អន្តរជាតិ៖ បើតាមបញ្ជីឈ្មោះដែលបានចុះផ្សាយដោយទស្សនាវដ្តី Forbes នាពេលថ្មីៗនេះថា កុមារ Ryan Kaji មានមានអាយុត្រឹម៩ឆ្នាំប៉ុណ្ណោះ ប៉ុន្តែគេអាចរកចំណូលបានរហូតដល់២៩លានដុល្លារក្នុងឆ្នាំ២០២០ តាមរយៈឆាណែល YouTube របស់ខ្លួន។ ជាមួយតួលេខនេះកុមាររដ្ឋ Texas អាមេរិករូបនេះ បានក្លាយជា YouTuber ដែលរកចំណូលបានខ្ពស់បំផុតប្រចាំឆ្នាំនេះ។
កុមារ Kaji ដែលមានឈ្មោះពិតថា Ryan Guan កាលពីឆ្នាំ២០១៨ រកបាន២២លានដុល្លារ ហើយឆ្នាំ២០១៩ រកបាន២៦លានដុល្លារឯណោះ។ ហើយនេះជាឆ្នាំទី៣ហើយដែលកុមាររៀនថ្នាក់ទី៣ Ryan Kaji រកលុយបានច្រើនបំផុតលើ YouTube ។
សូមជម្រាបថា ឆាណែល «Ryan’s World» បានបង្កើតឡើងក្នុងឆ្នាំ២០១៥ ដោយឪពុកម្តាយរបស់ Ryan ដោយកាលនោះ កុមាររូបនេះមានអាយុត្រឹម៣ឆ្នាំប៉ុណ្ណោះ ។ មកដល់ពេលនេះ ឆាណែលនេះមានអ្នក Subscribe ដល់ទៅ៤១,៧លាននាក់ទៅហើយ។ ជាក់ស្តែងផ្តើមដំបូងដោយឈ្មោះ «Ryan ToysReview» ឆាណែល YouTube នេះ មានសុទ្ធសឹងតែវីដេអូ ប្រភេទ «Unboxing» ដែលបង្ហាញពីក្មេងប្រុសរូបនេះបើកប្រអប់ប្រដាប់ក្មេងលេខ ហើយលេងជាមួយពួកវា។ ក៏ប៉ុន្តែ ឆាណែល YouTube នេះ មានការវិវត្តទៅតាមវ័យរបស់ក្មេងប្រុស Ryan ដោយឥឡូវនេះ វាក៏ផ្តល់វីដេអូអប់រំផងដែរ បន្ថែមពីការគ្រាន់តែបើកប្រអប់ប្រដាប់ក្មេងលេង។
ដោយផ្អែកលើចំណាត់ថ្នាក់របស់ទស្សនាវដ្តី Forbes កុមារ Ryan Kaji បាននាំមុខឆាណែល YouTube ដ៏ល្បីល្បាញមួយឈ្មោះថា«MrBeast» ដែលរកលុយបាន២៤ពាន់លានដុល្លារ។ ឆាណែលដែលមានអ្នក Subscribe រហូត៤៧,៨លាននាក់នេះ គឺជាកម្មសិទ្ធិរបស់យុវជនអាមេរិកម្នាក់ឈ្មោះ Jimmy Donaldson ។
គួរបញ្ជាក់ដែរថា ចំពោះឆាណែលដែលជាប់ចំណាត់ថ្នាក់លេខ៣ ក្នុងតារាងរបស់ទស្សនាវដ្តី Forbes គឺ «Dude Perfect»ដែលបង្កើតឡើងដោយមិត្តមួយក្រុមមកពីរដ្ឋ Texas សហរដ្ឋអាមេរិក។ ឆាណែលនេះ មានអ្នក Subscribe រហូតដល់ ៥៧,៥លាននាក់ ហើយរកចំណូលបាន២៣លានដុល្លារ។ ចំណែកចំណាត់ថ្នាក់លេខ ៤ គឺឆាណែល YouTube ឈ្មោះថា «Rhett and Link» ដែលរកបាន២០លានដុល្លារ ហើយមានអ្នក Subscribe ៤១,៨លាននាក់។
ដោយឡែកចំណាត់ថ្នាក់លេខ៥ ឆាណែល «Markiplier» រកបាន១៩,៥លានដុល្លារ ហើយមានអ្នក Subscribe សរុប២៧,៨លាននាក់។ចំណាត់ថ្នាក់លេខ៦ ឆាណែល «Preston Arsement» រកបាន១៩លានដុល្លារ ហើយមានអ្នក Subscribe សរុប ៣៣,៤លាននាក់។ចំណាត់ថ្នាក់លេខ៧ ឆាណែល «Like Nastya» រកចំណូលបាន១៨,៥លានដុល្លារ ហើយមានអ្នក Subscribe សរុប៦០លាននាក់។
រីឯចំណាត់ថ្នាក់លេខ ៨ ឆាណែល «Blippi» រកចំណូលបាន១៧លានដុល្លារ ហើយមានអ្នក Subscribe សរុប២៧,៤លាននាក់។ចំណាត់ថ្នាក់លេខ៩ ឆាណែល «David Dobrik» រកចំណូលបាន១៥,៥លានដុល្លារ ហើយមានអ្នក Subscribe សរុប ១៨លាននាក់។ចំណាត់ថ្នាក់លេខ ១០ ឆាណែល «Jeffree Star» រកចំណូលបាន១៥លានដុល្លារ ហើយមានអ្នក Subscribe សរុប១៦,៩លាននាក់៕ ដោយ៖ស តារា
