ក្លិបបិសាចក្រហម Manchester United បានចេញសេចក្តីថ្លែងការណ៍មួយថា ប្រាក់ចំណូលសរុបរបស់ខ្លួនបានកើនឡើង២,៦ភាគរយក្នុងរយៈពេល៣ខែចុងក្រោយនៃឆ្នាំ២០២០ ដោយសារការផ្សាយនិងការឧបត្ថម្ភពីដៃគូនានា។

អនុប្រធានប្រតិបត្តិលោក Ed Woodward បាននិយាយថា “ការចាក់វ៉ាក់សាំងយ៉ាងលឿននៅចក្រភពអង់គ្លេស និងលើសពីនេះផ្តល់ឱ្យយើងនូវទំនុកចិត្តថាយើងកំពុងស្ថិតនៅលើផ្លូវឆ្ពោះទៅរកភាពធម្មតារួមទាំងការវិលត្រឡប់របស់អ្នកគាំទ្រទៅនឹងស្ថានភាពធូរស្រាលឡើងវិញពីវិស័យកីឡាបាល់ទាត់” ។

ប្រាក់ចំណូលនៃការផ្សាយដែលជាផ្នែកធំបំផុតរបស់ក្លិបបាល់ទាត់អង់គ្លេស Premier League មួយនេះបានកើនឡើង៦៨%ស្មើនឹង១០៨,៧លានផោន។ ការហក់ឡើងខ្ពស់នេះត្រូវបានជំរុញឲ្យក្លិបបិសាចក្រហមអាចចូលរួមក្នុងការប្រកួតពានរង្វាន់ធំៗនៅអឺរ៉ុបនិងមានហិរញ្ញវត្ថុដើម្បីផ្គត់ផ្គង់ក្នុងការទិញកីឡាករផងដែរ។

សេចក្តីថ្លែងការណ៍របស់ក្លិបបានបង្ហាញថា ប្រាក់ចំណូលសម្រាប់រយៈពេល៣ខែគិតត្រឹមថ្ងៃទី៣១ ខែធ្នូមានចំនួន១៧២,៨លានផោន (២៣៩,៩៧លានដុល្លារ) ហើយប្រាក់ចំណេញមានចំនួន៦៣,៩លានផោន។

សូមបញ្ជាក់ថា ក្លិបបិសាចក្រហម Manchester United គឺជាក្លិបដែលឈ្នះជើងឯកលីគកំពូលអង់គ្លេសច្រើនជាងគេរហូតដល់២០ដង បច្ចុប្បន្នកំពុងឈរនៅលេខ២ក្នុងតារាង Premier League បន្តែចាញ់រហូតដល់១៤ពិន្ទុឯណោះពីក្រុមលេខ១ Manchester City ៕

 

ដោយ៖ ភារៈ