ភ្នំពេញ៖ ជនជាប់ចោទ លោកស្រី ប៉ែន រ័ត្នថេត ដែលត្រូវជាភរិយាឧកញ៉ាឌុច សារ៉ែន ត្រូវបានជាប់ពន្ធនាគារកន្លងទៅថ្មីៗនេះ មិនដឹងជាកើតចេញនូវអំពើពុករលួយ សូកប៉ាន់ក្នុងកម្រិតណានោះទេ ទើបនៅព្រលប់ថ្ងៃទី២៤ ខែកុម្ភៈ ឆ្នាំ២០១៦ ជនជាប់ចោទរូបនេះ ត្រូវបានចៅក្រមស៊ើបសួរសាលាដំបូងរាជធានីភ្នំពេញ លោក ឆែ វីរៈ ដោះលែងឲ្យនៅក្រៅឃុំបណ្តោះអាសន្ន ទាំងតក់ក្រហល់បំផុត ។ នេះបើតាមការបញ្ជាក់ឲ្យដឹងពីប្រភពមន្ត្រីក្រៅរបងតុលាការ កាលពីម្សិលមិញ ។
ជនជាប់ចោទប៉ែន រ័ត្នថេត ដែលជាប់ពាក់ព័ន្ធទៅនឹងបទល្មើសរកស៊ីជំនួញដី ហើយស៊ីដាច់ដីរបស់ជនរងគ្រោះ បន្ទាប់ពីនគរបាលព្រហ្មទណ្ឌក្រសួងមហាផ្ទៃឃាត់ខ្លួនមានអន្តរាគមន៍ដ៏ប្រសេកប្រសាច ដើម្បីឲ្យលោកស្រីប៉ែន រ័ត្នថេត រួចផុតពីការសាកសួររបស់នគរបាលយុត្តិធម៌ ប៉ុន្តែដោយទំហំនៃបទល្មើសមានធាតុផ្សំ និងជនរងគ្រោះមានឯកសារគ្រប់គ្រាន់ ការអន្តរាគមន៍ត្រូវបរាជ័យ តាំងពីដំណាក់កាលឃាត់ខ្លួនរបស់មន្ត្រីនគរបាលយុត្តិធម៌ និងការចោទប្រកាន់ របស់តំណាងអយ្យការ ។
ពាក់ព័ន្ធក្នុងរឿងលោកស្រី ប៉ែន រ័ត្នថេត ស៊ីដាច់ដីជនរងគ្រោះ គឺមានមន្ត្រីតុលាការតែម្តង ជាអ្នកចេញមុខរត់ការណ៍ខ្វែងដៃខ្វែងជើង ដូច្នេះការដោះលែងឲ្យនៅក្រៅឃុំបណ្តោះអាសន្ន ដោយចៅក្រមស៊ើបសួរ លោក ឆែ វីរៈ គេនៅតែដាក់មន្ទិលសង្ស័យថា ពិតជាមានវត្តមានមន្ត្រីតុលាការដដែលនោះ ចេញមុខរត់ការណ៍ ទាំងបំពានទៅនឹងផ្លូវច្បាប់ ក៏ដូចជាលក្ខន្តិកៈ មន្ត្រីរាជការសាធារណៈ ។
អ្វីដែលចំឡែក និងរងនូវការរិះគន់ពីមន្ត្រីតុលាការផងដែរនោះ ត្រង់ថា ជនជាប់ចោទត្រូវបានដោះលែងកាលពីព្រលប់ថ្ងៃទី២៤ ខែកុម្ភៈ ឆ្នាំ២០១៦ គឺជាពេលវេលាមួយដ៏តក់ក្រហល់បំផុត ដូច្នេះអំពើពុករលួយនៃការសូកប៉ាន់ អាចនឹងកើតមាន ប្រសិនបើថ្នាក់លើយកចិត្តទុកដាក់ ស៊ើបអង្កេតក្នុងរឿងក្តីមួយនេះ មិនតែប៉ុណ្ណោះ ឧកញ៉ា ឌុច សារ៉ែន ដែលត្រូវជាស្វាមីជនជាប់ចោទ លោកស្រី ប៉ែន រ័ត្នថេត ដែលបម្រើការងារនៅទីស្តីការគណៈរដ្ឋមន្ត្រី ជាអ្នកដែលជាប់ពាក់ព័ន្ធទៅនឹងភាពមិនប្រក្រតីជាច្រើនក្នុងរឿងរត់ការណ៍ឯកសារផ្សេងៗ ។
យន្តការកំណែទម្រង់ប្រព័ន្ធតុលាការត្រូវបានអនុវត្ត ប៉ុន្តែមួយរយៈកន្លងមកនេះ បុគ្គលនៃមន្ត្រីតុលាការមួយចំនួននៅតែឆ្លៀតឱកាសបន្តនូវការប្រព្រឹត្តអំពើពុករលួយលើបញ្ហាសូកប៉ាន់ ផ្ទុយពីក្រមសីលធម៌វិជ្ជាជីវៈ ស្របពេលដែលបុគ្គលមន្ត្រីតុលាការខ្លះ ជ្រកក្រោមអំណាចឆន្ទានុសិទ្ធិឯករាជ្យរបស់ខ្លួន ។
ការដោះលែងជនជាប់ចោទ លោកស្រី ប៉ែន រ័ត្នថេត ឲ្យនៅក្រៅឃុំបណ្តោះអាសន្ន ដោយលោកឆែ វីរៈ ចៅក្រមស៊ើបសួរសាលាដំបូងរាជធានីភ្នំពេញអាចជាទង្វើដែលធ្វើឲ្យជនរងគ្រោះខកចិត្ត និងឈឺចាប់ ឬមិនបានទទួលនូវភាពយុត្តិធម៌ចំពោះមុខច្បាប់ ហើយទង្វើរបស់លោកស្រី ប៉ែន រ័ត្នថេត គេគ្មានរំពឹងថា នឹងកែឥរិយាបថនូវគំនិតទុច្ចរិត កេងប្រវញ្ច ស៊ីដាច់ដីអ្នកដទៃនោះ ។
ពាក់ព័ន្ធករណីដោះលែងជនត្រូវចោទខាងលើ នគរវត្តមិនអាចទាក់ទងបានទេពីលោកឆែ វីរៈ ចៅក្រមស៊ើបសួរសាលាដំបូងរាជធានី នារសៀលថ្ងៃទី២៥ ខែកុម្ភៈ ឆ្នាំ២០១៦ ដោយគ្មានលេខទូរស័ព្ទ ហើយក៏ពុំដឹងនៅឡើយទេ ថា ការដោះលែងដោយសារភាពផ្សំនៃសំណូក ឬក៏គ្មានពិរុទ្ធភាពទៅលើជនជាប់ចោទ ទើបចៅក្រមប្រើប្រាស់ឆន្ទានុសិទ្ធិក្នុងការដោះលែងជនជាប់ចោទ ដោយពុំព្រួយបារម្ភប៉ះពាល់ទៅលើដំណើរការនីតិវិធីក្នុងការស៊ើបអង្កេតនោះ ៕
ដោយ៖ សុខ ខេមរា
