ខេត្តបន្ទាយមានជ័យ៖ បើតាមការអះអាងពីលោក ហ៊ឹល រ៉ាយ៉ា អភិបាលក្រុងសិរីសោភ័ណ បានបញ្ជាក់ថា អាជ្ញាធរមូលដ្ឋានភូមិ-សង្កាត់បានរាយការណ៍មកលោកថា មានបងប្អូនប្រជាពលរដ្ឋចំនួន៣នាក់បានត្រឡប់មកពីប្រទេសថៃ ហើយមិនបានចូលខ្លួនធ្វើចត្តាឡីស័ករយៈពេល១៤ថ្ងៃនោះទេ ។ លោកអភិបាលស្រុក បន្ថែមថា ក្រោយពីទទួលព័ត៌មាននេះ ហើយជាការណែនាំពីលោក អ៊ុំ រាត្រី អភិបាលខេត្តបន្ទាយមានជ័យ បានឲ្យក្រុមការងារយករថយន្តសាមុយ១គ្រឿងទៅដឹកទាំង៣គ្រួសារ នៅថ្ងៃទី១៧ ខែមករា ឆ្នាំ២០២១ ស្ថិតក្នុងភូមិព្រៃឫស្សីសង្កាត់ព្រះពន្លា ក្រុងសិរីសោភ័ណ ដើម្បីយកមកធ្វើចត្តាឡីស័កនៅមណ្ឌលវិទ្យាល័យសម្តេចឪ ក្រុងសិរីសោភ័ណតែម្តង។
លោក ហ៊ឹល រ៉ាយ៉ា អភិបាលក្រុងសិរីសោភ័ណ បានបញ្ជាក់ទៀតថា ពិតជានាំទុក្ខដល់ក្រុមគ្រួសារមែន ដើម្បីបង្កា និងទប់ស្កាត់កូវីដ១៩ មិនឱ្យកើតមានក្នុងសហគមន៍ ហើយត្រូវអនុវត្តន៍ឱ្យបានតាមការណណែនាំរបស់ក្រសួងសុខាភិបាលកម្ពុជា ត្រូវពង្រឹងការត្រួតពិនិត្យ និងធ្វើចត្តាឡីស័កចំពោះបងប្អូនប្រជាពលរដ្ឋដែលត្រឡប់ពីប្រទេសថៃ ត្រូវអនុវត្តឱ្យបាន គឺត្រូវធ្វើចត្តាឡីស័ករយៈពេល១៤ក្នុងមណ្ឌល ដែលត្រូវបានត្រួតពិនិត្យសុខភាព និងធ្វើតេស្តសំណាក់។
ដោយឡែកជុំវិញបញ្ហានេះដែរ អភិបាលស្រុកអូរជ្រៅលោក លី សុវណ្ណារិទ្ធ ក៏បានបញ្ជាក់ដែរថា ចាប់ពីថ្ងៃទី២០ ខែធ្នូ ឆ្នាំ២០២០ដល់ថ្ងៃទី១៧ខែមករា ឆ្នាំ២០២១នេះ មានប្រជាពលរដ្ឋត្រឡប់ពីប្រទេសថៃ និងភាគីថៃចាប់បញ្ជូនតាមច្រកអូរបីជាន់ ស្រុកអូរជ្រៅ មានចំនួន៥,៤៩៤នាក់ក្នុងនោះស្រីចំនួន២,៤៣៥នាក់ ហើយនៅថ្ងៃទី១៧ ខែមករា ឆ្នាំ២០២១នេះ មានចំនួន១៤៦នាក់ ក្នុងនោះស្រី៥៨នាក់។
ទាក់ទិននឹងករណីខាងលេីនេះ អនុប្រធានសុខាភិបាលខេត្ត លោកវេជ្ជបណ្ឌិត រឿន សុធី ក៏បានបញ្ជាក់ឲ្យដឹងដែរថា ប្រជាពលរដ្ឋដែលត្រឡប់ពីប្រទេសថៃ មានច្រកអូរជាន់ ស្រុកអូរជ្រៅ និងច្រកម៉ាឡៃ ស្រុកម៉ាឡៃ ច្រកបឹងត្រកួន ស្រុកថ្មពួក ដែលត្រូវបានទទួលធ្វើចត្តាឡីស័ករយៈពេល១៤ថ្ងៃ មានចំនួន៩.០៣០នាក់ ក្នុងនោះស្រី៣,៨៩៧នាក់ និងបានយកសំណាក់ចំនួន៩,៩៣៥នាក់ ក្នុងនោះស្រី៤,៣២៥នាក់ហើយត្រូវបានបញ្ចប់ធ្វើចត្តាឡីស័កត្រឡប់ទៅផ្ទះវិញមានចំនួន៤,៩៤៤នាក់ ក្នុងនោះស្រី២,០៨៩នាក់ និងកំពុងបន្តធ្វើចត្តាឡីស័ករយៈពេល១៤ថ្ងៃមានចំនួន២,៥៨៣នាក់ ក្នុងនោះស្រី១,១០០នាក់ វិជ្ជមានកូវីដ១៩មានចំនួន៣៤នាក់ ក្នុងនោះស្រី២៥នាក់ និងប្រុស៩នាក់៕ដោយ៖សហការី
