ខេត្តបាត់ដំបង៖ កម្លាំងសមត្ថកិច្ចនគរបាលក្រុងបាត់ដំបង ឃាត់ខ្លួនជនសង័្សយចំនួន២នាក់ ពាក់ព័ន្ធករណីឪពុកបង្កើត និងពូបង្កើតរួមគ្នារំលោភកូនស្រីរបស់ខ្លួនដែលទើបមានអាយុត្រឹមតែ ៣ឆ្នាំ ដេីម្បីសាកសួរ និងចាត់ការតាមច្បាប់។
បើយោងតាមប្រភពព័ត៍មានពីមន្រ្តីជំនាញស្នងការដ្ឋាននគរបាលខេត្តបាត់ដំបង បានឲ្យដឹងថា កាលពីថ្ងៃទី១០ ខែធ្នូ ឆ្នាំ២០២០ថ្មីៗនេះ ក្រោយទទួលបានបទបញ្ជាពីលោកឧត្តមសេនីយ៍ទោ សាត គឹមសាន ស្នងការ នៃស្នងការដ្ឋាននគរបាលខេត្តបាត់ដំបង បានឲ្យកម្លាំងនគរបាលក្រុងបាត់ដំបង ដែលមានលោកវរសេនីយ៍ឯក ឆាង វណ្ណឆៃ ជាអធិការក្រុងសហការជាមួយនគរបាលស្រុកឯកភ្នំ ដែលមានលោកវរសេនីយ៍ឯក ឡុង យោធាវីរៈ ជាអធិការស្រុក បានធ្វេីការនាំខ្លួនបុរសចំនួន០២នាក់មកសាកសួរ នៅពេលបានទទួលនូវពាក្យបណ្តឹងរបស់ស្រ្តីឈ្មោះ (ស.ព) រស់នៅក្នុងក្រុងបាត់ដំបង ជាម្តាយកុមារី រង គ្រោះ ពីករណីឪពុកបង្កើតនិងពូបង្កើតរួមគ្នា រំលោភសេពសន្ធវៈ កូនស្រីរបស់ខ្លួនដែលទើបមានអាយុត្រឹមតែ០៣ឆ្នាំតែប៉ុណ្ណោះ។
ប្រភពដដែលបន្តថា បុរសជាប្តីនិងជាឪពុកមានឈ្មោះ (ហ.ហ)រស់នៅ ក្រុងបាត់ដំបង ព្រមទាំងឈ្មោះ (ហ.ដ)នៅមូលដ្ឋានជាមួយគ្នា ត្រូវជាប្អូនបង្កើតរបស់បុរសខាងលើ និងជាពូបង្កើតរបស់កុមារីរងគ្រោះ។
ជាក់ស្តែងនៅក្នុងពេលសាកសួរនៅអធិការដ្ឋាននគរបាលក្រុងបាត់ដំបង ដោយមានការចូលរួមពីម្តាយ និងមានអង្គការសង្គមស៊ីវិលចូលរួមស្តាប់ផងនោះកុមារីរងគ្រោះ ឈ្មោះ(ច.ណ) បានឆ្លើយបញ្ជាក់ថា រូបគេពិតជាត្រូវបានឪពុកបង្កើតរួមគ្នាជាមួយពូបង្កើតខាងលេីនេះ ចាប់រំលោភសេពសន្ធវៈ ចំនួន០២ដងក្នុងអំឡុងពេលថ្មីៗនេះ។
ដោយឡែកជនសង្ស័យទាំងពីរនាក់នេះ មិនបានឆ្លើយសារភាពអំពីសកម្មភាពរបស់ខ្លួននៅឡេីយទេ នៅចំពោះមុខសមត្ថកិច្ចនគរបាល តែយ៉ាងណាក៏ដោយក្នុងពេលឃាត់ខ្លួនជនសង្ស័យទាំងពីរនេះសមត្ថកិច្ចរកឃើញគ្រឿងញៀន និងសម្ភារៈប្រើប្រាស់គ្រឿងញៀន មួយចំនួននៅជាមួយពួកគេទាំងពីរនេះផងដែរ។ លុះនៅថ្ងៃទី១១ ខែធ្នូម្សិលមិញនេះ កម្លាំងនគរបាលជំនាញក្រុងបាត់ដំបង បានកសាងសំណុំរឿងបញ្ជូនជនសង័្សយ ទាំងពីរមកកាន់ការិយាល័យជំនាញ ដេីម្បីស្រាវជ្រាវបន្តនិងចាត់ការតាមផ្លូវច្បាប់។
គួរបញ្ជាក់ថា ប្រសិនបើការស្រាវជ្រាវឃើញថា ជនសង្ស័យទាំងពីរនាក់នេះ បានធ្វើសកម្មភាពដូចការបញ្ជាក់អះអាងរបស់កុមារីរងគ្រោះមែននោះ គឺពិតជាសាហាវឃោរឃៅ និងជារឿង ខ្លោចផ្សារ បំផុតសម្រាប់កុមារីនេះណាស់៕ដោយ៖សហការី
