ខេត្តព្រៃវែង៖ នៅតំបន់អ្នកលឿងគេខ្សឹបខ្សៀវថា អ្នកស្រី ម៉ែន ចាន់បុប្ផា ម្ចាស់រថយន្តដឹកអង្ករទម្ងន់ជាង៧០តោន មានប្តីជាប្រធានក្រុមជញ្ជីងនៅខេត្តព្រៃវែង ។ យ៉ាងដូច្នេះហើយបានជាអ្នកស្រីអាចប្រើប្រាស់រថយន្តដឹកអង្ករលើសទម្ងន់ ឆ្លងកាត់ស្ពានត្សឹបាសា បានដោយស្រួល ។ មិនមែនត្រឹមតែស្ពានដ៏ស្កឹមស្កៃនេះត្រូវបានរថយន្តដឹកលើសទម្ងន់ឆ្លងកាត់ដោយស្រួលនោះទេ សូម្បីតែនៅលើកំណាត់ផ្លូវជាតិពីភាគខាងកើតប្រទេស ដល់ចុងភាគខាងលិចនៃប្រទេស ក៏រថយន្តដឹកអង្ករលើសទម្ងន់របស់អ្នកស្រី ម៉ែន ចាន់បុប្ផា អាចធ្វើដំណើរបានដោយសុវត្ថិភាពដែរ ។
ប្រភពបានខ្សឹបខ្សៀវថា កាលពីខែមុន ម្ចាស់រថយន្តដឹកអង្ករ ដែលមានប្តីឈ្មោះ ឌឿន ក៏ធ្លាប់បានប្រើប្រាស់រថយន្តលើសទម្ងន់ដឹកអង្ករឆ្លងកាត់ស្ពាននេះដែរ គ្រាន់តែថា ពេលនោះរថយន្តមិនខូចនៅលើស្ពាន ដូច្នេះអាចធ្វើដំណើរបាត់ទៅ ។ លើកនេះ បើកុំតែរថយន្តដាច់កាឡេ ក៏គ្មាននរណាដឹងថា រថយន្តដែលផ្ទុកទម្ងន់ជាង៧០តោនឆ្លងកាត់ស្ពានត្សឹបាសានេះដែរ ។
ប្រភពពីប្រជាពលរដ្ឋនៅតំបន់អ្នកលឿងបានបញ្ជាក់ថា អ្នកស្រីម៉ែន ចាន់បុប្ផា ដែលមានអាយុចន្លោះ៤៥ឆ្នាំទៅ៥០ឆ្នាំ ជាអ្នករកស៊ីដឹកអង្ករតាមរថយន្តធំៗ ឆ្លងទៅប្រទេសថៃ ដោយមិនមានសមត្ថកិច្ចណាអើពើនោះឡើយ ។ មិនអើពើមិនមែន ដោយសារខ្លាចអំណាចអ្នកស្រី ម៉ែន ចាន់បុប្ផានោះទេ ។ ប៉ុន្តែអ្នកស្រីបានចែករំលែកនូវផលចំណេញពីការដឹកលើសទម្ងន់ជូនដល់សមត្ថកិច្ចក្រុមថ្លឹងជញ្ជីងនៅតាមដងផ្លូវគ្រប់ៗគ្នា ។
នៅគ្រាដែលប្រមុខរាជរដ្ឋាភិបាល ក៏ដូចជាប្រជាពលរដ្ឋទូទាំងប្រទេសកំពុងចាប់អារម្មណ៍លើបញ្ហានេះ អាជ្ញាធរជំនាញខេត្តព្រៃវែងបានប្រើប្រាស់កម្លាំងចុះមកវាស់វែងនៅលើទីកន្លែងដែលរថយន្តនោះខូច ហើយបណ្តាលឲ្យស្រុតផ្នែកអ៊ុតកៅស៊ូនៅលើស្ពានអ្នកលឿង ឬត្សឹបាសានោះ ។ ប្រការនេះត្រូវបានប្រជាពលរដ្ឋចំអកថា «ក្របីស៊ីស្រូវ បងមិនសូវហ៊ានដេញ ក្របីដើរចេញ បងដេញឲ្យស្រីមើល, ក្រពើក្នុងទឹកបងមិនហ៊ានចាប់ ក្រពើងាប់ស្រាប់ បង់ចាប់ឲ្យស្រីមើល….»។
លោក ងួន ចំរ៉ុង ប្រធានមន្ទីរសាធារណការខេត្តព្រៃវែងបានឲ្យដឹងថា រថយន្តដឹកអ្នករនោះ បានទៅដល់ប្រទេសថៃហើយ ។ លោកបន្តថា ម្ចាស់ក្រុមហ៊ុនដឹកអង្ករបានចុះកិច្ចសន្យាជាមួយក្រុមហ៊ុនសាងសង់ស្ពាន ដោយជួសជុលកៅស៊ូដែលបានខូចខាត ។ ក្រោយពីធ្វើកិច្ចសន្យារួច ក្រុមហ៊ុនសាងសង់ស្ពានក៏បានដោះលែងម្ចាស់រថយន្តឲ្យត្រឡប់ទៅវិញ រីឯស្ថាប័នមានសមត្ថកិច្ច«មិនលូកដៃក្នុងរឿងហ្នឹងទេ» ។
គួរបញ្ជាក់ថា បញ្ហារថយន្តដឹកអង្ករទម្ងន់ជាង៧០តោន ខូចនៅលើស្ពានអ្នកលឿងបង្កឲ្យមានការចាប់អារម្មណ៍ដល់សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងសម្តេចនាយករដ្ឋមន្ត្រីហ៊ុន សែន ។ បើទោះបីជាសម្តេចប្រមុខរាជរដ្ឋាភិបាល និងសម្តេចឧបនាយករដ្ឋមន្ត្រីបញ្ជាឲ្យសមត្ថកិច្ចចាប់ម្ចាស់រថយន្តនេះយ៉ាងណាក៏ដោយ ក៏រហូតមកដល់ពេលនេះគេមិនទាន់ឃើញតម្រុយម្ចាស់រថយន្តនៅឡើយ ៕
ដោយ៖ ហេង សូរិយា
