ខេត្តប៉ៃលិន៖ ដោយសារតែជីវភាពគ្រួសារបុរសម្នាក់ ដែលជាប្រជាការពារភូមិ ខណៈដែលរូបគាត់បានចូលទៅក្នុងព្រៃជ្រៅ នឹងឡើងទៅអារដើមឈើមួយដេីមធំ លុះគេចមិនទាន់ ក៏ត្រូវរលំសង្កត់ជាប់ម្នាក់ឯង បណ្ដាលឲ្យរងរបួសយ៉ាងធ្ងន់ធ្ងរ បន្ទាប់ពីបាត់ខ្លួនពីផ្ទះអស់យៈពេល៣យប់៣ថ្ងៃ។ ក្រោយមកប្រពន្ធជនរងគ្រោះមិនឃេីញត្រលប់ទៅផ្ទះ ក៏ពឹងអ្នកភូមិឲ្យជួយដើររក ក៏ប្រទះឃើញនៅលើភ្នំត្រប់តែម្តង។ ភ្លាមនោះក្រុមគ្រួសារ និងអ្នកភូមិដែលបានឃើញហេតុការណ៍នេះ ក៏ប្រញាប់ដឹកបញ្ជូនជនរងគ្រោះទៅសង្គ្រោះនៅមន្ទីរពេទ្យ ប៉ុន្តែជាអកុសលដោយសារស្ថានភាពរបួសធ្ងន់ធ្ងរពេក នៅវេលាម៉ោង១២រំលងអធ្រាត្រឈានចូលថ្ងៃទី១៨ ខែមេសា ឆ្នាំ២០២១នេះ ជនរងគ្រោះបានស្លាប់នៅមន្ទីរពេទ្យខេត្តបាត់ដំបង ។
បេីតាមប្រភពព័ត៌មានពីអាជ្ញាធរមូលដ្ឋាន បានឱ្យដឹងថា ជនរងគ្រោះមានឈ្មោះ ជិន ម៉ាលីន ភេទប្រុស អាយុ៣៩ឆ្នាំ ជាប្រជាការពារភូមិ មានកូន៣នាក់ក្នុងបន្ទុក រស់នៅក្នុងភូមិក្បាលព្រលាន សង្កាត់អូរតាវ៉ៅ ក្រុងប៉ៃលិន ខេត្តប៉ៃលិន ។
មន្រ្តីដដែល បន្តថា មុនពេលកើតហេតុ កាលពីថ្ងៃទី១៥ ខែមេសា ឆ្នាំ២០២១ គេឃើញជនរងគ្រោះខាងលើបានធ្វើដំណើរឡើងទៅលើភ្នំត្រប់ តែម្នាក់ឯង ស្ថិតក្នុងភូមិបរហ៊ុយត្បូង សង្កាត់បរយ៉ាខា ក្រុងប៉ៃលិន ខេត្តប៉ៃលិន ដើម្បីអារឈើយកសង់ផ្ទះស្នាក់នៅជួបជុំប្រពន្ធកូន លុះចេញទៅតាំងពីព្រឹកព្រលឹម រហូតដល់ពេលល្ងាច ក៏បាត់ខ្លួន ដោយមិនឃើញត្រឡប់មកវិញ ទើបនាំគ្នាទូរស័ព្ទទៅសួរនាំជនរងគ្រោះ ដោយទូរស័ព្ទចូលដែរ តែគ្មានអ្នកទទួល ព្រោះជនរងគ្រោះទុកទូរស័ព្ទនៅឆ្ងាយពីខ្លួន ។
ប្រភពដដែល បានបន្ថែមទៀតថា ដោយមិនអស់ចិត្ត ប្រពន្ធជនរងគ្រោះចេះតែទាក់ទងប្តីម្តងហើយម្តងទៀត រាប់សិបដង នៅតែគ្មានអ្នកទទួល ទើបធ្វើឱ្យម្នាក់ៗមានការព្រួយបារម្ភកាន់តែខ្លាំងឡើងៗ រហូតដល់ទូរស័ព្ទជនរងគ្រោះអស់ថ្ម ក៏ទាក់ទងលែងចូល ទើបប្រពន្ធជនរងគ្រោះក៏ទៅពឹងពាក់អ្នកភូមិ ឱ្យជួយដើររកនៅលើភ្នំ អស់រយ:ពេលបីថ្ងៃ គឺរហូតមកដល់ថ្ងៃទី១៧ ខែមេសា ឆ្នាំ២០២១ ទើបនាំគ្នាចូលទៅក្នុងព្រៃជ្រៅ ក៏ប្រទះឃើញដើមឈើ១ដើមធំ សង្កត់ពីលើចំពាក់កណ្តាលខ្លួន គួរឱ្យអាសូរជាពន់ពេក ។ ភ្លាមៗ នោះ អ្នកភូមិប្រញាប់សែងជនរងគ្រោះចេញពីក្នុងព្រៃជ្រៅដឹកយកទៅមន្ទីរពេទ្យបង្អែកខេត្តប៉ៃលិន តែដោយសាររបួសធ្ងន់ធ្ងរពេក ក៏បញ្ជូនទៅមន្ទីរពេទ្យខេត្តបាត់ដំបង ដោយសម្រាកព្យាបាលនៅទីនោះ បានត្រឹមតែរយ:ពេល២ថ្ងៃ ក៏បានស្លាប់តែម្តង ។
បច្ចុប្បន្ន សាកសពបុរសរងគ្រោះ ត្រូវបានសមត្ថកិច្ចជំនាញកោសល្យវិច័យប្រគល់ឲ្យក្រុមគ្រួសារដឹកតាមរថយន្តយកទៅផ្ទះវិញ ដើម្បីរៀបចំធ្វើបុណ្យតាមប្រពៃណី៕ដោយ៖សហការី
រូបភាព៖ជនរងគ្រោះរងរបួសធ្ងន់ធ្ងរ ពេលសម្រាក់ព្យាបាលនៅមន្ទីរពេទ្យបង្អែកចំនួន២ថ្ងៃ បានស្លាប់តែម្តង
