ខេត្តបន្ទាយមានជ័យៈ យ៉ាងតិចមានសារធាតុញៀន០៤ប្រភេទត្រូវបានសមត្ថកិច្ចនិងមន្ត្រីជំនាញ ធ្វើពិធីដុត​កម្ទេចចោលនាព្រឹកថ្ងៃទី០៧ ខែមីនា ឆ្នាំ២០១៦ នៅចំណុចភូមិ១ សង្កាត់ព្រះពន្លា ក្រុងសិរីសោភ័ណ ខេត្ត​បន្ទាយមានជ័យ ។

លោក ផាន់ វណ្ណរ័ត្ន ព្រះរាជអាជ្ញា នៃអយ្យការអមសាលាដំបូងខេត្តបន្ទាយមានជ័យ បានឲ្យដឹងថា វត្ថុតាងជាគ្រឿងញៀន និងសារធាតុញៀន ដែលត្រូវបានកម្ទេចនាពេលនេះរួមមាន ឱសថម៉ាក Col​ Col​​ Co​ ៤៨កាតុងស្មើ ១២,៨៦៣,០០០គ្រាប់ មីកូរ៉េចំនួន៣៩៨ប្រអប់ តែយឹនស៊ីនចំនួន៥០ប្រអប់ និងកាហ្វេប្រអប់​ចំនួន៥ប្រអប់ ។

លោកបន្តថា នេះជាការខិតខំរបស់សមត្ថកិច្ច ចុះបង្ក្រាប ស៊ើបអង្កេត និងក្នុងបទល្មើសជាក់ស្ដែង ដោយការ​ព្យាយាម អនុវត្តតាមនីតិវិធី ក្រោមការសម្របសម្រួលពីស្ថាប័នអយ្យការ។

វិធីដុតកម្ទេចនេះមានការចូលរួមពីលោកអនុរដ្ឋលេខាធិការក្រសួងយុត្តិធម៌ ប៉ុក ម៉ានី, អភិបាលរងខេត្ត មន្ត្រី​កាំកុងត្រូល និងសមត្ថកិច្ចជាច្រើននាក់៕ ដោយ៖ សុខ ខេមរា