ខេត្តបន្ទាយមានជ័យ៖ បើតាមការសង្កេតមើលជាក់ស្តែង នាពេលបច្ចុប្បន្ននេះ ករណីសត្វឆ្មា ឆ្កែ ខាំទៅលើមនុស្សភាគច្រើននៅពេលដែលពួកគាត់មិនបានទៅចាក់វ៉ាក់សាំងការពារជំងឺសត្វឆ្មារ ឬសត្វឆ្កែឆ្កួត គឺមានអាការៈខុសប្រក្រតីដូចជា ដេញខាំគេឯងដូចសត្វដែលធ្លាប់ខាំខ្លួន។
ជាក់ស្តែងយុវតីម្នាក់ឈ្មោះ សៅ វណ្ណារី អាយុ២០ឆ្នាំ រៀនថ្នាក់ទី១២ មានម្តាយឈ្មោះ អូន ជ្រាប អាយុ៤០ឆ្នាំ ជាជាងកាត់ដេរ និងឪពុកឈ្មោះសួង សើម អាយុ៤០ឆ្នាំ មុខរបរកម្មករសំណង់ ។ គ្រួសារមានកូនក្នុងបន្ទុកចំនួន៤នាក់ (ស្រី៣នាក់ ប្រុស១នាក់) ដោយឡែកយុវតីរងគ្រោះខាងលើជាកូនទី៣ ហើយគ្រួសារនេះរស់នៅភូមិគាបលើ សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ ។
បើតាមប្រភពពីម្តាយក្មេងស្រីរងគ្រោះ បានរៀបរាប់ឲ្យដឹងថា កូនស្រីរបស់គាត់ឈ្មោះ សៅ វណ្ណារី ត្រូវសត្វឆ្មាខាំជើង ប៉ុន្តែមិនបានចាក់វ៉ាក់សាំងការពារជំងឺសត្វឆ្មារ ឬសត្វឆ្កែឆ្កួតនោះទេ លុះជាង២ខែក្រោយមក ស្រាប់តែនាងមានអាការៈដូចសត្វឆ្មាដេញខាំមិត្តភក្តិ ហើយត្រូវបានក្រុមគ្រួសារបញ្ជូនទៅព្យាបាលនៅមន្ទីរពេទ្យដែរ តតែគ្មានគ្រូពេទ្យណាហ៊ានទទួលនោះទេ។ បន្ទាប់មកក្រុមគ្រួសារក៏នាំនាងទៅឱ្យគ្រូខ្មែរព្យាបាល ហើយកាលពីថ្ងៃទី២៥ ខែមករា ឆ្នាំ២០២១ ក៏បានធូរស្បើយឡើងវិញផងដែរ។
ម្តាយក្មេងស្រីខាងលើ បន្តថា កូនស្រីរបស់គាត់ត្រូវបានសត្វឆ្មាខាំរយៈពេលជាង២ខែមកហើយ ដោយសត្វឆ្មារមួយក្បាលនោះមានពណ៌ប្រផេះក្នុងចំណោមសត្វឆ្មា ៣ទៅ៤ក្បាលដែលជារបស់ជីដូននាង លុះពេលនាងចេញចូលផ្ទះនោះក៏ដើរជាន់វា ហើយត្រូវវាខាំចំស្មងជើងខាងឆ្វេងមុត២ចង្កូម បណ្តាលឱ្យហូរឈាម ហើយភ្លាមៗនោះពួកគាត់ជាឪពុកម្តាយក៍មិនបាននាំនាងទៅចាក់វ៉ាក់សាំងការពារជំងឺឆ្មា ឬឆ្កែឆ្ងួតឡើយ ។
ប្រភពដដែលបន្តទៀតថា រហូតដល់វេលាម៉ោងប្រមាណ៤ល្ងាចថ្ងៃទី២៤ ខែមករា ឆ្នាំ២០២១ ពេលកូនស្រីរបស់គាត់ទៅហូបអីជាមួយមិត្តភក្តិស្រាប់តែឪពុកម្តាយមិត្តភក្តិមកប្រាប់ថាកូនស្រីរបស់គាត់មានអាការៈដេញខាំគេឯងដូចជាសត្វឆ្មា ហើយនាងត្រូវឪពុកមិត្តភក្តិដឹកមកផ្ទះដោយឃើញសភាពនាងធ្ងន់ធ្ងរពេកក៏បានបញ្ជូនទៅមន្ទីរពេទ្យចំនួន២កន្លែង ប៉ុន្តែគ្រូពេទ្យមិនទទួលនោះទេ និងប្រាប់ឱ្យបញ្ជូននាងទៅកាន់មន្ទីរពេទ្យខេត្តបាត់ដំបង ទើបមានលទ្ធភាពជួយបាន ។
អ្នកស្រី អូន ជ្រាប បន្ថែមទៀតថា ព្រោះតែជីវភាពខ្វៈខាតគ្មានលទ្ធភាពយកកូនស្រីទៅព្យាបាលនៅឯមន្ទីរពេទ្យខេត្តបាត់ដំបង ទើបដឹកនាងត្រឡប់មកផ្ទះវិញ រួចឱ្យគ្រូខ្មែរក្នុងភូមិជួយព្យាបាល ហើយក៏មានអាការៈជាសះស្បើយដូចធម្មតាឡើងវិញ នៅរសៀលថ្ងៃទី២៥ ខែមករាឆ្នាំ២០២១ ។
ដោយឡែកលោកវេជ្ជបណ្ឌិត ឡេ ចាន់សង្វាត ប្រធានមន្ទីសុខាភិបាលខេត្តបន្ទាយមានជ័យ បានឲ្យដឹងនៅរសៀលថ្ងៃទី២៥ ខែមករា ឆ្នាំ២០២១ថា នៅពេលមានបងប្អូនប្រជាពលរដ្ឋណាម្នាក់ដែលត្រូវសត្វឆ្កែ ឬឆ្មាខាំ សូមរួសរាន់នាំទៅចាក់វ៉ាក់សាំងការពារភ្លាមៗ មិនអាចទុកលើសពី១សប្តាហ៍បានឡើយ ហើយត្រូវតាមដានសកម្មភាពសត្វឆ្កែ ឬសត្វឆ្មារដែលបានខាំ បើសិនជាសត្វឆ្កែ ឬឆ្មានោះអត់មានបែកពពោះមាត់ ឬឆ្កួតទេនោះ មនុស្សដែលត្រូវវាខាំក៏អត់មានបញ្ហាដែរ។
លោកប្រធានមន្ទីសុខាភិបាលរូបនេះ បញ្ជាក់បន្ថែមថា បើសិនជាបងប្អូនប្រជាពលរដ្ឋណាម្នាក់ដែលត្រូវសត្វឆ្កែ ឬឆ្មារខាំហើយមិនបានចាក់វ៉ាក់សាំងការពារជំងឺឆ្កែឆ្កួតទេនោះ ពិតជាឆ្លងមេរោគឆ្កែ ឬឆ្មាឆ្កួត ដោយមានអាការៈ និងសកម្មភាពដូចសត្វឆ្កែ ឬឆ្មានោះ ដូចជាមានបែកពពុះមាត់រកខាំគេឯង និងខ្លាចទឹក ខ្លាចខ្យល់ ខ្លាចពន្លឺថ្ងៃ ហើយគ្រូពេទ្យគ្មានលទ្ធភាពជួយសង្គ្រោះបានឡើយ ៕ដោយ៖សហការី
