ភ្នំពេញ៖ បន្ទាប់ពីសម្តេចក្រឡាហោម ស ខេងបានបញ្ជាឲ្យអាជ្ញាធរមូលដ្ឋានត្រូវរួមគ្នាត្រួតពិនិត្យ និងចាត់វិធានការឡើងវិញ ចំពោះបញ្ហារថយន្តដឹកដីនោះនៅព្រឹកថ្ងៃទី១១ ខែមីនា ឆ្នាំ២០១៦នេះ លោក វរៈសេនីយ៍ឯក ម៉ុក ហុងអធិការនគរបាលខណ្ឌសែនសុខបានបញ្ជាឲ្យកំលាំរបស់លោកដាក់គោលដៅចំនួន២កន្លែងគឺទី១នៅលើកំណាត់ផ្លូវភ្នំពេញហាណូយ សង្កាត់ឃ្មួញនិងគោលដៅ ទី២ ផ្លូវ២០១១សង្កាត់ក្រាំងធ្នុង ខណ្ឌសែនសុខ។
លោក វរៈសេនីយ៍ឯក ម៉ក់ ហុង បានឲ្យដឹងថា ការឃាត់រថយន្តដឹកដីដឹកថ្មដឹកខ្សាចនិងដឹកគ្រោះទាំងនេះគឺដោយមានបទបញ្ជាផ្ទាល់ពីនាយឧត្តមសេនីយ៍ ជួន សុវណ្ណ អគ្គស្នងការរងនគរបាលជាតិនិងជាស្នងការរាជធានីភ្នំពេញបានឲ្យលោកចាត់វិធានការតឹងរឹងចំពោះរថយន្តទាំងនេះដើម្បីត្រួតពិនិត្យចំពោះរថយន្តណាគ្មានច្បាប់និងធ្វើរបាយការណ៍ទៅថ្នាក់លើបន្ត។ លោកបន្ថែមទៀតថាការអនុវត្តន៍ចាប់រថយន្តខាងលើនេះនិងធ្វើជាប្រចាំ។
សមត្ថកិច្ចចរាចរណ៍ដែលចុះអនុវត្តន៍បានឲ្យដឹងថា ការឃាត់រថយន្តចំនួន២គោលដៅនេះគឺឃាត់បានប្រមាណជាង៥០គ្រឿង។
គួរំលឹកដែថាកាលពីថ្ងៃទី១០ ខែមីនា ឆ្នាំ២០១៦ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានបញ្ជាឲ្យអាជ្ញាធរមូលដ្ឋានត្រូវរួមគ្នាត្រួតពិនិត្យ និងចាត់វិធានការឡើងវិញ ចំពោះបញ្ហារថយន្តដឹកដី ដើម្បីចាប់ឃាត់រថយន្តណាឥតសណ្តាប់ធ្នាប់ ដែលធ្វើឲ្យមានធ្លាក់ដីខូចបរិស្ថានក្នុងរាជធានី និងទីប្រជុំជននានា ខណៈដែលប្រជាពលរដ្ឋអ្នកធ្វើដំណើរជាច្រើន បានធ្វើការរអ៊ូរទាំពីបញ្ហាប្រឈមនៃរថយន្តដឹកដីធ្វើអាជីវកម្ម ។
សម្តេចថ្លែងបែបនេះ ក្នុងឱកាសដែលសម្តេច អញ្ជើញជាអធិបតីនៅក្នុងកិច្ចប្រជុំ ត្រួតពិនិត្យលទ្ធផលការអនុវត្តច្បាប់ចរាចរណ៍ផ្លូវគោកថ្មី សប្តាហ៍ទី១ នៃខែមីនា កាលពីរសៀលថ្ងៃទី១០ ខែមីនា ឆ្នាំ២០១៦ ៕ តុង សីហា
