ភ្នំពេញ៖ បុរសម្នាក់ដែលត្រូវបានគេស្គាល់ថាជាទាហានផ្កាយ១នៅក្រសួងការពារជាតិ បើករថយន្តពាក់ស្លាកលេខ ខ.ម បានដកកាំភ្លើងខ្លីបាញ់សំដៅបុរសម្នាក់ទៀត ប៉ុន្តែត្រូវគេគេចទានបង្កការភ្ញាក់ផ្អើលដល់កម្លាំងកងរាជអាវុធហត្ថស្ទើរពាក់កណ្តាលក្រុង គ្រាន់តែរឿងគ្រោះថ្នាក់ចរាចរណ៍បន្តិចបន្តួច ។
ហេតុការណ៍នេះបានកើតឡើងកាលពីវេលាម៉ោង៩នឹង៣០នាទីយប់ថ្ងៃទី២៧ ខែកុម្ភៈ ឆ្នាំ២០១៦ នៅចំណុចស្តុប២០០៤ តែមន្ត្រីទាហានរូបនោះព្យាយាមបើករថយន្តឈប់ទុកចោលចូលក្នុងផ្ទះ រហូតក្បែរផ្សារស្ទឹងមានជ័យចាស់ ស្ថិតក្នុងសង្កាត់ស្ទឹងមានជ័យ ខណ្ឌមានជ័យ ។
ប្រភពព័ត៌មានពីសមត្ថកិច្ចបានលួចបង្ហើបប្រាប់ឲ្យដឹងថា បុរសជាជនបង្កដកកាំភ្លើងបាញ់១គ្រាប់នោះ គឺទាហានពាក់ផ្កាយ១ និងមានឈ្មោះ ហេង ធ្វើការនៅក្រសួងការពារជាតិ ចំណែកជនរងគ្រោះមានឈ្មោះ វី អាយុ២៧ឆ្នាំ ជាអ្នករត់ម៉ូតូឌុប ស្នាក់នៅផ្ទះជួលក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ ។
បើតាមសម្តីរៀបរាប់ពីបុរសរងគ្រោះបានឱ្យដឹងថា នៅមុនពេលកើតហេតុរូបគាត់បានជិះម៉ូតូវីវ៉ា ពណ៍ខ្មៅ សេរីឆ្នាំ២០០៦ ពាក់ស្លាកលេខ ភ្នំពេញ 1I-2354 ជិះតាមបណ្តោយផ្លូវលេខ១៨២ ឆ្លងទៅផ្លូវលេខ២៧១ ពេលនោះស្រាប់តែមានរថយន្តឡិចស៊ីស RX 330 ពណ៍ស្ករ ពាក់ស្លាកលេខ ខេមរភូមិន្ទ02 2-6882 ជិះតាមបណ្តោយផ្លូវក្នុងល្បឿនលឿនគៀរគាត់បណ្តាលឱ្យដួល ។ ពេលនោះគាត់ក៏បានជិះម៉ូតូដេញតាម និងយកដៃទះរថយន្តហើយនិយាយថា ម៉េចក៏បើករថយន្តមិនដឹងអីចឹង លឺដូចនេះបុរសជាទាហានពាក់ផ្កាយ១ម្នាក់នោះ បានយកកាំភ្លើងខ្លីអាមេ រួចបាញ់សំដៅមកលើគាត់ចំនួន១គ្រាប់ ប៉ុន្តែគាត់ឃើញទាន់គេចផុតដោយមិនមានរងរបួសនោះទេ ។
ប្រភពបន្តថា បន្ទាប់ពីបាញ់រួចជនបង្កបានបើករថយន្តព្យាយាមគេចខ្លួន តែត្រូវជនរងគ្រោះជិះម៉ូតូដេញតាមពីក្រោយ និងស្រែកឆោឡោឡើងបង្កការភ្ញាក់ផ្អើលដល់កម្លាំងកងរាជអាវុធហត្ថកំពុងជិះល្បាត ដេញតាមនិងទំនាក់ទំនងទៅកម្លាំងបន្ថែមទៀត រហូតដេញដល់ចំណុចកើតហេតុ ទើបជនបង្ករត់ចូលផ្ទះដោយទុករថយន្តចោលមុខផ្ទះ ។
ភ្លាមនោះកម្លាំងកងរាជអាវុធហត្ថជាច្រើននាក់បានចុះមកអន្តរាគមន៍ភ្លាមៗនៅមុខផ្ទះជនបង្ក ហើយកម្លាំងកងរាជអាវុធហត្ថបានធ្វើការឃាត់ខ្លួនបុរសម្នាក់ ដែលអះអាងខ្លួនថាជាបងប្អូនជនបង្កដែលបានប្រមូលឥវ៉ាននៅក្នុងរថយន្ត ជាមួយនឹងរថយន្តជនបង្កយកទៅទីបញ្ជាការកងរាជអាវុអហត្ថរាជធានីភ្នំពេញ ដើម្បីធ្វើការសួរនាំបន្ត ៕
ដោយ៖ ជីម ភារ៉ា ដង្កោ
