មេដឹកនាំមីយ៉ាន់ម៉ា លោកស្រី អង់សាន ស៊ូជី និងមន្ត្រីជាន់ខ្ពស់ជាច្រើនរូប ក្នុងគណបក្សកាន់អំណាច ត្រូវកម្លាំងយោធាមីយ៉ាន់ម៉ាចាប់ខ្លួន នៅព្រឹកថ្ងៃទី១ខែកុម្ភៈ ឆ្នាំ២០២១។
សារព័ត៌មានរ៉យទ័របានផ្សាយថា សកម្មភាពចាប់ខ្លួនខាងលើ ក្រោយវិវាទជាច្រើនថ្ងៃកន្លងមក រវាងរដ្ឋាភិបាលនិងកម្លាំងយោធា បន្ទាប់ពីការបោះឆ្នោត ដែលយោធាចាត់ទុកថាមានការបន្លំសន្លឹកឆ្នោត ។ ការចាប់ខ្លួនបានបង្កក្តីបារម្ភយ៉ាងខ្លាំង ពីការធ្វើរដ្ឋប្រហារនៅក្នុងប្រទេសនេះ។
អ្នកនាំពាក្យគណបក្សសម្ពន្ធមិត្តជាតិដើម្បីប្រជាធិបតេយ្យ លោកMyo Nyunt បាន និយាយថា លោកស្រី ស៊ូជី និងប្រធានាធិបតី Win Myint ព្រមទាំងមន្ត្រីរដ្ឋាភិបាលជាច្រើនរូបទៀត ត្រូវយោធាចាប់ខ្លួននៅព្រឹកថ្ងៃទី១ខែកុម្ភៈ
លោកWin Myint បានបញ្ជាក់ទៀតថា « ខ្ញុំចង់និយាយទៅកាន់ពលរដ្ឋថា សូមកុំប្រតិកម្មយ៉ាងតក់ក្រហល់ គឺធ្វើអ្វីទៅតាមផ្លូវច្បាប់»។ លោកWin Myint បន្តទៀតថា រូបលោកក៏ស្ថិតនៅក្នុងចំណោមមនុស្សដែលយោធាចាប់ខ្លួនផងដែរ។
ការចាប់ខ្លួនកើតឡើងក្រោយពេលកម្លាំងយោធាប្រទេសនេះ ស្នើឲ្យបើកការស្រាវជ្រាវ ពាក់ព័ន្ធការបន្លំសន្លឹកឆ្នោត ។ ការបោះឆ្នោតកាលពីខែវិច្ឆិកាឆ្នាំ២០២០ គណបក្សរបស់លោកស្រីស៊ូជី ទទួលបានជ័យជម្នះ ដាច់ទៅលើគណបក្សផ្សេងៗ។
ការទទួលបានជ័យជម្នះក្នុងការបោះឆ្នោត របស់គណបក្សកាន់អំណាច ទទួលរងការរិះគន់យ៉ាងខ្លាំង ពីគណបក្សប្រឆាំងនិងក្រុមសិទ្ធមនុស្ស ដោយសារតែមិនអនុញ្ញាតឲ្យតំបន់មានវិវាទចូលរួមបោះឆ្នោត ។ គណបក្សប្រឆាំងបានសហការជាមួយកម្លាំងទាហាន ប្រឆាំងលទ្ធផលបោះឆ្នោត។
កម្លាំងទាហានបានប្រកាសថា បានរកឃើញសន្លឹកឆ្នោត ខុសប្រក្រតីដល់ទៅ៨,៦លានសន្លឹក ។ អគ្គមេបញ្ជាការ កងទ័ពមីយ៉ាន់ម៉ា លោកMin Aung Hlaing បានលើកឡើងថា ការបោះឆ្នោត ខ្វះតម្លាភាព មិនយុត្តិធម៌ ។
អគ្គមេបញ្ជាការMin Aung Hlaing ជាបុគ្គលដែលមានឥទ្ធិពលបំផុតនៅមីយ៉ាន់ម៉ា ។ នៅពេលដែលគេសួពីការធ្វើរដ្ឋប្រហារ លោកមិនបានបញ្ជាក់ឡើយ ប៉ុន្តែលោកនិយាយថាអាចនឹងឈានដល់ដំណាក់កាលនោះ៕ដោយ៖ធី រីណា
រូបភាព៖Reuters
