ជនបរទេសដែលរស់នៅម៉ាឡេស៊ីទាំងអស់ នឹងទទួលបានវ៉ាក់សាំងកូវីដ-១៩ ដោយឥតគិតថ្លៃ

ចែករំលែក៖

អន្តរជាតិ៖ បើតាមការបញ្ជាក់របស់រដ្ឋាភិបាលប្រទេសម៉ាឡេស៊ី បានចេញសេចក្តីប្រកាសនៅថ្ងៃទី១១ ខែកុម្ភៈ ឆ្នាំ២០២១ថា ជនបរទេសដែលរស់នៅម៉ាឡេស៊ីទាំងអស់ នឹងទទួលបានវ៉ាក់សាំងកូវីដ-១៩ ដោយឥតគិតថ្លៃ។ ជាក់ស្តែងក្នុងសេចក្ដីប្រកាសមួយនេះ បានបញ្ជាក់ថា ការផ្ដល់វ៉ាក់សាំងឥតគិតថ្លៃនេះ ក៏ដោយសារម៉ាឡេស៊ីមានវ៉ាក់សាំងច្រើន និងជាការទទួលស្គាល់ការរួមចំណែករបស់ជនបរទេស ពិសេសពលករបរទេសក្នុងការជំរុញសេដ្ឋកិច្ច។

អាជ្ញាធរម៉ាឡេស៊ី បានបញ្ជាក់បន្ថែមថា នៅចុងខែកុម្ភៈ នឹងចាប់ផ្ដើមយុទ្ធនាការចាក់វ៉ាក់សាំងកូវីដ-១៩ ដោយប្រជាជនម៉ាឡេស៊ី នឹងទទួលបានអាទិភាព។ ប៉ុន្តែជនបរទេសរស់នៅប្រទេសនេះ ក៏មិនត្រូវបានផាត់ចោលដែរ។ បេីតាមក្នុងសេចក្តីថ្លែងការណ៍ចេញនៅថ្ងៃទី១១ ខែកុម្ភៈ គណៈកម្មាធិការធានាការផ្គត់ផ្គង់វ៉ាក់សាំងការពារជំងឺកូវីដ-១៩ បានសង្កត់ធ្ងន់ថា ជនបរទេសដែលរស់នៅម៉ាឡេស៊ី នឹងទទួលបានការចាក់វ៉ាក់សាំងកដោយឥតគិតថ្លៃ នៅពេលម៉ាឡេស៊ីចាប់ផ្តើមបើកកម្មវិធីចាក់វ៉ាក់សាំងរបស់ខ្លួន។

សូមជម្រាបថា នាយករដ្ឋមន្ត្រីម៉ាឡេស៊ី លោក មូហ៊ីឌីន យ៉ាស៊ីន Muhyiddin Yassin កាលពីខែវិច្ឆិកា ឆ្នាំ២០២០កន្លងទៅ ធ្លាប់បានប្រកាសថា រដ្ឋាភិបាលម៉ាឡេស៊ី ក៏មិនបង្ខំឱ្យប្រជាជនត្រូវតែចាក់វ៉ាក់សាំងឡើយ។

បើតាមទូរទស្សន៍ CNA បានចុះផ្សាយថា គណៈកម្មាធិការខាងលើបន្តថា ការសម្រេចចិត្តផ្តល់វ៉ាក់សាំង ក៏ត្រូវធ្វើឡើងពីព្រោះចំនួន វ៉ាក់សាំងដែលរដ្ឋាភិបាលម៉ាឡេស៊ីទទួលបាន គឺលើសពីចំនួនប្រជាជនម៉ាឡេស៊ីផងដែរ។ ចំណែកទាក់ទងការផ្ដល់វ៉ាក់សាំងឱ្យជនបរទេសនេះ រដ្ឋាភិបាលម៉ាឡេស៊ីបានពិចារណាលើកត្តាជាច្រើន។ ខណៈករណីឆ្លងច្រើនក្នុងចំណោមកម្មករបរទេស ជាក្ដីបារម្ភចម្បងមួយរបស់ម៉ាឡេស៊ី ខណៈជនបរទេសជាកម្លាំងដ៏សំខាន់ក្នុងវិស័យកសិកម្ម សំណង់ និងឧស្សាហកម្ម។

គណៈកម្មាធិការដដែល បានអះអាងបន្ថែមថា៖«វាក៏ស្របគ្នានឹងជំហររបស់រដ្ឋាភិបាលក្នុងការផ្តល់វ៉ាក់សាំងដល់ប្រជាជនម៉ាឡេស៊ីឱ្យបានច្រើនបំផុតតាមដែលអាចធ្វើទៅបាន ដើម្បីទទួលបាននូវភាពស៊ាំសហគមន៍»។

គួរបញ្ជាក់ថា ប្រទេសម៉ាឡេស៊ី កាលពីខែវិច្ឆិកា ឆ្នាំ២០២០កន្លងទៅ បានយល់ព្រមទិញវ៉ាក់សាំងចំនួន ១២,៨លានដូសរបស់ក្រុមហ៊ុន Pfizer និងដៃគូអាល្លឺម៉ង់ BioNTech ។ ក្រោយមក នៅខែមករា ម៉ាឡេស៊ីក៏បានចុះហត្ថលេខាលើកិច្ចព្រមព្រៀងទី២ ជាមួយ Pfizer ដើម្បីទទួលបានវ៉ាក់សាំង ១២,២លានដូសបន្ថែមទៀត។ រដ្ឋអាស៊ីអាគ្នេយ៍មួយនេះ ក៏បានចុះហត្ថលេខាទិញវ៉ាក់សាំងកូវីដ-១៩ ចំនួន១៨,៤លានដូស ដែលផលិតដោយវិទ្យាស្ថានស្រាវជ្រាវ Gamaleya របស់រុស្ស៊ី និង Sinovac ប្រទេសចិនផងដែរ៕ដោយ៖ស តារា