ខេត្តកំពង់ឆ្នាំង៖ ដើម្បីពង្រឹងនូវការអនុវត្តច្បាប់ចរាចរណ៍ថ្មីអោយកាន់តែមានប្រសិទ្ធភាពនោះនៅព្រឹកថ្ងទី២៣ ខែកុម្ភៈ ឆ្នាំ២០១៦នេះ មន្ទីរសាធារណការ និងដឹកជញ្ជូនខេត្តកំពង់ឆ្នាំង ដឹកនាំដោយលោកមាស ឈុនលី អនុប្រធានការិយាល័យដឹកជញ្ជូន សហការជាមួយនិងកម្លាំងនគរបាលចរាចរណ៍ បានចុះធ្វើការផ្សព្វផ្សាយស្តីពីច្បាប់ចរាចរណ៍ផ្លូវគោកដល់ប្រជាពលរដ្ឋជាម្ចាស់យានយន្ត និងគោយន្តកែច្នៃ ចំនួន១១៥នាក់ ស្រុកទឹកផុស ខេត្តកំពង់ឆ្នាំង ។
លោក មាស ឈុនលី អនុប្រធានការិយាល័យដឹកជញ្ជូននៃមន្ទីរសាធារណការ និងដឹកជញ្ជូនខេត្តកំពង់ឆ្នាំង បានមានប្រសាសន៍ថា ដោយសារសព្វថ្ងៃនេះ បញ្ហាគ្រោះថ្នាក់ចរាចរណ៍ ធ្វើឱ្យមនុស្សបាត់បង់ជីវិត របួស ពិការ ព្រមទាំងការខាតបង់ ទ្រព្យសម្បត្តិ ស្ថិតក្នុងកម្រិតខ្ពស់ ប្រមុខរាជរដ្ឋាភិបាលកម្ពុជា មានក្តីព្រួយបារម្ភ និងរិះរកវិធី ដើម្បីកាត់បន្ថយ ករណីគ្រោះថ្នាក់ទាំងនោះ ឱ្យមកនៅកម្រិតទាបបំផុត។ ផ្អែកលើបញ្ហានេះ ទើបរាជរដ្ឋាភិបាលកម្ពុជា ខិតខំធ្វើច្បាប់ ស្តីពីចរាចរណ៍ផ្លូវគោក និងជំរុញឱ្យស្ថាប័នជំនាញ បញ្ជ្រាបច្បាប់នេះ ដល់ប្រជាពលរដ្ឋ ដើម្បីបានយល់ជាចំណេះដឹងទាំងអស់គ្នា សម្រាប់អនុវត្ត ក្នុងការ រស់នៅប្រចាំថ្ងៃ ។ ផ្តើមចេញពីកង្វល់នេះ រាជរដ្ឋាភិបាលកម្ពុជាបានយកចិត្តទុកដាក់ ក្នុងការបញ្ជ្រាបការយល់ដឹង ដល់អ្នកប្រើប្រាស់ផ្លូវ បំណងកាត់បន្ថយបរិមាណ គ្រោះថ្នាក់ចរាចរណ៍ មកត្រឹមកម្រិតអប្បបរមា ក៏ដូចជាបង្កើនការរក្សាទាំងទ្រព្យសម្បត្តិរដ្ឋ ទាំងទ្រព្យសម្បត្តិឯកជន ឱ្យនៅគង់វង្ស យូរអង្វែង។
លោកមាស ឈុនលីបានបញ្ជាក់ទៀតថា ចាប់ពីថ្ងៃទី១៥ ខែមិនា ឆ្នាំ២០១៦នេះសមត្ថកិច្ចនឹងរឹតបន្តឹង លើការអនុវត្តច្បាប់ចរាចរណ៍ ដូច្នេះប្រជាពលរដ្ឋដែលជាអ្នកបើកបរថយន្ត និងអ្នកបើកបរគោយន្តកែច្នៃ ដែលពុំទាន់មានប័ណ្ណបើកបរនោះ ត្រូវទៅដាក់ពាក្យប្រឡងយកប័ណ្ណបើកបរនៅមន្ទីរសាធារណការ និងដឹកជញ្ជូនខេត្តកំពង់ឆ្នាំង ដើម្បីយើងចូលរួមគោរពច្បាប់ចរាចរណ៍ទាំងអស់គ្នា សំដៅធ្វើយ៉ាងណាកាត់បន្ថយអត្រាគ្រោះថ្នាក់ចរាចរណ៍នេះឲ្យនៅកម្រិតទាបបំផុត៕
ដោយ៖ ចន្ថា
