ភ្នំពេញ៖ រសៀលថ្ងៃទី២១ ខែមេសា ឆ្នាំ២០២១ នេះ ក្រុមគ្រូពេទ្យសម្តេចតេជោ ប្រឆាំងកូវីដ-១៩ រួមសហការយ៉ាងសកម្មជាមួយវិទ្យាស្ថានជាតិ សុខភាពសាធារណ: និងក្រសួងសុខាភិបាល ក្នុងកិច្ចការងារប្រយុទ្ធប្រឆាំងជំងឺកូវីដ-១៩ បូករួមទាំងព្រឹត្តិការណ៍ ២០កុម្ភៈ បានចុះយកសំណាកអ្នកដែលសង្ស័យនៅទីតាំង៖ ផ្សារដេប៉ូ ទួលគោក។
កិច្ចខិតខំនេះក្រោមការយកចិត្តទុកដាក់ខ្ពស់របស់បងប្រុស ហ៊ុន ម៉ាណែត ប្រធានក្រុមប្រឹក្សាភិបាលសមាគមគ្រូពេទ្យស្ម័គ្រចិត្តយុវជនសម្តេចតេជោ និងបងស្រី ពេជ ចន្ទមុន្នី អនុប្រធានក្រុមប្រឹក្សាភិបាលសមាគមគ្រូពេទ្យស្ម័គ្រចិត្តយុវជនសម្តេចតេជោ TYDA។
សូមជម្រាបជូនថា, នៅថ្ងៃទី២១ ខែមេសា ឆ្នាំ២០២១ មានករណីវិជ្ជមានវីរុសកូវីដ-១៩ថ្មី ចំនួន ៣០៣នាក់ (សហគមន៍ទាំង ៣០៣នាក់) និងមានអ្នកជាសះស្បេីយចំនួន ២៣៩នាក់ក្នុងនោះរួមមាន៖
គិតត្រឹមព្រឹក ថ្ងៃទី២១ ខែមេសា ឆ្នាំ២០២១
– អ្នកឆ្លងសរុប= ៧៧៤៧ នាក់
– អ្នកជាសះស្បើយ= ២៧៩៤ នាក់
– អ្នកកំពុងព្យាបាល= ៤៨៩៣ នាក់
– អ្នកស្លាប់= ៥៤ នាក់។
សូមបញ្ជាក់ផងដែរថា, ផ្សារដេប៉ូ ស្ថិតក្នុងស៊ភូមិសាស្ត្រ សង្កាត់ផ្សារដេប៉ូ១ ខណ្ឌទួលគោករាជធានីភ្នំពេញ ត្រូវបានអាជ្ញាធរខណ្ឌ ចេញសេចក្តីប្រកាសជូនព័ត៌មាន នៅព្រឹកថ្ងៃទី២១ ខែមេសា ឆ្នាំ២០២១ ផ្អាកមិនឲ្យដំណើរការជាបណ្ដោះអាសន្ន បន្ទាប់ពីមានករណី មានអ្នកកើតវីរុសកូវីដ-១៩ ៕
ដោយ៖ សុខ ខេមរា
