ខេត្តព្រះសីហនុ, បើយោងតាមប្រភពពីសមត្ថកិច្ចកងរាជអាវុធហត្ថខេត្តព្រះសីហនុ បានអោយដឹងថា, នៅថ្ងៃទី ២ ខែ កុម្ភៈ ឆ្នាំ ២០២១ម្សិលមិញ សមត្ថកិច្ចកងរាជអាវុធហត្ថខេត្តដឹកនាំបញ្ជាដោយលោកឧត្ដមសេនីយ៍ ហេង ប៊ុនទី មេបញ្ជាការកងរាជអាវុធហត្ថខេត្ត បានចុះប្រតិបត្តិការឃាត់ខ្លួនមេក្លោងចាប់ដីអនាធិបតេយ្យនិងបក្សពួកចំនួន ១០ នាក់ នៅតំបន់ ពូយម៉ាចូវ ភូមិ គគីរ ឃុំ បិតត្រាង ស្រុក ព្រៃនប់ ខេត្ត ព្រះសីហនុ ដកហូតអាវុធខ្លី ១ដេីម ដេីម្បីកសាងសំណុំរឿងបញ្ជូនទៅតុលាការចាត់ការតាមច្បាប់។
សមត្ថកិច្ចបានបន្តថា,មេក្លោងចាប់ដីអនាធិបតេយ្យមានឈ្មោះ កុយ ស៊ុន ជាអតីតឧត្ដមសេនីយ៍មួយរូប និង បក្សពួក តែងតែធ្វេីសកម្មភាពដេីរចាប់ដីរបស់ប្រជាជន និងដីរដ្ឋដោយខុសច្បាប់នៅភូមិ គគីរ ឃុំ បិតត្រាង ស្រុក ព្រៃនប់ ខេត្តព្រះសីហនុ ដោយមានមេក្លោងធំនៅភ្នំពេញ នៅពីក្រោយខ្នង ។
ប្រភពពីសមត្ថភាពបានអោយដឹងទៀតថា ពេលនេះសមត្ថកិច្ចកំពុងកសាងសំណុំរឿងបញ្ជូនទៅតុលាការចាត់ការតាមច្បាប់ ។ នៅមានក្រុមអនាធិបតេយ្យជាច្រើនក្រុមទៀតកំពុងធ្វើសកម្មភាព ដែលអាជ្ញាធរខេត្តព្រះសីហនុកំពុងតែមានវិធានការ លុបបំបាត់ក្រុមទាំងនេះ តាមរយៈការឃាត់ខ្លួនជាបន្តបន្ទាប់។
សូមបញ្ជាក់ថា ករណីចាប់ដីអនាធិបតេយ្យនៅខេត្តព្រះសីហនុ បានកេីតឡេីងបន្ទាប់ពីវត្តមានវិនិយោគចិនចូលមកកាន់ខេត្តជាប់សមុទ្រមួយនេះ ។ ជាពិសេសវិវាទដីធ្លីបានក្លាយទៅជាបញ្ហាស្មុគស្មាញខ្លាំងដល់អាជ្ញាធរ ព្រោះដីខ្លះមានម្ចាស់រហូតដល់ជិត ១០ នាក់ក៏មាន។
ជាទូទៅគេសង្កេតឃើញថា អ្នក
ណាមានអំណាច មានលុយ អ្នកនោះនឹងមានប្រៀបឈ្នះក្លាយជាម្ចាស់ដី ។ ចំណែកអ្នកតូចតាចក្លាយជាអ្នករងគ្រោះ ។
សូមជម្រាបជូនថា, លោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានធ្វើការក្រើនរំលឹក ទៅដល់អាជ្ញាធរ និងមន្ត្រីជំនាញ ត្រូវសិក្សានិងធ្វើការពិនិត្យឲ្យបានច្បាស់លាស់ មុននិងចេញប័ណ្ណកម្មសិទ្ធិ ជៀសវាងការចេញជាន់គ្នា បង្កើតទៅជាវិវាទមិនចេះចប់៕
ដោយ, វណ្ណៈ
