្រជាជនរាប់លាននាក់ រត់ភៀសខ្លួនទៅប្រទេសផ្សេងៗ។ ចំណែកនៅអឺរ៉ុបវិញ គឺមានអ៊ុយក្រែន ដែលសង្រ្គាមនៅភាគខាងកើតជាមួយក្រុមឧទ្ទាម បានរុញច្រានប្រជាជន ជាច្រើនពាន់នាក់ ឲ្យរត់ចោលផ្ទះសម្បែងផងដែរ។ ក្រៅពីនេះ ប្រទេសនៅទ្វីបអាស៊ីមួយចំនួន មាន អាហ្វហ្កានីស្ថាន ប៉ាគីស្ថាន គៀកហ្ស៊ីស្ថាន និងភូមា ក៏មានជនភៀសខ្លួនរាប់លាននាក់ផងដែរ។
គ្រាន់តែជនភៀសខ្លួននៅក្នុងប្រទេសស៊ីរីមានរហូតដល់ទៅជាង៤លាននាក់ទៅហើយ ហើយនឹងបន្តកើនឡើងខ្ពស់ទៀតពេលសង្គ្រាមនៅក្នុងស្រុកកាន់តែកើនឡើង៕
