ភ្នំពេញ៖ បេីយោងតាមរបាយការណ៍របស់មន្ទីរប្រឆាំងគ្រឿងញៀន នៃអគ្គស្នងការនគរបាលជាតិ បានបញ្ជាក់ថា គិតត្រឹមខែមករា ឆ្នាំ២០២១នេះ កម្លាំងសមត្ថកិច្ចទូទាំងប្រទេសកម្ពុជា បានធ្វេីការបង្ក្រាបករណីគ្រឿងញៀន សរុបចំនួន៦៩៨ករណី ជាក់ស្តែងឃាត់ខ្លួនមនុស្ស ១,៧២២នាក់ រួមទាំងដកហូតថ្នាំញៀនជិត៧០គីឡូក្រាម។
របាយការណ៍ខាងលេី បន្តថា ក្នុងចំណោមជនសង្ស័យ ដែលឃាត់ខ្លួនទាំង១,៧២២នាក់នេះ ក្នុងនោះមានស្រីចំនួន៧៧នាក់។
សូមជម្រាបថា សម្រាប់ករណីគ្រឿងញៀន ដែលបង្ក្រាបបានរួមមាន៖ ករណីជួញដូរ រក្សាទុក កែឆ្នៃ ចាត់ចែង និងដាំដុះ បង្ក្រាបចំនួន៤២៨ករណី ឃាត់មនុស្ស៨៥៦នាក់ (ស្រី៥៥នាក់) និងករណីប្រើប្រាស់ ចំនួន២៧០ករណី ឃាត់មនុស្ស៨៦៦នាក់ (ស្រី២២នាក់)។ ចំពោះការអនុវត្ដន៍ដីកា មានចំនួន៣០ដីកា ឃាត់២៨នាក់ (ស្រីម្នាក់)។
គួរបញ្ជាក់ដែរថា សារធាតុញៀនគ្រប់ប្រភេទដែលកម្លាំងជំនាញរឹបអូសបានចំនួនជិត៧០គីឡូក្រាម និង៧៨៣កញ្ចប់តូច រួមទាំងកញ្ឆាជាង៦,៤២៧ដើម៕ដោយ៖សហការី
