អន្តរជាតិ៖ មហាសេដ្ឋីថៃ និងជាឥស្សរជនប្រឆាំងដ៏លេចធ្លោម្នាក់ គឺលោក Thanathorn Juangroongruangkit នៅថ្ងៃអង្គារទី៣០ ខែមីនា ឆ្នាំ២០២១នេះ ត្រូវបានតុលាការព្រហ្មទណ្ឌទីក្រុងបាងកក ចោទប្រកាន់ពីបទបរិហារកេរ្តិ៍ព្រះមហាក្សត្រថៃ បន្ទាប់ពីលោកបានបង្ហោះវីដេអូ ចោទសួរពីការពឹងផ្អែករបស់រដ្ឋាភិបាលលើវ៉ាក់សាំងបង្ការជំងឺ COVID-19 ដែលផលិតដោយក្រុមហ៊ុនដែលមានទំនាក់ទំនងជាមួយគ្រួសាររាជវង្ស។
បើតាមទីភ្នាក់សារព័ត៌មានបារាំង AFP នៅថ្ងៃអង្គារ ទី៣០ ខែមីនានេះ បានចុះផ្សាយថា៖ លោក Thanathorn Juangroongruangkit ជាស្ថាបនិកនៃគណបក្សអនាគតឆ្ពោះទៅមុខដែលត្រូវបានតុលាការរំលាយ បន្ទាប់ពីលោកបានបង្ហោះវីដេអូនៅលើហ្វេសប៊ុកកាលពីខែមករាកន្លងទៅ ដោយបានចោទជាសំនួរជុំវិញថា តើរដ្ឋាភិបាលថៃបានពឹងផ្អែកខ្លាំងកម្រិតណាទៅលើក្រុមហ៊ុនថៃ សៃយ៉ាម បាយអូសាយអិន (Siam Bioscience) ដែលជាកម្មសិទ្ធិរបស់ស្តេច សម្រាប់យុទ្ធនាការចាក់វ៉ាក់សាំងរបស់ខ្លួននោះ?
ទោះបីជាយ៉ាងណាមិញ តុលាការព្រហ្មទណ្ឌទីក្រុងបាងកក នៅថ្ងៃអង្គារនេះបានសម្រេចចោទប្រកាន់លោក Thanathorn ពីបទប្រមាថព្រះមហាក្សត្រ និងឧក្រិដ្ឋកម្មកុំព្យូទ័រលើវីដេអូនោះ ប៉ុន្តែលោកបានបដិសេធ។
ជាមួយគ្នានេះ មហាសេដ្ឋីវ័យក្មេងរូបនេះ បានលើកឡើងថា«អ្វីទាំងនោះវាមានលទ្ធផលវិជ្ជមានទៅវិញទេ សម្រាប់លើកទឹកចិត្តរដ្ឋាភិបាលឲ្យវាយតម្លៃគោលនយោបាយវ៉ាក់សាំងឡើងវិញ ដើម្បីគ្រប់គ្រងស្ថានការណ៍ COVID-19 ឲ្យបានល្អ។ វាគ្មានអ្វីត្រូវព្រួយបារម្ភទេ»។
គួរបញ្ជាក់ថា សម្រាប់អ្នកដែលត្រូវបានផ្តន្ទាទោសតាមច្បាប់បរិហារកេរ្តិ៍យ៉ាងតឹងរឹងរបស់ប្រទេសថៃ អាចប្រឈមនឹងការជាប់ពន្ធនាគាររហូតដល់ ១៥ឆ្នាំសម្រាប់បទចោទប្រកាន់មួយ៕ដោយ៖ស តារា
លោក Thanathorn Juangroongruangkit មហាសេដ្ឋីថៃ និងជាឥស្សរជនប្រឆាំងដ៏លេចធ្លោម្នាក់ នៅប្រទេសថៃ
រូបថត៖AFP
