ខេត្តក្រចេះ៖ បើយោងតាមលិខិតប្រកាសព័ត៌មានរបស់រដ្ឋបាលខេត្តក្រចេះ នៅថ្ងៃទី១០ ខែឧសភា ឆ្នាំ២០២១នេះ បានប្រកាសពីការរកឃើញអ្នកជំងឺកូវីដ១៩ម្នាក់ទៀត ជាស្រ្តីវ័យចំណាស់ អាយុ៧៣ឆ្នាំ រស់នៅភូមិស្រែស្ដៅ សង្កាត់អូរឬស្សី ក្រុងក្រចេះ ។
ជាក់ស្ដែងនៅក្នុងសេចក្ដីប្រកាសព័ត៌មានរបស់រដ្ឋបាលខេត្ត បានបញ្ជាក់ថា ឈ្មោះ អាង សន បានចូលសម្រាកព្យាបាល នៅមន្ទីរពេទ្យបង្អែក ខេត្តក្រចេះ កាលពីថ្ងៃទី២០ ខែមេសាដល់ថ្ងៃទី២៤ ខែមេសា បានចេញពីមន្ទីរពេទ្យបង្អែក ខេត្ត ទៅសម្រាកនៅផ្ទះ។ដល់ថ្ងៃទី៧ ខែឧសភា បានមកសម្រាកព្យាបាលនៅមន្ទីពេទ្យ ខេត្តម្ដងទៀត ដោយអាការៈហត់ និងពិបាកដកដង្ហើម ។ ក្រុមគ្រូពេទ្យក៏បានយក សំណាកទៅតេស្តរកមេរោគកូវីដ១៩ ជាលទ្ធផលឈ្មោះ អាង សន គឺមានផ្ទុកជំងឺកូវីដ-១៩។
ជាមួយគ្នានោះដែរ ក្នុងលិខិតប្រកាសរបស់រដ្ឋបាលខេត្ត ក៏បានជូនដំណឹងដល់ប្រជាពលរដ្ឋដែលបានពាក់ពន្ធ័ជាមួយឈ្មោះ អាង សន សូមរូសរាន់មកជួបក្រុមគ្រូពេទ្យ និងធ្វើចត្តាឡីស័ក ដើម្បីយក សំណាកទៅពិនិត្យ។ បច្ចប្បន្នមន្ត្រីជំនាញភិបាលសុខា និងអាជ្ញាធរកំពុងស្រាវជ្រាវរកប្រភពចម្លង និងអ្នក ប៉ះពាល់ ដើម្បីយកទៅធ្វើចត្តាឡីស័ក និងយកសំណាកតេស្តរកជំងឺកូវីដ១៩។
ចំណែកអ្នកពាក់ព័ន្ធដោយប្រយោលជាមួយអ្នកវិជ្ជមានជំងឺកូវីដ-១៩ ខាងលើ សូមរួសរាន់ធ្វើចត្តាឡីស័កតាមផ្ទះក្នុងក្រុមគ្រួសាររៀងៗខ្លួន ដោយមិនត្រូវពាក់ព័ន្ធ និងប៉ះពាល់ជាមួយអ្នកដទៃជាដាច់ខាត។ ករណីបងប្អូនប្រជាពលរដ្ឋ មានរោគសញ្ញា ផ្តាសាយ ក្អក ហៀសំបោរ ឈឺបំពង់ករ និងថប់ដង្ហើម ឬរោគសញ្ញាផ្សេងៗសូមទៅ មន្ទីរពេទ្យ ឬមណ្ឌលសុខភាព ដែលស្ថិតនៅកន្លែងបងប្អូនរស់នៅ និងរាយការណ៍ ទៅអាជ្ញាធរមូលដ្ឋានជាបន្ទាន់។
គួរបញ្ជាក់ថា ចំពោះករណីរកឃើញអ្នកវិជ្ជមានកូវីដ-១៩ថ្មីនេះ គឺជាករណីទី៥ហើយ សម្រាប់ខេត្តក្រចេះមួយនេះ ក្នុងព្រឹត្តិការណ៍សហគមន៍២០កុម្ភៈ។ ដោយឡែអ្នកកើតជំងឺកូវីដ-១៩ ចំនួន៣នាក់នាពេលកន្លងទៅ បានព្យាបាលជាសះស្បើយផងដែរ៕ដោយ៖សហការី
