ភ្នំពេញ៖ ហេតុការណ៍គ្រោះអគ្គីភ័យមួយបានកើតនៅក្នុងដីឡូដ៌មួយកន្លែងបង្កអោយមានកាភ្ញាក់ផ្អើលដល់ប្រជាពលរដ្ឋនិងកម្លាំងសមត្ថកិច្ចហៅរថយន្ដពន្លត់អគ្គីភ័យចេញអន្តរាគមន៍ជាច្រើនគ្រឿង។
គ្រោះអគ្គីភ័យដែលបង្កអោយមានការភ្ញាក់ផ្អើលនេះបានកើតឡើងកាលពីវេលាម៉ោង២៣និង៣០នាទីយប់ថ្ងៃទី១០ ខែមិនា ឆ្នាំ២០១៦ នៅចំណុចផ្លូវរថភ្លើង ភូមិបឹងសាឡាង សង្កាត់ឬស្សីកែវ ខណ្ឌឬស្សីកែវ រាជធានីភ្នំពេញ។
បើតាមប្រភពពីប្រជាពលរដ្ឋដែលរស់នៅជិតកន្លែងកើហេតុបានប្រាប់អោយដឹងថានៅមុនពេលកើតហេតុគេបានឃើញមានផ្សែងខ្មួលខ្មាញ់និងមានលាយជាអណ្ដាតភ្លើងឆាបឆេះយ៉ាងសន្ធោសន្ធៅនៅក្នុងដីឡូដ៌មួយកន្លែងដែលម្ចាស់ព័ទ្ធរបងទុកចោល ហើយសំបូរទៅដោយស្មៅនិងដើមឈើដុះយ៉ាងច្រើននៅក្នុងនោះដោយពុំដឹងពីមូលហេតុអ្វីនោះឡើយ។ ពេលដែលឃើញដូច្នេះពួកគាត់ក៏បានរាយការណ៍ប្រាប់កម្លាំងសមត្ថកិច្ចនិងរថយន្ដពន្លត់អគ្គីភ័យអោយចុះជួយអន្តរាគមន៍។
សមត្ថកិច្ចបានអោយដឹងថាក្នុងករណីអគ្គីភ័យឆាបឆេះនេះដែរគឺបានប្រើប្រាស់រថយន្ដពន្លត់អគ្គីភ័យរបស់អគ្គស្នងការនគរបាលជាតិអស់ចំនួន៧គ្រឿង ទើបរលត់ទាំងស្រុង ហើយក៏មិនបណ្ដាលអោយមានការរាលដាលដល់ផ្ទះប្រជាពលរដ្ឋដែលនៅជិតនោះដែរ៕ព្រែកជ័យ
