ការិយាល័យស៊ើបអង្កេតសហព័ន្ធ Federal Bureau of Investigation (FBI) ទទួលបានព័ត៌មានស្តីពីគម្រោងធ្វើបាតុកម្ម ប្រដាប់អាវុធនៅទូទាំងសហរដ្ឋអាមេរិកក្នុងថ្ងៃលោកបៃឌិនស្បថចូលកាន់តំណែងប្រធានាធិបតីនាថ្ងៃទី២០ខែមករា។ តាមសារព័ត៌មាន AP និង CNN បានផ្សាយថា តាមព័ត៌មានដែលក្រុម FBI ទទួលបាន ក្រុមបាតុករ នឹងនាំគ្នាដង្ហែក្បួននៅថ្ងៃទី២០ខែមករា ឆ្នាំ២០២១។ ក្រុមអ្នកស្រាវជ្រាវជឿជាក់ថា មានក្រុមចូលរួមធ្វើបាតុកម្មប្រដាប់អាវុធជា សមាជិកក្រុមឧទ្ទាម ។ មន្ត្រី FBI បានឲ្យដឹងថា ក្រុមបាតុករប្រដាប់អាវុធ បានឡើងគម្រោងធ្វើបាតុកម្មនៅរដ្ឋទាំង៥០ ចាប់ពីថ្ងៃទី១៦ខែមករាឆ្នាំ២០២១ រហូតដល់ថ្ងៃទី២០ខែមករា គឺជាថ្ងៃដែលលោកបៃឌិនស្បថចូលកាន់តំណែង។ ជាមួយគ្នានេះក្រុមបាតុករ មានគម្រោងធ្វើបាតុកម្មនៅថ្ងៃទី១៧ ដល់ថ្ងៃទី២០ខែមករា ។ ព័ត៌មានខាងលើបង្កក្តីបារម្ភយ៉ាងខ្លាំងពីការបង្ហូរឈាមកាន់តែច្រើននៅថ្ងៃលោកបៃឌិនឡើងកាន់តំណែង។ តាមព័ត៌មានពីFBI និឹងមានការបះបោរកើតឡើង ប្រសិនបើប្រធានាធិបតីត្រាំ ត្រូវដកហូតតំណែង ។ ក្រុម FBI បានលើកឡើងថា តាមព័ត៌មានទទួលបាន ក្រុមបាតុករនឹងអុកឡុករំខានដល់ការស្បថចូលកាន់តំណែង។ ក្រុមបាតុករក៏មានគម្រោងវាយប្រហារទីតាំងអគាររដ្ឋាភិបាលនៅតាមបណ្តារដ្ឋនានាដែរ។ នៅពេលនេះ ក្រុមសន្តិសុខអាមេរិក ព្រមទាំងកម្លាំងទាហានបានបង្កើនសកម្មភាពការពារទប់ស្កាត់ ការវាយប្រហារពីក្រុមបាតុករ៕
ដោយ៖ ធី រីណា(រូបភាព៖AP)
